Spich Representante di Reino huramentashon di gezaghèber John Soliano
Awe, durante e enkuentro seremonial akí di konseho insular, señor John Robert Edward Soliano ta bai presta huramentu, den kua e ta hura ku e lo ta fiel na Konstitushon i lo kumpli ku lei i lo ehersé su debernan komo gezaghèber segun konsenshi.
Pero promé ku nos pasa pa esei, mi kier yama masha danki un biaha mas públikamente na e dos komishonnan di konfiansa i tur embolbí ku a duna sosten, pa e entusiasmo ku nan a yuda mi kuné pa realisá mi konseho. Un konseho ku finalmente a kondusí na nombramentu di señor John Soliano komo gezaghèber pa Boneiru.
Durante e kombersashonnan di solisitut ku John el a impreshoná mi ku su normanan sosial i étiko haltu. E ta konsiderá integridat i puresa di kondukta komo un karakterístika importante di su kondukta profeshonal. E normanan akí sigur lo ta útil ora di ehersé e funshon di gezaghèber. Pero na mes momentu nan lo bin bou di preshon tambe ku kolegionan ehekutivo motivá i e ambishonnan korespondiente. E ora ei ta bon pa tin un gezaghèber ku tin bista pa e normanan akí i ta atendé ku nan na un manera apropiá.
Ta un bentaha grandi ku nos na Boneiru ta haña un gezaghèber ku ta bini di Boneiru. Esei ta nifiká ku no solamente e ta dominá e idioma, pero tambe konosé e kultura i e hendenan bon. Na mes momentu, Boneiru no ta solamente e Boneiru di hendenan ku a nase akí. E Komishon di Estado pa Desaroyo Demográfiko Hulanda Karibense na yüli a publiká un rapòrt tokante esaki, tokante e konsekuensianan tambe. Den e rapòrt akí ta mustra enfátikamente riba e tareanan grandi den e periodo benidero i e nesesidat pa a base di kolaborashon duna direkshon na e kambionan sosial ku ta na kaminda. Dunamentu di direkshon ta eksigí hopi di gobernantenan, pero sigur di gezaghèber, pa tei pa tur abitante insular, sin importá unda nan a nase òf lanta. Mi sa sigur ku señor Soliano lo hasi su máksimo esfuerso pa esaki.
E ta nifiká tambe ku ta embolbí nos komo komunidat aktivamente ora di tuma desishon ku ta afektá nos. Laga nos hasi bon uzo di esei pues komo siudadano tambe. Pa motibu ku nos, kolegio ehekutivo, konseho insular i siudadanonan, huntu ta responsabel pa desaroyo di nos Boneiru maravioso.
E tarea pisá di gezaghèber no ta sosegá solamente riba skouder di e persona so, pero di henter su famia tambe. Den e sentido ei mi deseo pa su esposa i su famia ta tambe, ku nan por keda disfrutá di otro durante e momentunan skars di sosiegu. Sosiegu ku un gezaghèber tin mester pa relahá. Ku di bes en kuando e por keda disfrutá di su bailamentu ku e gusta hasi asina tantu ku su kasá. Laga nos komo komunidat pues palabrá ku otro tambe ku nos lo respetá e tempu liber skars ei.
Awor mi kier pasa pa e parti ofishal di huramentu. Mi ta pidi señor Soliano pa bini dilanti, para i despues ku a lesa e teksto di e huramentu bisa: “Ku Dios Todopoderoso yudami!”
Mi ta hura ku pa mi nombramentu den e kargo o funshon di gezaghèber mi no a duna ni primintí, ni direkta- ni indirektamente, bou di ningun nòmber ni denominashon ni preteksto, ningun regalo ni fabor.
Mi ta hura ku mi no a risibí ni mi no a aseptá, ni lo mi no aseptá, ni direkta- ni indirektamente, ningun regalo ni ningun promesa di hasi algu o laga di hasi algu den e kargo o funshon en kuestion.
Mi ta hura ku lo mi ta fiel na Konstitushon, ku lo mi kumpli ku lei i ku lo mi kumpli ku mi obligashonnan komo gezaghèber segun mi konsenshi i honor.
Ku esaki e parti formal di huramentu a finalisá i ta pa mi un plaser pa komo promé persona di por felisitá señor John Soliano! Mi ta dese’é tur sabiduria, pasenshi, humor i partikularmente bon salú pa kumpli ku energia ku e tarea pisá aki.