IJkwezen (metrologia): Kòntròl di instrumentonan di midishon

Sea ta trata di meternan di kilowattora, meter di awa, pòmp di gasolin òf balansanan: instrumentonan pa midi eksakto ta importante pa konsumidónan i kompanianan. Pa e motibu ei ta obligatorio den komersio, pa usa instrumentonan pa midi kalibrá i unidatnan di midishon legalmente establesé. 

Hulanda ta reglá e maneho i e legislashon. Kalibrashon i rekalibrashon i mantenshon di supervishon ta responsabilidat di Hulanda Karibense.

Un doño di outo ku ta yena 50 liter di gasolin, mester por konfia ku e ta haña e kantidat ei di bèrdat tambe. I un hende ku ta pisa fruta den un supermerkado, mester por konfia ku e peso indiká ta kuadra presisamente.

Pa e motibu ei ta obligatorio den komersio pa usa instrumentonan pa midi kalibrá i pa ekspresá e resultado di e midishon den unidatnan di midishon legal. E último aki ta nifiká por ehèmpel ku bo no por ofresé un òns di produktonan di karni, pero 100 gram. Por sierto e kilogram ta e unidat legal di midishon.

E reglanan aki ta stipulá den entre otro e lei di Kalibrashon BES 2014, e Regulashon di kalibrashon BES i e Desishon riba Unidatnan di Midi 2006. E metanan mas importante di e Lei di kalibrashon BES 2014 ta:

  • Protekshon di konsumidónan;
  • Oumentá e konfiansa den instrumentonan pa midi;
  • Pone kondishonnan pa komersio honesto;
  • Sòru pa seguridat legal.

E Lei di kalibrashon BES ta kontené preskripshonnan pa instrumentonan pa midi ku ta wòrdu usá den komersio. Pensa riba e eksigensianan ku kua un instrumento mester kumpli òf e sirkunstansianan bou di kua e por wòrdu usá. E instrumentonan pa midi aki ta wòrdu kontrolá i di chèk a base di e eksigensianan legal. Dor di e asina yamá kalibrashon i rekalibrashon e gobièrnu ta pèrkurá pa aparatonan inadekuá no drenta den komersio i ku e instrumentonan ku mester usa, ta midi korekto.

Tambe e gobièrnu ta kontrolá si ta kumpli korektamente ku e preskripshonnan. Mantenshon di e reglanan ta promové e protekshon di e konsumidó i ta prevení froude i kompetensha deshonesto den komersio. Pa esaki e gobièrnu lokal ta traha huntu ku e Ministerio hulandes di Asuntunan Ekonómiko. Bo ta haña e Ofisina di kalibrashon na Boneiru serka e departamento di Mantenshon Ruimte & Ontwikkeling (Espasio i Desaroyo) di e Entidat Públiko Boneiru i na Sint Eustatius i Saba serka e departamentonan ekonómiko.

Bo ta bai kumpra un balansa nobo òf un otro instrumento pa midi? Tuma kontakto ku e Ofisina di kalibrashon. E Ofisina di kalibrashon ta yudabo tuma bo desishon.

Paga tinu! Bo no por usa bo balansa òf otro instrumento pa midi nobo, promé ku e Ofisina di kalibrashon a kalibrá e instrumento pa midi. Pues yama e Ofisina di kalibrashon pa hasi un sita. E ora ei un hende di Ofisina di kalibrashon lo pasa serka bo pa kalibrá e instrumento pa midi. Despues bo por usa e instrumento pa midi.

Bo a laga drecha bo balansa? E ora ei tambe yama e Ofisina di kalibrashon promé. E Ofisina di kalibrashon mester kalibrá bo balansa di nobo atrobe. Esei ta konta tambe pa otro instrumentonan pa midi.

Ofisina di kalibrashon - Departamento Mantenshon Espasio i Desaroyo– OLB

Direkshon

Kaya Korona # 89 (mesun edifisio ku e Biblioteka Públiko)

Persona di kontakto

mener Frensel Janga

Tel

(+599) 717 4800 ekstenshon 4818

E-mail

frensel.janga@bonairegov.com