Eksonerashon ABB pa importashon produkto di protekshon personal
Coronavírùs ta pone siudadano i kompanianan dilanti di desafionan grandi. Duana CN ta mira tambe ku hopi ke duna un aporte na kombatimentu di e vírùs. Por ehèmpel dor di hasi donashon di produkto di protekshon personal na institutonan di kuido. E nesesidat di esakinan ta grandi, pasobra tin gran skarsedat di e produktonan aki. P’esei Duana CN ta ofresé e posibilidat pa eksonerá importashon di produkto di protekshon personal, di Algemene BestedingsBelasting (ABB), bou di kondishonnan ora ta importá.
Nos ta hasi lo máksimo posibel pa laga importashon di medionan di protekshon personal kana zetá i lihé. Aspektonan fiskal no mag forma estorbo pa distribushon rápido di produktonan di protekshon personal pa dunadó di ayudo den e tempu pisá aki. P’esei nos a implementá un eksonerashon riba petishon.
Ken ta bini na remarke pa esaki, bou di kua kondishon?
- Produktonan di protekshon personal mester keda importá dor di un di e organisashonnan aki: Instituto gubernamental, unidatnan di yudansa òf institutonan filantrópiko;
- Ta hasi donashon di e artíkulonan i ta uza nan pa víktimanan di e krísis di corona.
Tuma nota: Partidonan di merkado ku ke bende produktonan di protekshon personal, no ta haña eksonerashon.
Organisashonnan ta importá e artíkulonan pa donashon riba nan mes nòmber
Empresarionan por hasi donashon di produkto di protekshon personal na e instansianan menshoná anteriormente. E organisashonnan aki ta importá e artíkulonan riba nan mes nòmber. Nan no mester paga ABB.
Empeño máksimo pa ménos retraso posibel
Duana CN ta empeñá su mes máksimalmente pa ménos retraso posibel na frontera ora ta importá produktonan di protekshon personal. Dor di un bon diseño di e proseso, e areglo fiskal aki apénas ta sòru pa retraso. Asin’ei e produktonan di protekshon personal ta yega rápido na nan destinashon.
Pa kua periodo e eksonerashon spesial aki ta aplikabel?
Di inmediato, pa un periodo di tres luna.
Pregunta?
Pa pregunta por manda un meil na douane@belastingdienst-cn.nl