Despues di bo estudio: paga bèk

Paga bèk

E kuenta di banko riba kua bo mester paga bo fiansa bèk:

Maduro & Curiel’s Bank, (Bonaire) N.V.
Kaya L.D. Gerharts # 1
Kralendijk
Bonaire
Caribisch Nederland
Number di kuenta: 402.821.10
Swift Code: MCBKBQBN

Indiká bo number di identifikashon ku e referensia di pago, siguí pa L i despues bo number di fiansa.

Si bo ke paga bo debe di estudio pa medio di un kuenta pafó di Hulanda Karibense, bo tin ku tene na kuenta ku por tin gastunan di banko mará na esaki. Bo ta responsabel pa e gastunan aki. Tuma nota: si bo laga e banko kita e gastunan aki for di suma di e pago, ménos sèn lo kita for di bo debe di estudio. Esaki por kousa ku por krea retrasonan den pago ku posibel gastunan adishonal di kobransa. Pèrkurá pa nos haña e suma mensual total na tempu.

Pa redusí gastunan di banko bo por skohe tambe pa un pago anual en bes di pagonan mensual. Den e kaso aki, pèrkurá pa hasi e pago total di henter aña na yanüari di e aña ku ta kobrando.

For di ki ora bo mester kuminsá paga bèk?

Despues ku bo a terminá bo estudio bo no mester paga bo debe di estudio òf e supsidio pa start dirèkt. E periodo di grasia ta kuminsá pa bo riba promé di yanüari di e aña ku ta sigui despues ku bo a kanselá e registrashon for di e estudio. Esaki ta un periodo di 2 aña den kua ainda bo no mester paga bèk. Si bo ta deseá di kuminsá paga bèk, klaro esaki ta posibel.

Despues ku e periodo di grasia aki terminá, e fase di paga bèk lo kuminsá. For di e momento aki, bo mester kuminsá paga bo debe bèk. Esaki ta tuma lugá den sumanan mensual. Bo mester kaba di paga bo debe den un máksimo di 15 aña.

E suma ku bo mester paga bèk kada luna ta dependé di e montante total di bo debe, e tasa di interes sperá i lokual falta na durashon di bo debe di estudio. Pero e suma mínimo ta $ 45,42 pa luna.

Ta posibel ku bo tin mas ku un fiansa di estudio serka nos. Por ehèmpel, un debe di estudio promé pa un estudio di mbo i despues un debe di estudio pa un estudio di enseñansa superior. Esakinan ta ser registrá komo fiansanan di estudio separá. Esaki por nifiká ku bo mester paga vários fiansa di estudio i por lo tantu bo mester hasi vários pago pa luna na mesun momento.

Redusí e suma mensual

Bo por hasi petishon serka nos pa redusí e suma mensual. Despues di esaki, nos lo kalkulá a base di bo entrada kuantu lo bo por paga pa luna. Nos ta usa bo entrada di 2 aña pasá pa kalkulá esaki. Si esaki ta mas abou ku e suma mensual stipulá pa nos, e ora ei nos lo redusí bo suma mensual. Esaki por asta resultá den un suma mensual di $ 0. Dor di bo entrada, e suma mensual ku bo mester paga nunka no por bira mas tantu. E kalkulashon di e suma mensual redusí ta bálido pa un aña kalendario. Despues di e aña aki lo revisá bo situashon.

Bo mester paga un debe di estudio na DUO tambe? E ora ei nos ta tene esaki na kuenta tambe ora nos ta kalkulá lokual bo tin komo kapasidat pa paga.

Tuma nota: e kondishon ta ku bo mester hasi un petishon pa redusí bo suma mensual serka DUO. Lo dedusí e suma mensual ku DUO a kalkulá pa bo di e suma mensual pa pago di bo debe(nan) di fiansa ku BES.

Bo por hasi un petishon pa un suma mensual redusí usando e formulario ‘Petishon midimentu di kapasidat finansiero’. Hasi e petishon aki semper promé ku promé di yanüari, pasobra bo petishon lo bira vigente pa promé di yanüari di e aña kalendario ei. Si bo hasi esaki despues? Den e kaso aki, e suma mensual redusí lo drenta na vigor for di e luna despues di e luna den kua a pidi e redukshon di e suma mensual. Por ehèmpel, si bo hasi un petishon 14 di febrüari, bo petishon ta drenta na vigor promé di mart. Ora bo hasi bo petishon pa un suma mensual redusí, bo mester manda komo komprobante un deklarashon di entrada di Ofisina di Impuesto.

