Lei di establesimentu kompanianan

Establesimentu di kompanianan

E Lei Establesimentu kompanianan BES (mira e link pa e lei) a wòrdu adaptá entrante òktober 2011.  
Bou di e legislashon nobo mayoria di e petishonnan pa un pèrmit di establesimentu por wòrdu tratá mas lihé i mas simpel. Tur moratoria ku tabata eksistí a base di e regulashon antiano anterior tokante establesimentu, a keda kaduká (por eksistí limitashonnan si, a base di otro ordenansanan lokal). 
Kompanianan ku ta establesé den Hulanda Karibense kaba, no mester pidi un pèrmit atrobe. Kompanianan ku tin un pèrmit di establesimentu riba e fecha ku e revishon a drenta na vigor, ta mantené e pèrmit ei (irespekto si e kompania ta realmente establesé kaba òf ta den e fase di start ainda).
Petishonnan ku a wòrdu entregá promé ku 10 di òktober 2010 pero ku no a finalisá tratamentu ainda, mester wòrdu evaluá kontra e kriterionan nobo. Den esei ta konta pa ‘no kompletamente tratá ainda’, ku e tèrmino legal pa opheshon i apelashon no a ekspirá kompletamente ainda (wak pa esei e Lei hurisdikshon atministrativo BES)). Pa kada disposishon ku wòrdu duná for di 10 di òktober 2010, ta konta e kriterionan nobo.

Prosedimentu

Esun ku ke un pèrmit di establesimentu mester hasi un petishon pa esei.
E petishonario ta entregá e siguiente tiponan di dato:

  • su datonan personal (nòmber, direkshon, fecha di nasementu);
  • e tipo di empresa pa kua e pèrmit ta wòrdu pidí. Por ehèmpel: ofisina di makelar, tienda di souvenir, fábrika di baiskel, guesthouse, hotèl ku X kamber;
  • e edukashon ku el a haña i eventual eksperensia ku maneho di un kompania;
  • kuantu invershon ta rekerí pa start e kompania nobo;
  • e medionan finansiero ku e ta disponé di dje i ku e por hinka den e kompania nobo.

E servisio sivil lokal, ta kontrolá si e petishon ta kompleto i ta duna e petishonario oportunidat pa kompletá e petishon si esei no ta e kaso. Mas despues e Kámara di Komersio i Industria ta wòrdu skuchá tokante e petishon. Si e Kolegio Ehekutivo ta di opinion ku no tin opheshon kontra otorgamentu di un pèrmit di establesimentu, e ora ei e por otorgá e pèrmit.

Periodo máksimo di tratamentu

Nobo den e lei ta ku un tèrmino di desishon di ocho siman ta konta. Nobo tambe ta, ku ora e ocho simannan pasa, e pèrmit ta wòrdu otorgá pa lei, na e petishonario. E Kolegio Ehekutivo ta publiká dentro di dos siman despues di e otorgamentu pa lei, un lista di empresanan na kua un pèrmit di establesimentu a wòrdu otorgá pa lei. Despues di esei e Kolegio Ehekutivo tin, si ta nesesario, ocho siman mas di tempu pa pone kondishonnan mas detayá (artíkulo 6 di e lei ta pèrkurá pa esei). Pero e empresario por kuminsá ku su negoshi kaba. 

E tèrmino ta kuminsá kana na e momentu ku un petishon pa un pèrmit di establesimentu a wòrdu entregá, i e petishon aki ta kumpli ku tur eksigensianan poné na esei. Bou di esei ta konta tambe ku tur dokumentonan nesesario a wòrdu entregá. Si e petishon no ta kumpli ku tur eksigensianan poné na esei, e ora ei e Kolegio Ehekutivo ta duna e petishonario oportunidat pa adaptá òf kompletá e petishon. Si e petishon a wòrdu adaptá òf kompletá, i e ora ei ta kumpli ku e eksigensianan, e momento ei e tèrmino di desishon ta kuminsá kana.  

Opheshon

Por si akaso sigun e Kolegio Ehekutivo ta eksistí opheshon kontra otorgamentu di e pèrmit di establesimentu, i e opheshon ei ta debí ku e empresario aparentemente no tin sufisiente abilidatnan òf aparentemente no tin sufisiente medionan finansiero, e ora ei e kolegio por rechasá e petishon, motivá, dentro di ocho siman despues di entrega. Den e kaso aki ta esensial ku e Kolegio Ehekutivo tene kuenta ku e tèrmino di desishon, sino e desishon tòg lo wòrdu otorgá pa lei.

Rechaso a base di interes general

E pèrmit di establesimentu den pasado a wòrdu nengá tambe pa protehá otro interesnan general. Tal interesnan ta entre otro, pero no solamente, salubridat públiko, medio ambiente, protekshon di konsumidónan, órden públiko i siguridat.  Ku e kambio di 10 di òktober 2010 e posibilidat pa protehá e otro interesnan ei, a baha, bou di e suposishon ku otro komplehonan di regulashon lo protehá e interesnan ei. Esei aparentemente no ta e kaso, a ménos muchu tiki. Te ora ku e otro regulashonnan ei drenta na vigor pa protehá e interes general, e Kolegio Ehekutivo ta disponé tambe di e instrumento di rechasá un pèrmit di establesimentu, aunke ku e Minister di Asuntunan Ekonómiko, Agrikultura i Inovashon mester a bai di akuerdo ku e rechaso di e pèrmit. 

En kaso ku, sigun e Kolegio Ehekutivo, ta eksistí opheshon kontra otorgamentu di e pèrmit di establesimentu i e opheshon ei ta debí na e nesesidat di protehá un interes general, e ora ei e por notifiká e petishonario dentro di e promé tèrmino di ocho siman ku e tèrmino di desishon ta wòrdu prolongá ku un di dos periodo di ocho siman. Dentro di e periodo ei di 16 siman e Kolegio Ehekutivo ta drenta den kontakto ku e Ministro di Asuntunan Ekonómiko, Agrikultura i Inovashon i ta splika a base di kua motibunan e pèrmit lo mester wòrdu rechasá. Si e Minister bai di akuerdo ku e rechaso di e pèrmit, e Kolegio Ehekutivo ta manda un desishon di rechaso dentro di e tèrmino indiká. Si e Minister no bai di akuerdo ku e rechaso, e ora ei un desishon positivo lo sigui tòg i e Kolegio Ehekutivo por stipulá kondishonnan adishonal, si ta konsiderá esei nesesario. 

Lesa aki bou na ‘Wak tambe’ e preguntanan mas hasí i e kontestanan konserniente.

Tira bista tambe na