Partisipashon

Responsabilidat pa maneho di skol ta den man di direktiva di skol. Pero alumno, personal i mayor tambe por tin influensia. Por hasi esaki via Konseho di Partisipashon, tur skol ta obligá pa nan tin esei.

Desde 1 di ougùstùs 2104 tin un stipulashon legal mínimo pa partisipashon na skolnan  (PO/VO) na Boneiru Sint Eustatius i Saba. E derecho di partisipashon na Hulanda Karibense ta diferensiá ku esei di  Lei Partisipashon Skolnan(Wet Medezeggenschap Scholen WMS) òf Lei tokante Konseho di  Empresa (Wet op Ondernemingsraden. WOR).
Gerensia di skol ta obligá pa deliberá ku Konseho di Partisipashon. Konseho di Partisipashon ta partner pa dialogá kuné pa gerensia, entre  otro tokante plannan pa maneho di skol. Konseho di Partisipashon ta ehersé influensia i gerensia di skol ta tuma un desishon despues di deliberá ku Konseho di Partisipashon. Gerensia di skol ta palabrá ku Konseho di Partisipashon ta kua ta e tópikonan pa kua nan ta bai pidi Konseho di Partisipashon un konseho. I tambe kuantu biaha pa aña tin reunion ku Konseho di Partisipashon.
 

E miembronan

Pa enseñansa básiko un Konseho di Partisipashon ta konsistí di mayor i miembronan di personal. Den enseñansa sekundario Konseho di Partisipashon ta konsistí di mayornan, miembronan di personal i alumnonan. E proporshon ta 50% personal i 50% mayor i alumnonan. Si bo ke ta den Konseho di Partisipashon di bo skol, bo mester pone bo mes elegibel. Elekshon ta determiná ken tin mag di partisipá den kombersashon i partisipá den desishon.
Den reglamentu di partisipashon mester tin pará kon bo por pone bo mes disponibel pa elekshon. Bo por pidi direktor di skol pa e reglamentu akí. 
 

Derecho di informashon

Informashon ta importante pa transparensia na skol. Konseho di Partisipashon mester disponé di informashon pa por papia tokante maneho i kalidat na skol. Pues derecho di informashon ta un derecho importante tambe pa Konseho di Partisipashon. Gerensia di skol tin e tarea pa informá Konseho di Partisipashon na tempu pa asina e órgano por funshoná bon. Gerensia tin mag di tuma e konsehonan di Konseho di Partisipashon ofer pero no tin obligashon pa esei. Si nan no tuma e konseho ofer, hopi biaha esei ta inisio di un tanda nobo di kombersashon pa logra di ta di akuerdo ku otro.
 

Partisipashon na bo skol

Pa mas informashon tokante partisipashon na bo skol òf skol di bo yunan, bo por akudí serka gerensia.