Programa di Desaroyo Espasial Hulanda Karibense (vershon di diseño)
Sekretario di estado pa Relashon di Reino i Digitalisashon ta anunsiá ku e konsepto di e Programa di desaroyo di Espasio Hulanda Karibense ta disponibel pa tur hende konsultá durante seis siman, entrante 23 di yanüari 2024, na e siguiente sitionan:
Boneiru
Entidat Públiko Boneiru – Kaya Amsterdam 23
Shared Service Organisatie (SSO) Boneiru – Kaya International s/n
Saba
Public Entity Saba - Power Street 1 – The Bottom
Shared Service Organisation (SSO) Saba - Matthew Levenstone Street # 5
Sint Eustatius
Office of the Island Secretary Sint Eustatius - Van Tonningenweg 4,
Shared Service Organisation (SSO) Sint Eustatius - Fort Oranjestad z/n
Banda di esei por haña e RO CN digital riba www.internetconsultatie.nl i www.rijksdienstcn.com.
Kiko RO CN ta?
RO CN ta kontené e maneho di espasio di Gobièrnu Sentral pa Hulanda Karibense. E ta dirigí riba e entidatnan públiko. Nan mester tene kuenta ku e puntonan di salida di RO CN i prosesá nan ora di traha òf revisá plannan di desaroyo di espasio insular. RO CN ta pèrkurá entre otro pa siguiente tópikonan:
- Uso ekonómiko i múltiple di espasio pa garantisá un desaroyo duradero,
- Konstrukshon di bibienda ku ta prepará pa futuro ku ta satisfasé nesesidat di e poblashon di Hulanda Karibense,
- Protehá funshonnan sensibel kontra konsekuensianan di kambio di klima,
- Bon maneho di awa pa limitá inundashon, sekura i eroshon
- Protehá naturalesa.
Mas aleu RO CN ta deskribí e medidanan ku e sekretario di estado ta proponé pa lográ e metanan di Gobièrnu Sentral. Den e sentido ei konsultanan struktural entre e entidatnan públiko i Gobièrnu Sentral ta hunga un papel importante den esaki.
Kon bo por reakshoná?
Si bo kier reakshoná riba e konsepto di RO CN, por ehèmpel pa motibu ku bo ta sinti falta di un tópiko, bo ta haña ku e RO CN ta muchu estrikto òf al kontrario muchu fleksibel, òf si bo kier ekspresá bo aprobashon, bo por manda e ora ei te ku 15 di febrüari 2024 un e-mail pa postbus.ropcn@minbzk.nl òf bo por laga bo reakshon atras riba www.internetconsultatie.nl.
E konsepto di RO CN tabata anteriormente disponibel kaba pa konsulta di 3 di novèmber te ku 14 di desèmber 2023. Den e publikashon den kua a anunsiá e konsulta, a pone un adrès di e-mail robes, esta ropcn@minbzk.nl na lugá di esun (korekto) postbus.ropcn@minbzk.nl. Ademas ta posibel ku riba www.rijksdienstcn.com i lugánan físiko menshoná no a pone e vershon korekto di e RO CN na hulandes.
Si bo a tira bista den e vershon hulandes di e konsepto di RO CN físikamente òf pa medio di www.rijksdienstcn.com i/òf bo a manda un reakshon pa e adrès di e-mail promé menshoná, ta supliká bo pa tòg pasa den e vershon korekto (vershon 4.0) i/òf manda bo reakshon pa postbus.ropcn@minbzk.nl.
Si bo a reakshoná pa medio di www.internetconsultatie.nl, bo a mira e vershon korekto i a risibí bo reakshon na òrdu. Den e kaso ei bo no tin mester di hasi nada.
Kiko ta bai sosedé despues?
Despues ku e ponementu pa tira bista aden pasa ta kolektá, lesa tur e reakshonnan i ta wak si tin motibu pa adaptá e programa. Despues ta presentá e programa (adaptá) na e kolegionan ehekutivo di Boneiru, Saba i Sint Eustatius pa konseho. Despues di a prosesá e konsehonan akí, sekretario di estado lo presentá e programa na konseho di minister pa keda stipulá. Kontra e stipulashon no por hasi opheshon òf apelashon.