Lei di establesimentu kompania

Prosedimentu

Esun ku ke haña un pèrmit di establesimentu ta entregá un petishon pa esei. E petishonario ta proporshoná e siguiente datonan:

• Datonan personal (nòmber, adrès, fecha di nasementu);
• Tipo di kompania pa kua ta pidi e pèrmit, por ehèmpel: ofisina di makelar, pakus di souvenir, fábrika di baiskel, guesthouse, hotèl;
• Edukashon i posibel eksperensia ku guia di un kompania;
• Invershon ku ta nesesario pa start e kompania nobo;
• Medionan finansiero ku por usa pa e kompania nobo.

E servisio sivil lokal ta kontrolá si e petishon ta kompleto, i ta duna e petishonario oportunidat pa kompletá e petishon si esei no ta e kaso. Despues ta tende Kámara di Komèrsio i Industria tokante e petishon. Si e Kolegio Ehekutivo ta di opinion ku no tin opheshon kontra otorgamentu di un pèrmit di establesimentu, e ora ei e por otorgá e pèrmit.

Término máksimo pa trata petishon

Tin un término pa toma di desishon di ocho siman na vigor. Si no disidí denter di e término di ocho siman aki, e ora ei ta otorgá e pèrmit konforme lei na e petishonario. E Kolegio Ehekutivo denter di dos siman despues di e suministro konforme lei ta publiká un lista di kompania na ken a otorgá un pèrmit di establesimentu  konforme lei. Despues e Kolegio Ehekutivo, si ta nesesario, tin ocho siman mas di tempu pa stipulá kondishonnan mas aleu (artíkulo 6 di e lei ta proveé esaki). Entretantu e empresario sí por kuminsá ku su kompania.

E término ta kuminsá kana na momentu ku a entregá un petishon pa un pèrmit di establesimentu, i e petishon ta kumpli ku tur eksigensia ku ta pone pa esaki. Esei tambe ta inkluí ku a suministrá tur dokumento nesesario. Si e petishon no ta kumpli ku e eksigensianan poné, e ora ei Kolegio Ehekutivo ta duna e petishonario un oportunidat pa adaptá òf kompletá e petishon. Ora a adaptá òf kompletá e petishon, i si na e momentu ei e ta kumpli ku e eksigensianan poné, e ora ei e término pa toma di desishon ta kuminsá kana.

For di promé di yüli 2021, pa empresario na Boneiru ta eksistí e posibilidat pa hasi e petishon pa un pèrmit di establesimentu online. Komo ku e tempu di prosesamentu asina ta bira hopi mas kòrtiku, empresarionan awor por haña e pèrmit aki denter di 6 dia di trabou. Esaki ta un diferensia grandi ku e tempu di espera di 8 siman ku normalmente ta na vigor. Pues di e forma aki ta bira mas fásil pa kuminsá un kompania na Boneiru.

Opheshon

Si sigun Kolegio Ehekutivo ta eksistí inkumbiniensia kontra otorgá e pèrmit di establesimentu, i e inkumbiniensia ta den e echo ku e empresario aparentemente no tin sufisiente abilidat òf aparentemente no tin sufisiente medio finansiero, e ora ei e kolegio por nenga e petishon ku motivashon, denter di ocho siman despues di entrega di e petishon. Den e kaso aki ta esensial pa e Kolegio Ehekutivo ten’é na e término pa toma di desishon, pasobra si nò, ainda ta otorgá e pèrmit di establesimentu pa lei.    

Nengamentu a base di interes general

Den pasado a yega di nenga pèrmit di establesimentu tambe pa protehá otro interesnan general. Interesnan asina ta entre otro, pero no únikamente, salubridat, medio ambiente, protekshon di konsumidó, órden públiko, i seguridat. Ku e kambio di 10 di òktober 2010, e posibilidat pa protehá e otro interesnan ei a baha, bou di e suposishon ku otro komplehonan di regulashon lo por protehá e interesnan ei. Ta resultá ku esei no ta, a lo ménos muchu tiki bia, ta e kaso. Te ora ku e otro regulashonnan pa protehá interesnan general drenta na vigor, Kolegio Ehekutivo ta disponé tambe di e instrumento pa nenga un pèrmit di establesimentu, ounke e Minister di Asuntunan Ekonómiko i Klima mester a bai di akuerdo ku e rechaso di e pèrmit.

Si sigun Kolegio Ehekutivo ta eksistí opheshon kontra otorgamentu di e  pèrmit di establesimentu, i e opheshon ei ta sinta den e nesesidat pa protehá un interes general, e ora ei e por informá e petishonario denter di e promé periodo di ocho siman ku ta ekstendé e término pa toma di desishon ku un di dos periodo di ocho siman. Denter di e periodo di 16 siman ei, Kolegio Ehekutivo ta drenta den kontakto ku Minister di Asuntunan Ekonómiko i Klima i ta splika a base di kua motibunan lo mester nenga e pèrmit. Si e Minister bai di akuerdo pa nenga e pèrmit, e ora ei Kolegio Ehekutivo ta manda un disposishon di rechaso denter di e término stipulá. Si e Minister no ta bai di akuerdo ku e rechaso, e ora ei ainda por sigui un disposishon positivo, i e kolegio ehekutivo por stipulá kondishonnan mas detayá si ta konsiderá esei nesesario.

Lesa aki bou na 'Wak tambe' e preguntanan hopi hasí i e kontestanan korespondiente.