Enseñansa obligatorio i obligashon di kualifikashon
Enseñansa obligatorio ta konta pa mucha di 4 aña te ku 16 aña di edat. Lei di Enseñansa Obligatorio BES ta sòru pa kada mucha ta inskribí na un skol te ora e tin 16 aña i ku e ta bai skol tambe. Mayor i esnan enkargá ku kuido di mucha tin ku duna kuenta si esaki no sosodé. Skolnan ta obligá di mèldu na Entidat Públiko si e alumno ta ousente sin ku a duna motibu pa esei.
Si un alumno keda sin bai skol, òf si un alumno no ta inskribí na skol, e ámtenar di enseñansa obligatorio ta investigá ta kon bin esei. Mayor i hóben (for di 12 aña di edat) ta kore riesgo di un but ora mucha no bai skol i òf no ta inskribí na un skol. Hóbennan por haña un kastigu tambe pa sigui un kurso òf un kastigu kaminda nan mester traha sin risibí pago.
Si un alumno ke bai den eksterior siendo ku no tin vakashon, e mester por mustra na frontera un deklarashon di eksonerashon, dispensashon, verlòf òf mudansa. Esaki ta stipulá den Lei di Enseñansa Obligatorio di BES.
Obligashon di kualifikashon
Despues di e delaster aña di enseñansa obligatorio, obligashon di kualifikashon ta kuminsá konta pa hóben ku no tin un kualifikashon pa start ainda. Un kualifikashon pa start ta un diploma di havo, vwo òf mbo (nivel 2). Gobièrnu ta konsiderá e nivel akí komo un eksigensia mínimo pa un bon partisipashon den komunidat.
E obligashon di kualifikashon ta konta te dia ku e hóben a logra haña un kualifikashon pa start. Òf te dia ku e hóben kumpli 18 aña. Kualifikashon pa start ta un di e medidanan pa evitá ku hóben ta stòp di bai skol sin ku nan a haña un diploma. Kualifikashon pa start ta obligá hóben ku ta mas bieu ku 16 aña i ku no tin e kualifikashon ei pa sigui un programa kompleto di enseñansa.
Obligashon di kualifikashon no ta nifiká semper ku durante sinku dia di siman mester ta sintá den banki na skol. Obligashon di kualifikashon ta reglá tambe den Lei di Enseñansa Obligatorio di BES i ámtenar di enseñansa obligatorio ta wak tambe pa kumpli ku esei.
Ámtenar di enseñansa obligatorio
Ámtenar di enseñansa obligatorio ta den servisio di Entidat Públiko. E ta kontrolá si ta kumpli ku enseñansa obligatorio. Ámtenar di enseñansa obligatorio ta duna informashon tambe na hóben- i mayornan tokante importansia pa bai skol. I di e konsekuensianan si no kumpli ku Lei di Enseñansa Obligatorio. Si un mucha no ke bai skol mas pasobra e tin un problema, e ámtenar di enseñansa obligatorio ta buska un solushon den deliberashon ku skol i mayornan. Sinembargo mayornan i skol ta keda primeramente responsabel pa e mucha. Den kaso ku e alumno no ta bin skol i no ta duna motibu pa esei ta e mayornan i alumnonan di 12 aña òf mas ta responsabel.
Si hóben ku tin obligashon di bai skol òf hóben ku tin obligashon di kualifikashon no ta inskribí na un skol i/òf no ta bai skol òf un instituto di formashon, e ora ei e mayornan i/òf e hóbennan ta kastigabel. Mayor i hóbennan ta kore riesgo di un but. Hóbennan por haña un kastigu pa sigui un kurso òf un kastigu pa traha sin haña pago.