Deskripshon proseso despues di aplikashon

Paso 1

E periodo pa hasi petishon ta habri promé ku e semèster. Denter di un periodo di 2 luna, por entregá petishon pa e beka di Reino kompañá pa tur dokumento korespondiente via koninkrijksbeurs@rijksdienstcn.com. Mediante e dokumentonan nos ta kontrolá tambe si e studiante a pidi un NL Scholarship òf KoninkrijksBPV (beka hulandes òf beka di Reino BPV) pa e mesun periodo. E instituto di enseñansa ta saka un deklarashon tokante esaki mediante e formulario institutonan di enseñansa bekanan di Reino.

Paso 2

Lo skrin tur aplikashon entregá pa wak si a yena esaki kompletamente i si a inkluí tur dokumento nesesario. Lo duna e aplikashon un number di korespondensia.

• E aplikashon ta kompleto?

Lo informá e studiante ora a risibí un aplikashon kompleto i a duna e number di korespondensia. Despues lo eliminá kopia di pasport for di e sistemanan.

• E aplikashon ta inkompleto?

Si e aplikashon ta inkompleto, i e ‘deadline’ pa entrega no a pasa ainda, lo informá e studiante i dun’é oportunidat pa ainda bolbe entregá e petishon, kompañá pa tur dokumento. Ku esaki, tambe lo informá e studiante tokante e number di korespondensia asigná.

Paso 3

Ora e periodo pa entrega di aplikashon pa e semèster en kestion a pasa, lo komuniká esaki riba e wèpsait di RCN. Lo repartí e petishonnan a base di ubikashon geográfiko di e instituto i e tipo di enseñansa.

Paso 4

Denter di 1 siman despues di klousura di e periodo, lo manda e listanan ku numbernan di aplikashon sin dato personal ku por rastreá pa notario pa e ronda di sorteo 1,2, i 3. Lo hasi e rondanan di sorteo denter di 2 siman despues di klousura di e periodo pa entrega di aplikashon.

Paso 5

Despues di e sorteo, e notario ta manda nos e listanan di tur aplikashon ku a selektá i aplikashonnan ku a kai pafó di e sorteo. Un kontrol ta tuma lugá di e montante di supsidio ku a pidi pa mira si esaki ta klòp ku e areglo. Lo manda e disposishon ku e informashon aki pa e studiantenan denter di 4 siman despues di e fecha di klousura pa entrega di aplikashon. E ta kontené e montante di supsidio ku a asigná tambe.

Paso 6

Despues ku a manda tur e disposishonnan pa e studiantenan, lo prepará e listanan ku informashon di pago pa pago, i ta manda nan pa pago. Pago di e supsidio ta tuma lugá riba e fechanan komuniká pa e semèster en kestion. Den kada kaso, esaki ta pa mas tardá 8 siman despues di e disposishon ku a risibí, pero ta purba mas tantu posibel pa paga esaki pa mas tardá for di despues di 6 siman.

Kambionan provishonal?

Ora tin kambio ta tuma lugá durante e periodo di e stazje òf interkambio di estudio, pa mas tardá denter di 10 dia di trabou lo informá RCN-OCW tokante esaki. Si e kambio tin influensia riba e montante di supsidio ku a asigná kaba, lo pone e studiante na altura di esaki denter di 4 siman via un disposishon nobo. Si esaki hiba na pago di rekuperashon, lo informá e studiante den e disposishon tokante e términonan vigente i informashon di pago pa paga bèk.

Paso 7

Despues di kabamentu di e periodo di stazje òf periodo di interkambio di estudio pa lokual a risibí un beka di Reino, a base di tèst arbitrario lo pidi 15 studiante pa suministrá informashon ku ta proba ku nan a finalisá e periodo korektamente. Esei ta e motibu pa e formulario prueba di finalisashon. Lo hasi e selekshon di e 15 studiantenan pa mas tardá 1 luna despues di kabamentu di e semèster. Denter di 6 siman despues di e semèster, lo informá e studiante via un karta si ta pidié pa suministrá dokumentonan. Pa mas tardá denter di 8 siman despues di e fecha riba e karta, RCN-OCW mester risibí e informashon ku a pidi. Denter di 4 siman despues ku a risibí e dokumentonan, lo informá e studiante mediante un karta tokante posibel konsekuensianan pa e asignashon di supsidio ku a tuma lugá i e informashon tokante pago bèk ku ta e informashon di pago bèk korespondiente. Ora e dokumentonan proba ku e studiante a tene su mes na e eksigensianan, tambe lo komuniká esaki.

Paso 8

Riba e wèpsait tambe lo duna informashon despues di kabamentu di e semèster tokante e kantidat di beka asigná a base di ubikashon geográfiko i nivel di enseñansa. Esaki ta tuma lugá sin revelá informashon personal.