Despues ku bo a hasi un petishon pa promé bia pa redusí e suma mensual, nos lo purba pa hasi un petishon pa haña sa bo entrada di e aña siguiente serka Ofisina di Impuesto di Hulanda Karibense. Ora bo ta biba den eksterior òf bo tin entrada di eksterior, mayoria bes nos no por hasi un petishon di bo datonan di entrada serka ofisina di impuesto. E ora ei bo mes mester hasi un petishon pa redusí e suma mensual atrobe den e aña di kalendario nobo.

Restante di e fiansa ta ser pordoná

Si bo a paga bo fiansa bèk kada aña di akuerdo ku bo entrada, e ora ei ta posibel ku despues di 15 aña ainda bo no a kaba di paga tur e debe di estudio. Ta pordoná lokual ku sobra i bo no mester paga esaki bèk.

Tuma nota! Si bo a usa un periodo di grasia (chèk mas abou), e periodo di 15 aña ta ser ekstendé ku e periodo aki. Ora ta pordoná parti di e debe, manera indiká ariba, esaki no ta aplikabel pa pagonan retrasá. Bo mester paga esei bèk.

Temporalmente no hasi pago

Tambe bo por posponé e pago di bo debe di estudio temporalmente. Bo no mester duna un motibu pa hasi uso di un periodo di grasia asina ki. Bo por posponé e pago di bo debe di estudio ku un mínimo di 3 luna i un máksimo di 5 aña. Tuma nota! E interes si ta sigui kore riba e debe i lo ampliá e término máksimo di 15 aña pa paga bèk ku e kantidat di lunanan ku bo a usa den e periodo di grasia.

KONSEHO! Semper hasi un petishon promé pa redukshon di e suma mensual. Podisé di esaki lo resultáden un suma ku bo no lo por paga. Asina ki bo ta evitá ku ta ampliá e término máksimo di 15 aña pa paga bèk. E kantidat mensual redusí ta muchu altu? E ora ei bo por usa e periodo di grasia ainda.

Retraso den pago

Si bo no hasi e pagonan mensual na tempu, e ora ei bo tin un retraso den pago. Evitá ku bo ta kai atras den pago. Bo no por paga un retraso di pago bèk usando bo kapasidat finansiero. Tambe tene kuenta ku no lo pordoná retraso den pago. Ademas, komo último rekurso, nos por laga deurwaarder kobra retrasonan den pago. Esaki ta resultá den gastunan adishonal, kual bo mester paga. Bo tin problema pa hasi pago? E ora ei tuma kontakto ku nos mesora! Huntu nos por wak kiko e posibilidatnan ta. Evitá ku bo ta haña (mas) problema.

Bo tin pregunta? Puntra e tim Finansiamentu di estudio, na kantor Boneiru

Ainda bo tin pregunta? Sinti bo liber pa tuma kontakto ku nos. Nos lo por yuda bo mas aleu.

Tambe bo por tuma kontakto ku nos si bo tin preguntanan general tokante finansiamentu di estudio òf un debe di estudio serka DUO. Solamente nos no por kontestá preguntanan relashoná ku kontenido. Por ehèmpel, nos por yuda bo ku bo petishon pa finansiamentu di estudio via DUO, pero nos no por bisa bo dikon no a kalkulá bo beka adishonal ainda. Òf si bo tin un debe na DUO, nos por yuda bo ku bo petishon pa redusí bo suma mensual. Pero nos no por duna bo un splikashon tokante un debe ku bo tin na DUO. Den e kaso aki, bo tin ku tuma kontakto ku DUO. Pa datonan di kontakto di DUO, bishitá duo.nl/antillen.

Nos datonan di kontakto
Kaya L.D. Gerharts 12 (Belastingkantoor)
Kralendijk
Bonaire CN
E-mail: studiefinanciering@rijksdienstcn.com
Tel: +599 715 8704
Website: www.papiamentu.rijksdienstcn.com/finansiamentu-di-estudio
Facebook: Rijksdienst Caribisch Nederland Studiefinanciering

Oranan di konsulta
Solamente ku sita riba e oranan menshoná riba nos wepsait.

Empleadonan di Studiefinanciering ta bishitá Sint Eustatius i Saba regularmente i ta anunsiá esaki na tempu