Kaminda di emergensia den kas

Den un situashon di emergensia ta difísil pa keda pensa lógiko. P’esei mayoria hende den kaso di kandela no ta kapas pa tuma e desishonnan korekto mesora. Un plan di huida por yuda den esaki. Si bo a prepará un bon plan di huida, e chèns ta muchu mas grandi ku abo i bo hendenan di kas por sali seif den e par di minüt ei. Un bon plan di huida ta deskribí konkretamente kiko mester hasi ora tin kandela òf otro kalamidat. Akibou bo ta haña algun tep útil i punto importante ku bo por inkluí den un plan di huida.

• Skohe e ruta (sin opstákulo) mas sigur: Paga tinu: e ruta mas rápido no nesesariamente ta esun di mas sigur! Sòru p’esei pa un ruta di emergensia ku tin ménos opstákulo posibel.
• Traha un repartishon di tarea: Traha un repartishon di tarea huntu ku e otro habitantenan. Ken ta sòru pa e muchanan sali pafó? Ken ta bai ku e maskotanan? Sòru pa tur hende sa kiko su responsabilidat ta den kaso di un kalamidat.
• Palabrá un sitio pa topa otro: Palabrá ku tur kompañero di kas un lugá seif kaminda boso ta topa otro pafó. Asina bo tin un bista rápido ken falta i kisas ta paden ainda.

Traha un plan di huida ta bon, pero mes importante ta pa trein e plan. Ora trein e plan di huida regularmente, e hendenan ta kustumbrá ku nan papel den e proseso i ku e kamindanan di emergensia. Esaki ta oumentá e chèns ku tur hende ta tene nan mes na e plan di huida den kaso di kandela. Ora di kandela ta forma hopi huma di manera ku bo ta mira maha poko te nada, trein e plan p’esei un bia tambe ku wowo será.

Kandela por kuminsá diripiente i plama rápido. P’esei ta hopi importante pa aktua rápido. Pero kiko ta importante awor pa hasi den kaso di kandela, aparte di pèrkurá pa alehá bo mas rápido posibel?

• Keda trankil i spièrta kompañeronan di kas: Aktua rápido ta importante, pero pániko nunka no ta yuda den un krísis. Informá bo hendenan di kas di e kandela i unda esaki ta tumando lugá.
• Bandoná e kas via e ruta mas seif: Bandoná e kas via e ruta ku bo a stipulá den e plan di huida i reuní pafó na e sitio palabrá.
• Sera benta i porta si ta posibel: Ora sera bentana i porta bo ta prevení ku e kandela ta plama fásil den diferente espasio.
• Keda abou na suela: Huma i kalor ta bai haltu. Si bo keda na suela bo tin mihó bista i bo ta evitá ku bo ta inhalá huma.
• Yama 911: Ora tur hende ta pafó na e sitio palabrá, yama e servisionan di emergensia. Deskribí mas kla posibel unda bo ta, unda e kandela ta i si tin víktima.

Mas tep pa un plan di huida:

• Pone e yabi di kas na un sitio fiho: Tin hende ku ta sera porta di kas na yabi, partikularmente anochi. P’esei sòru semper ku por haña e yabi di kas fásil, di manera ku bo por sali pafó rápido.
• Instalá un detektor di huma: Detektor di huma ta bati alarma ora nan detektá huma. Esaki hopi bia ta sosodé promé ku abo mes por mira òf hole e huma, di e manera akí bo por sali na tempu for di e kas. Primi aki pa mas informashon tokante detektor di huma.
• Medionan pa paga kandela: Hopi bia bo mes por paga un kandela ku kaba di kuminsá den bo kas. Esaki ta solamente posibel, ora bo ta bon prepará i si bo tin e medionan di paga kandela adekuado den kas. Primi aki pa mas informashon tokante medionan pa pega kandela den kas.
• Tene portanan den kas será: E menasa mas grandi den kaso di kandela hopi bia ta, ku ta produsí huma venenoso. Portanan será ta pèrkurá pa huma keda algun tempu pafó di e kamber kaminda ta biba.