Diskurso di Sekretario di Estado Alexandra van Huffelen na Kòrsou (Papiamentu)
[1. APERTURA]
Tula warda no wak ainda
Ya ku nos tin algun kos di drecha
Kere nos ta trahando duru
Ekselensianan,
apresiabel presentenan,
apresiabel habitantenan di Kòrsou,
E frasenan akí di e kantika ‘Tula Warda’ di Doble R a zona
den mi kabes preparando pa e dia importante akí.
Pasobra:
e despensa ku gobièrnu hulandes ta pidi, ta un promé paso importante na kaminda pa rehabilitashon.
Tur hende ku mi a papia kuné e último aña tokante e tópiko kargá akí, a siña mi esei.
Nan a konta mi repetidamente: nos tin un kaminda di bai huntu ainda.
I mi a tende e mensahe ei.
I mi a sinti esei.
Bou di un palu di tamarein, Maria Liberia-Peters a konta tokante un mucha hòmber.
Riba un pintura di su mama pretu, el a dun’é un kara blanku.
Pasobra el a deseá ku su mama lo tabata blanku.
Vários hende hóben – den nan binti, trinta aña a konta mi kon nan tin problema di e trouma ku pa generashonnan largu ta wardá den nan DNA.
I na Kolegio Juan Pablo Duarte mi a topa alumno ku a mustra mi nan koló di kueru i bisa algu ku a kibra mi kurason:
‘Nos ta sinti nos mes siudadano di segundo rango.’
Mi deseo ta, ku nunka mas, ningun mucha
den nos reino ta krese ku e sintimentu ei.
[2. EKSKUS + HISTORIA KORSOU]
P’esei mi ta gradesido ku awe nos ta huntu aki.
Na e lugá spesial akí konmemorando Tula.
Pasobra pa logra e meta ei, e despensa ku minister presidente a pidi na nòmber di gobièrnu hulandes, ta un promé paso indispensabel.
Lagami papia klá:
sklabitut ta un krímen kontra humanidat.
Siglonan largu, a eksplota i maltratá hende den nòmber di estado hulandes.
Esei a sosodé na Kòrsou tambe.
Aki na un manera horibel a hasi hende merkansia.
Debí na su ubikashon, Kòrsou tabata spesialmente un stashon intermedio pa bende afrikanonan ku a hasi katibu ku spañónan, inglesnan, portuguesnan i fransesnan.
Un hòmber ku nan a hasi katibu tabata produsí un promedio di 200 florin, kontra un preis di kompra di 40 florin.
Un echo mes konsternante komo apsurdo.
Pero aki tambe a bende algun persona ku a hasi katibu.
A kita nan di nan dignidat, libertat i outonomia, i nan doñonan a fòrsa nan pa traha den kunuku, den laman òf den saliña.
Nan a haña muchu poko pa kome i mester a traha oranan largu, den solo kayente.
Doñonan a maltratá i violá nan.
Esun ku no tabata tende, tabata torturá òf matá nan.
[3. LANTAMENTU DI TULA]
Pero 17 di ougùstùs 1795 tabata otro for di otro dia.
For di e dia ei, e hòmber akí, Tula, (mustra riba e hòmber mei mei di e monumento)
a lanta kontra su doño di plantashi, Casper Lodewijk van Uytrecht.
Sotené pa Bajan Carpata i Pedro Wacao, un dos mil katibu asina a uni ku e rebelion di Tula.
Den e dianan despues di rebelion, a manda pater Jacobus Schinck komo intermediadó serka Tula.
For di su notashonnan nos sa loke Tula a bis’é:
‘A maltratá nos demasiado kaba. Nos no ta purba hasi ningun hende daño, sino ta buska nos libertat.
I, tambe:
Ai pader, nan ta sòru mihó pa un bestia.
Si un bestia kibra un pata, nan ta kur’é.
Tula i su hendenan a hiba un lucha desigual i inhustu.
Despues di algun siman, e mishon a frakasá:
a aplastá rebelion di e héruenan akí.
