Kadaster

Dikon

Ya na 2010 a kuminsá ku e proseso pa pone e 3 kadasternan na Hulanda Karibense bou di responsabilidat di Kadaster Hulanda. E motibunan prinsipal tabata:

  • Kadaster Hulanda ta aportá na mehorashon di e registronan públiko i registrashon kadastral na Hulanda Karibense.
  • Kontinuidat i kalidat di e tareanan ta mihó garantisá serka un organisashon mas grandi.
  • Mehorashon di e siguridat hurídiko.

Ròl Kadaster

Kadaster Hulanda ta pará leu di polítika. E tarea primordial di Kadaster ta registrá i informá. Ehekushon di esakinan ta fasilitá traspaso di biennan inmóbil, ta duna un estímulo na e merkado di biennan inmóbil i ta aportá na transparensia. Kadaster no ta bai over repartishon di tereno i ta hasi su trabou independiente di e maneho di ordenamentu teritorial, pero ta registrá solamente e estado di biennan inmóbil.

Kadaster Boneiru

No ta asina ku Kadaster na Boneiru ta funshoná malu òf ku tin asuntu di inkumplimentu ku palabrashonnan. Ponementu bou di Kadaster Hulanda pues sigur no ta un moshon di deskonfiansa den direkshon di Kadaster Boneiru. Si ta asina ku pa loke ta trata digitalisashon i kalidat ainda mester hasi algun trabou di mehorashon. Serka un organisashon mas grandi e posibilidatnan pa esaki ta simplemente mas grandi pa motibu e eskala mas grandi tin su bentahanan. Por ehèmpel teknologia i desaroyo di IT ta bai super rápido i ta karu. Traspaso pa Kadaster Hulanda ta hasi posibel ku por sigui digitalisá. Dor di digitalisashon e situashon hurídiko di biennan inmóbil ta bira mas transparente, loke ta promové kompra i finansiamentu di biennan inmóbil i ta mehorá e servisio. Usuarionan na Boneiru – propietario-, notario-, makelar-, banko- i desaroyadónan di proyekto – ta benefisiá di esaki.

Konsulta

Kadaster Hulanda ta ehekutá su tareanan polítikamente neutral, e pèrdida di outonomia pues ta limitá. Ademas Kolegio Ehekutivo por defendé e interesnan boneriano via e prosedura legal di konsulta en kuestion. Kadaster Hulanda mester tene kuenta ku e puntonan di bista di Kolegio Ehekutivo, por ehèmpel tokante tarifanan, den su proposishonnan na e minister pa Medioambiente i Bibienda i indiká tambe kon a prosesá e puntonan di bista akí. Ora di aprobashon di e proposishonnan e minister pa Medioambiente i Bibienda ta paga tinu skèrpi pues riba e interesnan di e islanan.

Proseso

Ku e proposishon di lei a laga warda asina tantu riba dje ta pa motibu ku a duna hopi atenshon na koordinashon kuidadoso ku Hulanda Karibense i pa garantisá ku ta duna e sirkunstansianan spesífiko riba e islanan e balor ku nan meresé. Kadaster Hulanda desde 2012 a organisá diferente tayer pa i riba e islanan i den e parti oropeo di Hulanda mes pa kanalisá e kambionan den bon direkshon. Hopi di esnan embolbí, manera kolaboradó- di kadasternan, kolaboradó- di gobièrnu insular i diputadonan, a asistí na e tayernan akí. Tambe konsulta ku e Kolegionan Ehekutivo riba e proposishon di lei a tuma tempu. Faktornan difikultoso tabata e kambionan di gobernashon i e puntonan di bista di e Kolegionan Ehekutivo ku tabata kambia. Kolegionan Ehekutivo anterior tabata na fabor di e Lei di Kadaster BES. Por ehèmpel na 2012 e anterior ministerio di Infrastruktura i Medioambiente a firma un kombenio ku e Kolegio Ehekutivo anterior pa duna kontenido na e traspaso di responsabilidatnan. E aktual Kolegio Ehekutivo sinembargo a duna di konosé den novèmber 2019 di ta keda mantené e punto di bista di e Kolegio Ehekutivo anterior, i pues no ta partidario di e lei akí i kier mantené Kadaster Boneiru komo un órgano outónomo di Entidat Públiko Boneiru.

E aktual trahadónan lo haña en prinsipio un nombramentu serka Kadaster Hulanda.

Ayudo Kadaster Hulanda

Kadaster Hulanda, antisipando riba e traspaso, e añanan ku a transkurí ya a yuda ku kambionan importante manera digitalisashon di archivonan i realisashon di un ofisina i espasio di archivo adekuado. Mas aleu Kadaster Hulanda a aliviá e trabou na Boneiru dor di laga su kolaboradónan hasi trabounan pa drecha e kalidat (entre otro skèn aktanan), e relashon ku RCN, desaroyo di e sistema di KadorWeb, e kontaktonan ku Belastingdienst i a organisá konferensianan di trabou.

Tarifanan

E espektativa ta ku riba término e tarifanan lo bai baha. E tarifanan na Hulanda Oropeo na e momentunan akí ta generalmente mas abou ku e tarifanan na Boneiru. Den hopi kaso te asta muchu mas abou. Esei ta konta pa e transakshonnan mas komun, por ehèmpel inskripshon di un akta di hipotek ku hopi hende tin di aber kuné. Tarifanan nobo no ta drenta mesora na vigor ora e lei drenta na vigor, pero teniendo na kuenta e prosedura di konsulta ku Kolegio Ehekutivo, lo keda introdusí ku tempu. Kolegio Ehekutivo por ehersé influensia riba haltura di e tarifanan via e prosedura di konsulta.