Detektor di huma

Ta prudente pa kologá un detektor di huma riba e ruta di eskape pa bai pafó. Mihó ainda ta pa kologá detektornan di huma den tur kamber i den espasionan kaminda un kandela por originá. Tin un par di asuntu ku ta importante ora ta bai kologá un detektor di huma:

• Kologá e detektor di huma na plafòn. Huma i kayente ta bai laira i plama kontra e plafòn.
• Pone esaki minimal 50 cm di un muraya òf huki i no kaminda tin sirkulashon di aire òf den besindario di ventilashon mekániko
• Si bo kas tin diferente piso, e ora ei kologá por lo ménos un detektor di huma riba kada piso.
• Ta prudente pa kologá detektornan di huma den diferente espasio.

Detektornan di huma ta reakshoná riba huma òf kayente, pa medio di un sensor ku ta traha riba radiashon. Si stroba e señal, e detektor di huma ta aktivá. P’esei ta mihó pa no pone un detektor di huma na sierto sitionan, manera:

• Serka di un ventiladó òf un buraku di ventilashon
• Na lugánan ku korida di bientu
• Na sitionan unda tin hopi bapor/damp ta bai laira, manera den baño òf riba un aparato di kushiná òf mashin di laba tayó. Si den baño tin aparato ku por okashoná kandela, e ora ei pone un detektor di huma pafó di e baño na minimal 50 cm di distansia di e porta di baño.

Pa motibu ku sierto detektornan di huma por aktivá tambe ora hopi stòf bai riba e sensor, ta importante pa mantené esaki limpi. Si muchu stòf akumulá den e detektor, e no por funshoná bon mas. Pa e motibu ei kita stòf for di riba detektor regularmente, por ehèmpel ora bo ta tèst e detektor di huma òf kambia e bateria.

Test mensualmente si e detektor di huma ta traha ainda. Mayoria bia tin un boton di tèst riba e detektor di huma. Por yuda tambe si plania un momentu fiho pa tèst, por ehèmpel kada bes riba e promé djaluna di luna.

E bateria di mayoria detektor di huma ta dura promedio un aña. Tin detektornan di huma tambe ku ta traha riba bateria di lithium, esaki nan por dura te asta 10 aña. Tep: pega un steker riba e detektor ku e fecha ku mester remplasá e bateria atrobe. Di e manera ei bo sa presis ki dia ta e último bia ku a remplasá e bateria. Si e bateria a baha kasi kompletu, bo ta tende kada minüt un pip. Bo por tuma tambe un fecha fiho pa remplasá e bateria di bo detektor di huma.

Ora e detektor di huma aktivá, esaki ta nifiká ku a detektá huma. P’esei ta importante pa tur hende sali pafó mas pronto posibel i ku ta hiba nan na un lugá seif.

Bo por kumpra un detektor di huma na un warehouse òf un pakus di elektrónika.