Diskurso di Minister Karien van Gennip na Boneiru (Papiamentu)
Dama i kabayero
Kerido bonerianonan
Mangazina di Rei, e edifisio aki na Rincon, un tempu tabata depósito di rei.
Aki esnan hasí katibu tabata risibí riba djaluna nan profishon di siman.
Despues di esaki nan mester a bai nan trabou den e saliñanan di salu na Saliña Abou (Blauwe Pan).
Na pia, den solo kayente.
E kaminata aki tabata dura seis ora.
Tin biá mas largu.
Durante siman e katibunan di gobièrnu aki tabata permanesé na e saliñanan.
Nan mes mester a sòru mayoria bes pa nan lugá di drumi.
Te djasabra nan tabata regresá nan kas na Rincon.
Ki storia nos lo a tende si nos por a kana huntu ku nan?
Storianan doloroso? Kisas ku rabia?
Òf nos lo a skucha den silensio solamente zonido di bientu?
Nan tabata kanta pa haña ánimo i hasi e kanamentu mas fásil?
Hopi biá no a skirbi e historia di Boneiru, esnan hasí katibu no tabatin mag di siña lesa òf skirbi.
P’esei nan tabata konta nan storianan di generashon pa generashon. Hopi biá esaki tabata sosodé pa medio di músika i kanto.
Den dokumentonan ofisial kasi no por haña algu bèk di e tempu ei.
E presentashon di e informashon aki di e kolonisadó, e outoridat hulandes di e tempu ei na Boneiru, tabata konsentrá riba plaka.
No riba e hende ku tabata hasi e ganashi ei posibel.
Hulanda entre kuminsamentu di siglo 17 i 1863 tabata embolbí indirektamente i direktamente den sklabitut.
Esaki a sòru pa hopi rikesa, visibel por ehèmpel den e ‘Amsterdamse grachtengordel’ i sentro di siudat Middelburg.
Hulanda pa hopi tempu largu, muchu largu, no tabatin bista pa e sufrimentu indeskribibel ku sklabitut i negoshi di katibu a kousa, kon a destruí bida i marka hende. E violensia brutu, e opreshon, tambe aki na Boneiru, na unda esnan sklabisá tabata propiedat di Estado.
Sklabitut i negoshi di sklabitut ta páginanan bergonsoso den historia di nos pais.
A usa hende komo merkansia.
E konsekuensianan di esaki te awe ta sigui tin efekto.
Gobièrnu hulandes pa esaki ke duna awe personalmente su diskulpa.
Na Den Haag,
aki na Boneiru,
i den teritorio karibense, banda di esaki na Kòrsou i Aruba,
na St. Eustatius, Saba i St. Maarten.
Na Sürnam mi kolega, minister Franc Weerwind, ta den kombersashon tokante pasado di sklabitut i e ròl di Hulanda.
Huntu nos a kaba mira i skucha e diskurso di minister-presidente Rutte na Nationaal Archief na Den Haag.
El a para ketu na sifranan históriko i echonan friu, na e krueldat i sufrimentu, i e konsiensia di komunidat di e último añanan.
Diskulpa ta nesesario.
No pa laga pasado nos tras, sino pa enfrentá futuro den forma habrí.
P’esei mi ta ripití e palabranan di minister-presidente:
Siglonan largu estado hulandes i su representantenan a hasi sklabitut posibel, a stimulá esaki.
Siglonan largu den nòmber di estado hulandes a kombertí hende den merkansia, a eksplotá i maltratá nan.
Siglonan largu bou di outoridat estatal hulandes a trapa dignidat humano na e manera di mas horibel.
Muchi tiki gobièrnunan hulandes susesivo despues di 1863 a mira i rekonosé ku pasado di sklabitut tabatin i tin efekto negativo duradero.
Pa esaki mi ta ofresé awe, na nòmber di gobièrnu hulandes, mi diskulpa.
Awe mi ta pidi diskulpa.
Awe mi ta pidi mi diskulpa pa proseder di gobièrnu hulandes den pasado:
Póstumamente na tur hende hasí katibu ku a sufri mundialmente bou di e manera di aktua aki, na nan yu muhénan i yu hòmbernan i na tur nan desendientenan te aki i awor.
Un parti di boneriano, di boso, a laga sa ku nan no ta fèrwagt diskulpa di Hulanda.
