Areglonan di krédito pa kompania

Kredito Chikí Corona ('Klein Krediet Corona', KKC)

E areglo ‘Klein Krediet Corona’ (KKC) a inougurá pa Hulanda Karibense. E areglo ta pa empresario chikí afektá pa e konsekuensianan ekonómiko di e krísis di corona. Gobièrnu ta para garantia pa un parti importante (95%) di un krédito transitorio di €10.000 te ku máksimalmente €50.000. E durashon di e fiansa ta 5 aña maksimal ku un tasa di interes di máksimalmente 4%. E krédito t’ei pa finansiá pèrdida ku a sufri òf ku ta ferwagt di sufri dor di e vírùs di corona.

Empresario ku ke hasi uso di e finansiamentu bou di e areglo di KKC,mester mèldu na un finansiadó. Esaki ta por ehèmpel un banko òf Qredits. Na su turno, e finansiadó ta manda e petishon pa Rijksdienst voor Ondernemend Nederland (RVO) na Den Haag ku ta ehekutá e areglo.

Instansianan di krédito mester ta akreditá pa e areglo BMKB/BMKB-C pa por entrega aplikashon. Si esaki no ta e kaso, e finansiadó por mèldu na Rijksdienst voor Ondernemend Nederland (RVO.nl) pa laga akreditá su instansia.

Ampliashon areglo Garantia finansiamentu empresario (GO)

Esaki ta un areglo pa empresanan mas grandi. E ampliashon ta nifiká ku fiansanan por suma mínimal €1,5 mion i máksimal €150 mion i ku Estado Hulandes ta garantisá esakinan pa 50%. Komo finansiadó por tuma parti institutonan di krédito ku tin pèrmit pa ehersé e negoshi di banko den un pais miembro di Union Oropeo òf na Hulanda Karibense. E finansiadó mester hasi e petishon. Rijksdienst voor Ondernemend Nederland (RVO) na Den Haag ta ehekutá e areglo. Informashon i kontakto: GO

‘Overrbruggingskrediet’ BMKB

Bou di e areglo di Garantia MKB ta habri temporalmente un fasilidat pa suministradónan di krédito na Hulanda Karibense. BMKB – kontrali na Hulanda Oropeo –ta disponibel tambe pa empresarionan agrario, inkluso e sektor di peska i kultura akuátiko. Pa medio di e areglo akí Ministerio di EZK ta para garantia pa kréditonan na empresarionan, di manera ku nan por fia sèn mas fásil. Empresarionan por akudí pa esaki serka suministradónan di krédito, manera bankonan. Ku e medida di ampliashon akí ta hisa e volúmen di garantia di krédito den BMKB di 50% pa 75%. Ademas lo sigui amplia e areglo mas kompará ku e anunsio anterior (djaweps 12 di mart 2020) i e lo ta aplikabel tambe pa e asina yamá ‘overbruggingskredieten’ i kréditonan di kuenta koriente ku un durashon te 2 aña. E finansiadó mester hasi e petishon. Rijksdienst voor Ondernemend Nederland (RVO) na Den Haag ta ehekutá e areglo. Informashon i kontakto: BMKB.

Qredits

Suministradó di krédito Qredits a habri un medida temporal di krédito kaminda ta kobra un interes mas abou i ta ofresé posponementu di obligashon di amortisashon na empresarionan chikitu. Gabinete ta sostené Qredits finansieramente ku un suma adishonal di máksimal €6 mion pa por ofresé e interes mas abou. Ponementu na disposishon di e medida di krísis akí ta dura te fin di mei 2020. Informashon i kontakto: Qredits Bonaire i Qredits Sint Maarten, Sint Eustatius & Saba.