3 di òktober 1795 na un manera kruel a ehekutá Tula,
Bajan Carpata i Pedro Wacao. Dia mi a lesa esaki, esaki a kibra mi kurason.
[4. REHABILITASHON]
Lamentablemente abolishon ofisial di sklabitut a sigui
ta setenta aña despues. 1 di yüli 1863.
Ku su akto di heroismo, Tula a siña nos ku ta importante pa lucha pa bo prinsipionan.
Pa libertat, igualdat i fraternidat.
Ku orguyo Kòrsou por para riba su skoudernan.
Komo ku nos ke hasi hustisia na historia, gobièrnu hulandes – meskos ku gobièrnu di Kòrsou – ta bai rehabilitá Tula formalmente.
Ku esei mi por bisa por fin nos ta kumpli ku e deseo hustu akí.
Pa kua hopi di boso a lucha pa hopi tempu p’e.
[5. REKONSILIASHON]
Manera Tula meresé un rehabilitashon digno, hopi hende ku a bini despues di dje ta meresé tambe pa menshoná nan awe.
Den mi promé aña komo sekretario di estado di Relashon den Reino, mi a topa hopi hende ku pa hopi aña kaba ta traha pa mas rekonosimentu pa e pasado di sklabitut i pa prosesamentu di esaki.
I hopi di boso ta presente aki awe.
E kòmbersashonnan akí a hasi hopi impreshon riba mi.
Nan a laga mi mira kon importante ta ku nos ta rekonsiliá.
Ku pasado í ku ku otro.
Pasobra solamente e ora ei, nos futuro komun por haña forma.
E teksto di ‘Tula Warda’,
ku mi a kuminsá kuné,
ta bisa ku no ta fásil pa logra esei.
Den e rekonsiliashon ei mi ke hinka mi alma i kurpa.
Den mi kurason mi ta kere i sinti ku nos por esei.
Mi a mira kon e pasado di sklabitut te ainda ta eksistí na Kòrsou.
Pa hendenan personalmente, den kon nos ta biba huntu i den e relashon ku Hulanda.
E kaminda pa rekonsiliashon i rekuperashon no ta un kaminda bunita asfaltá.
Mas bien e ta parse e kaminda steil yen di baranka den direkshon di tòp di Christoffelberg. Riba kua koutelosamente bo ta fula i chambuká tiki pa tiki pa yega mas serka tòp.
Ki dia nos ta yega aya, mi no por bisa boso.
Awe nos ta pone e promé paso.
Laga nos huntu sigui pone paso. A base di apresio i rèspèt mutuo. Kaminda nos ta sali for di nos forsa komun.
Mi ta agradesido ku e añanan ku ta bini, mi por traha huntu ku boso na esei.
[6. SIGUI KONSTRUÍ]
Kuminsando ku e rehabilitashon di Tula. I ku lanta un komité independiente ku ta organisá un konmemorashon digno di e pasado di sklabitut.
Otro aña, for di 1 di yüli, nos ta konmemorá den henter reino durante Aña di Konmemorashon Pasado di Sklabitut.
Nos ta bai hasi esei huntu.
Naturalmente invershon den edukashon, enseñansa i konmemorashon ta hopi nesesario.
No solamente den e Aña di Konmemorashon, sino pa semper.
Asina ku despues di 1 di yüli 2024 tambe, nos por sigui traha na un futuro ku ta basá riba rekonosimentu, rekonsiliashon i igualdat.
Un futuro den kua tur hende konosé i ta rekonosé e historia akí.
Un futuro den kua nos ta protehá e patrimonio kultural di Kòrsou, manera e bunita papiamentu i e maravioso tambú i tumba.
I un futuro den kua tur hende den Reino tin oportunidat igual.
I den kua nos no ta laga ningun hende kai. Kaminda no ta importá na kua parti bo a nase.
Asina ku ningun mucha na Kolegio Juan Pablo Duarte, òf na ningun otro parti, ta bai sinti su mes ménos ku otro.
Masha danki.