E hendenan ku ta representá e bos aki ta bisa: “Boneiru ta un pueblo orguyoso i asertivo. Nos no mester di ekskusa. Nos ta rekonsiliá ku nos mes i nos ta pordoná Hulanda.”
Pordon ta algu grandioso.
Gobièrnu hulandes tin rèspèt profundo pa esaki.
Mi ta gradisidu na boso.
Tin tambe boneriano pa kende dispensa ta un señal importante.
Na nan mi ke bisa: Mi ta spera ku e palabranan di minister-presidente.
i mi binida aki, awe, ta yuda boso.
Esaki mi ta bisa fo’i profundo di mi kurason.
Dispensa ta djis un palabra.
Gobièrnu hulandes ke agregá algun akshon na e palabranan aki. Akshonnan ku ta laga mira ku e páginanan bergonsoso di sklabitut i negoshi di katibu, i e tempu muchu largu ku gobièrnu hulandes a keda ketu, tin tambe espasio pa un futuro komun.
Un tempu den kua nos komo kompatriotanan den reino ta pará banda di otro i sigui padilanti.
Aki dos siman ta 2023.
Riba promé di yüli nos ta konmemorá ku ta 160 aña ku a abolí sklabitut den henter Reino Hulandes. Huntu ku boso, boneriano, pero tambe ku kurasoleño i arubianonan, hendenan di Saba, Sint Eustatius i Sint Maarten, ku surinameñonan na Hulanda i ku tur hende, ku na kua manera ke sea a òf ta sufriendo di e pasado di sklabitut i konsekuensianan di esaki. Nos ta konmemorá pa por komprondé e impakto di nos historia.
Asina tambe Rei a anunsiá ku ta bini un investigashon independiente di e ròl di su famia den historia kolonial.
Pasobra, asina e ta bisa, “Konosementu profundo di pasado ta esensial pa komprondé echo i desaroyonan históriko, pa mira e impakto di esakinan mas skèrpi i honesto posibel riba hende i komunidatnan. Mi ta haña importante tambe pa e konosementu aki ta bini disponibel, esta relashoná ku e ròl di Kas di Oranje Nassau den nos historia kolonial.”
Na 2023 ta bai lanta un fondo. Gobièrnu hulandes ku esaki ke kontribuí na inisiativanan komunitario dirigí riba resultado di i prosesamentu di e pasado di sklabitut.
Aki na Boneiru esaki mester bira tangibel den forma di un monumento di nòmber. Un proposishon hasí pa e Grupo di Diálogo i ku huntu ku bonerianonan mester haña mas forma den e aña di konmemorashon.
Boneiru ta un entidat públiko dentro di Hulanda. Esaki ta por ehèmpel visibel den e echo ku nos ta kompartí:
un Rei
un pasport
i un ekipo di futbòl.
I na promé bista ménos visibel, pero sí asina importante:
nos ta kompartí awor i den futuro libertat i demokrasia.
Nos ta biba den un pais, den un reino, na unda tur hende ta ekibalente i no por diskriminá niun hende.
Mangazina di Rei tabata un lugá na unda esnan sklabisá tabata haña nan profishon.
Danki na e aporte di algun rinkonero emprendedor i perseverante e mangazina aki t’ei ainda.
Pa medio di e storianan ku nan tabata tende na kas, e storianan tokante sklabitut, e difikultatnan, pero tambe tokante forsa i e speransa di nan antepasadonan, nan a mira ku mester a mantené Mangazina di Rei pa por sigui konta e historia, e storianan di Boneiru.
Ku aporte i esfuerso di e hendenan aki Mangazina di Rei a bolbe habri su portanan na 1996. Awor komo un museo i sentro kultural.
Na e momentu aki, 25 aña despues, Mangazina di Rei tá tambe un lugá na unda hóbennan ku trayektonan di siña-traha ta haña mihó chèns riba trabou. I riba un mihó futuro.
Chènsnan nobo. Chènsnan ekibalente.
Mi ta deseá boso tur un bon futuro. Na unda tin espasio pa rekordá pasado, kada aña di nobo. No solamente na Boneiru, sino den henter Reino Hulandes.
Huntu.
Pasobra solamente si nos konosé i ta rekonosé nos historia, si nos papia honestamente riba nos pasado, nos por laga nos yunan mira e forsa di libertat.
I e ora ei nos por traha na un futuro unda un i tur ta ekibalente.
Danki pa boso atenshon.