Propiedat industrial

E Lei di patènt di Reino 1995 i e Lei markanan BES, ta reglá aktualmente bou di responsabilidat di e Ministerio di Asuntunan Ekonómiko, Agrikultura i Inovashon, e régimen tokante patèntnan i markanan den Hulanda Karibense. Pa e protekshon di modelonan i dibuhonan e régimen di e Lei di outor BES ta konta. Meskos ku anteriormente den Antia Hulandes no ta eksistí un areglo legal separá pa esaki.

Patèntnan

NL Octrooicentrum (Sentro di patènt NL) ta otorgá patènt pa Hulanda i Hulanda Karibense. Tambe NL Octrooicentrum ta pèrkurá pa empresanan, institutonan di konosementu, gobièrnunan i inventornan sa kon nan por usa patèntnan komo fuente di informashon i inspirashon. NL Octrooicentrum ta forma parti di Agentschap NL.
Bo por haña mas informashon tokante patènt riba e Rijksdienst voor Ondernemend Nederland. (Rijksdienst pa Hulanda empresarial).

Derecho di Marka

E Benelux Bureau voor de Intellectuele Eigendom (BBIE, e Ofisina di Benelux pa e propiedat intelektual), ta ehekutá na nòmber di i riba enkargo di e Ministerio di Asuntunan Ekonómiko, Agrikultura i Inovashon, e Lei Markanan BES. Lesa mas riba e wèpsait di e BBIE.

E Lei Markanan BES (WMB) ta na vigor den Hulanda Karibense. E lei aki a drenta na vigor riba 10 di òktober 2010. Tur apoderadonan establesé den e Reino Hulandes por aktua komo apoderado bou di e WMB. E Lei Markanan BES ta pa gran parti igual na e Ordenansa nashonal pa markanan 1995, ku ta na vigor pa Antia Hulandes. E diferensha importante ta ku no a pèrkurá pa un chekeo di depósitonan di marka riba argumentunan apsoluto.  Un otro diferensha ta ku representashon dor di un apoderado no ta obligatorio mas. Meskos ku na Antia Hulandes lo no tin posibilidat mas pa instituí oposishon. 

Pa e markanan antiano ku tabata na Boneiru, Sint Eustatius i Saba kaba, a sòru pa un areglo di transishon. Titularnan di markanan antiano aplikabel por a hasi un depósito di konfirmashon grátis pa Hulanda Karibense, te ku 10 di òktober 2011, pues te un aña despues di e restrukturashon estatal. E posibilidat aki awor no ta eksistí mas.

E protokòl di Madrid ta konta tambe pa Hulanda Karibense. E derechonan di marka ku ta konta pa Antia Hulandes a wòrdu konbertí den inskripshonnan pa Hulanda Karibense, Kòrsou i Sint Maarten, entrante 10 di òktober 2010.

Caribie.nl

Caribie.nl ta para pa Caribisch Nederland Bureau Intellectueel Eigendom (Ofisina Propiedat Intelektual Hulanda Karibense). E wèpsait caribie.nl  ta e medio di komunikashon sentral di e BBIE pa e registrashon i publikashon di markanan den Hulanda Karibense. 

E BBIE ta aspirá pa laga e komunikashon tuma lugá mas tantu posibel via ruta elektróniko. Pa fasilitá e komunikashon riba distansianan grandi i ku un diferensia di ora, a sòru pa un posibilidat pa entregá depósitonan elektrónikamente, ku ‘TM Talk’. E wèpsait pa e markanan den Hulanda Karibense (www.caribie.nl)  ta ofresé un resúmen di e markanan depositá na Hulanda Karibense.  

Si ta deseá, e BBIE por tene bo na altura di informashonnan mas detayá tokante e diferente detayenan, prosedimentunan i asuntunan práktiko ku ta relashoná ku e WMB i e ehekushon di esei. Bo por registrá pa un newsflash dor di manda bo e-mail adrès pa secrwt@boip.int.