Turismo

Pa e ekonomia di Boneiru, Sint Eustatius i Saba, ku huntu ta forma Hulanda Karibense, turismo ta di gran importansia. E reseshon di 2009 a okashoná un gran redukshon di e kantidat di turista durante un kantidat di aña. E sektor di horeca i e gobièrnunan ta traha duru pa kambia e trènt aki. Fin di 2013 i komienso di 2014 ya tabata mihó tempunan pa e sektor di turismo, partikularmente pa Boneiru.

Riba petishon di e ofisinanan di turismo di Boneiru, Saba i Sint Eustatius, e ministerio di Asuntunan Ekonómiko a sostené e tres islanan basta tempu den nan aktividatnan di promoshon i merkadeo via e Ofisina hulandes pa Turismo e Kongresonan (NBTC, ku ta responsabel pa e merkadeo di Hulanda den interior i eksterior) i un ofisina di propaganda hulandes, spesialisá den komunikashon di merkadeo. Profundisashon i aktualisashon di e konosementu di e merkado di fakansi ta un nesesidat konstante. Tambe a traha pa lanta promoshonnan konhunto i partnershipnan di merkadeo pa pone Hulanda Karibense bou di atenshon di turistanan for di Hulanda i otro kaminda.

Problema despues di 10-10-10 tabata e défisit di data tokante e turismo ku ta drenta, dor di e transishon di e tres islanan di e pais Antia Hulandes pa un status spesial den e pais Hulanda. Entretantu e Ofisina Sentral di Estadístika (CBS) a desaroyá un aserkamentu pa pone datonan di turismo riba pia atrobe. Sifranan pa 2012 awor (2014) ta disponibel i e datonan tokante 2013 lo sigui den un poko tempu.

A base di e datonan aki e Kolegionan Ehekutivo i Ofisinanan di Turismo por bai desaroyá plannan. Un di e retonan ta ku e núkleo tradishonal di turistanan di buseo ta birando mas bieu, pa kua motibu mester aserka sup-merkadonan nobo.

Promoshon di turismo i e preparashon di plannan di merkadeo ta na promé lugá, un responsabilidat di e islanan mes. E Ministerio di EZK por sinembargo sostené bon plannan.