Dia kontra Trafikashon di hende

Kiko ta trafikashon di hende?

Trafikashon di hende ta entre otro reklutá, transportá òf tuma i duna alohamentu na personanan, hasiendo uso di preshon. Víktimanan hopi bia ta den un posishon vulnerabel. Ta chantagiá, menasá, maltratá òf gañanan. Di e forma ei ta mantené den un situashon di eksplotashon.

Kiko ta kontrabanda di hende?

Kontrabanda di hende ta ofresementu di ayudo i transporte na personanan ku e meta pa di forma ilegal laga nan pasa frontera. Kontrabandistanan ta hasi uso di nesesidat di migrantenan. E personanan ku pasa di kontrabanda ta paga e kontrabandistanan pa por ehèmpel transporte, alohamentu òf dokumentonan (di biahe) falsu.

‘Mi a diskubrí kiko eksplotashon ta,
ora mi a bira víktima di trafikashon di hende

Riba kiko bo mester paga tinu?

Tin diferente forma di trafikashon di hende, manera eksplotashon seksual, eksplotashon laboral òf explotashon kriminal. Kada forma tin su propio señalnan. Mayoria bia den kaso di trafikashon di hende ta trata di un kombinashon di diferente señal.

Ta importante pa señalá trafikashon di hende, pasobra víktimanan por ta dependé di personanan den nan besindario pa por skapa di e situashon di eksplotashon. E obligashon òf menasa di parti di e eksplotadó por ta asina fuerte ku un víktima tin mester di ayudo.

Sa sosodé tambe ku víktimanan no ta konsiente di e echo ku nan ta den un situashon di eksplotashon, pasobra por ehèmpel nan no konosé nan derechonan komo trahadó na Hulanda Karibense.

Rekonosé e señalnan di trafikashon/kontrabanda di hende

Víktimanan den situashonnan di eksplotashon hopi bia ta mustra sierto karakterístikanan. Asina por ehèmpel un persona posiblemente por ta víktima di eksplotashon si:

E mester hasi trabou peligroso i ku no ta saludabel;
E tin dianan largu di trabou;
E ta risibí muchu tiki pago, no ta haña pago òf mester warda largu riba su pago;
E no por disponé di su propio pasport;
A tres’é Hulanda Karibense bou di promesanan falsu;
Ta maltrat’é, chantagi’é, fòrs’é òf menas’é;
E mester paga un debe grandi na e dunadó di trabou;
E no por disponé di e plaka riba su propio kuenta di banko;
Ta pag’é bou di mesa, òf no ta sigur’é kontra por ehèmpel aksidente;
E ta biba den un edifisio di kompania òf riba tereno di kompania, òf di otro manera ku ta mal alohá;
E no ta na altura di su adrès unda e ta keda;
Di otro formanan ta pone preshon riba dje.
Ta oblig’é pa tin sèks kontra su boluntat.
Ta oblig’é pa hasi sèks kontra pago, kaminda e mester entregá e plaka.

Mayoria bia ora ta trata di trafikashon di hende ta bai pa un kombinashon di diferente señal.

Protekshon

Inspekshon di labor ta traha estrecho ku polis, KMAR, e departamentu di supervishon i mantenshon.

Inspekshon di labor ta outorisá pa hasi inspekshon den kompanianan sin aviso. E dunadó di trabou i su empleadonan ta obligá di koperá ku esaki.

Tin bia e inspekshon ta tuma lugá relashoná ku un aksidente òf un keho. Pero ta hasi inspekshon tambe den kuadro di proyektonan di inspekshon. E ora ei ta inspektá diferente kompania den un sektor pa inventarisá tendensia- i problemanan den un sektor.

Pa sòru ku ta mèldu kasonan di trafikashon di hende mas tantu posibel, a hasi diferente palabrashon al respekto. Ora ku mèldu víktimanan, protekshon di privasidat ta di gran importansia. Ora di tuma datonan personal den kaso ku mèldu víktimanan, tin diferente kuadro legal na vigor tambe e ora ei.

Pero rekonosé trafikashon di hende no ta dje evidente ei tur ora. Pa e motibu ei tin e asina yamá ‘Themaregister’. Den esaki por registrá notifikashonnan. Por ehèmpel si ta nota ku un persona ta tímido i ta aktua sumiso i ta evitá kontakto ku hende. Por ta ku un persona gewon gusta su privasidat, òf no ta sinti su mes bon na e momentu ei, pero si tin mas señalnan partikular, posiblemente por ta algu otro tambe. Ta rekerí un grado haltu di alerta di parti di e instansianan konserní. E bista pa hustamente kapta situashonnan ku aparentemente no ta hala atenshon, finalmente por resultá den un kaso di trafikashon òf kontrabanda di hende.

‘Ta te ora a saka mi for di e situashon, mi a realisá kon inhumano e tabata ta. Na promé instante mi tabatin miedu di polis, pero nan a yuda mi di bèrdat’

Haz clic aquí para el folleto en español.

Vidio trafikashon di hende

Trafikashon di hende konosé diferente forma. Nos a trese algun na bista den e videonan mas abou. Klek riba e lenk pa wak e vidio.