Diskurso di Minister di Enseñansa, Siensia, Kultura i Deporte Sithree van Heydoorn (Papiamentu)

Discurso | 19-12-2022

Pueblo di Kòrsou,

Mi ta satisfecho i mi ta kontentu, hopi kontentu…

Kontentu pasobra porfin awe, 1537 dia despues ku komunidat sivíl di Kòrsou, a base di un huisio popular riba 3 di òktober 2019,  a yega na e veredikto ku estado Hulandes tambe mester asumí su responsabilidat pa rehabiltá nos heroe nashonal Tula, Hulanda ta honra e sentido di hustisia di komunidat sivíl di Kòrsou i ta deklara ofisialmente ku e ta rehabilitá Tula. Gobièrnu Hulandes a deklará tambe pa huntu ku nos di Kòrsou desaroyá i prepará un símbolo visibel i duradero pa marka ku Tula no solamente ta nos heroe nashonal pero ku Tula ta aún mas nos fuente di inspirashon pa progreso i emansipashon di Kòrsou.

Un fuente di inspirashon pa kada yu di Kòrsou kumpli ku su deber patriótiko i traha duru  pa desaroyá e kultura di resistensha i e kultura di lucha ku ta nesesario pa Kòrsou por progresá den su proseso di emansipashon.

Mi ta kontentu pasobra awor nos heroe nashonal Tula berdaderamente por ta instrumental komo modelo di inspirashon pa nos hobennan den e proseso di nan formashon, edukashon i enseñansa. Pa realisashon di mi vishon pa loke ta trata mehorashon di enseñansa i edukashon esaki ta sumamente importante. Ta konosí ku mi deseo ferviente ta, pa huntu nos mobilisá tur nos esfuerso pa identifiká i implementá e mehorashonnan nesesario den nos enseñansa i edukashon. E mehorashon di nos enseñansa i edukashon mester resultá den un kontribushon berdadero pa desaroyá nos país Kòrsou.

Kumpliendo ku e enkargo noble i emansipatorio ku mi tin komo minister di Enseñansa, Siensia, Kultura i Deporte, e rehabilitashon di Tula ta un kontribushon balioso pa por realisá mi vishon holístiko riba e “kontribushon krusial di enseñansa, siensia, kultura i deporte  pa desaroyo i progreso di nos nashon Kòrsou”.

Den kuadro di esaki ya mi a duna enkargo

• pa konopá nos kultura ku e resistensha i lucha di Tula i su kompañeronan pa un mihó bida den libertat, a base di igualidat i ku solidaridat;
• pa halsa nos kultura na e manera di anda pa sali na defensa di nos derechinan, nos propio interes i tambe e manera pa lucha pa mas i mihó bienestar;
• pa traspasá  e informashon, e noshon, e konosimentu i e konsiensha pa nos desaroyá e identidat kolektivo ku ta nessesario pa Kòrsou por progresá i emansipá.

Tambe ya mi a duna enkargo na sektor di Kultura i Deporte i sektor di Enseñansa di ministerio di ESKD, Fundashon material pa Skol, Fundashon Museo Tula i Plataforma Sklabitut i Herensha di Sklabitut pa uni forsa ....

1. pa perkurá ku kada aña  riba 10 di desèmber, komo dia di Derechinan Humano, skolnan di Kòrsou dediká atenshon na balorisashon di e derechinan Humano fundamental i
2. pa entamá e proseso edukativo pa desaroyá serka nos hobennan di Kòrsou e kultura di resistensha i e kultura di lucha ku ta nesesario pa Kòrsou por progresá den su proseso di emansipashon.

Banda di ta kontentu ku a base di e desishon di Hulanda pa rehabilitá Tula a eliminá un opstákulo psikológiko den realisashon di mi vishon pa mehorashon di enseñansa i edukashon mi por bisa tambe di ta hopi satisfecho ku e logro aki.

Mi ta satisfecho pasobra e desishon di Hulanda pa rehabilitá Tula ta un demonstrashon  mas ku e esfuersonan, i akshonnan di komunidat sivíl di Kòrsou i di suidadanonan aktivo di Kòrsou  a kondusí na  avansenan real den e proseso largu di emansipashon pa libra nos di e gara di sklabitut mental  ku tin nos strobá  den nos esfuersonan pa yega na e desaroyo  apropiá di e yu di Kòrsou i di nos nashon Kòrsou.

Mi ta satisfecho tambe  pasobra un bes mas a keda demonstrá ku e  apelashon ku mi a hasi riba 17 di ougùstùs 2021 den e mesun Parke di Lucha pa Libertat aki tin sintido. 

• E dia ey  mi a enfatisá ku “intenshonalmente  gobièrnu di Kòrsou a skohe pa e fecha di 17 di ougùstùs i no pa e fecha di 1 di yϋli pa asina  enfatisá e  importansha  i deber patriótiko di kada yu di Kòrsou pa nunka no entregá i aseptá situashonnan di inhustisia, di dehumanisashon, di desigualidat i di supordinashon, pero pa uza e lucha emansipatorio ku Tula i su kompañeronan a insisiá riba 17 di ougùstùs komo ehèmpel i fuente  di inspirashon pa lucha i sigui lucha pa libertat, igualdat, solidaridat i dignidat humano”.  
• E dia ey mi a enfatisá tambe ku “Gobièrnu di Kòrsou 38 aña pasá a yega na e desishon inteligente, patriótiko i emansipatorio akí komo kulminashon di e lucha i akshon di añanan largu di gruponan sosial pa libra nos di e yugo pisá di sklabitut mental i pa hasi pueblo di Kòrsou konsiente di e berdadero karakter polítiko di e lucha di nos heroe nashonal Tula.
• Públikamente e dia ey mi a yama e gruponan sosial hopi danki i a hasi un apelashon riba nan pa sigui lucha  realisando ku no ta tur ora esaki ta kondusí na e viktoria final mes ora, pero ku mester perseverá, balorá i apresiá kada adelanto lográ a base di lucha.

E logro di awe ta un prueba mas di esaki, i pesei mi kier yama komunidat sivíl danki i enkurashá nan pa sigui lucha pa un dia nos  tur por kanta : “ Tula bo tin nodi di warda mas.........”

Mashá Danki.