Un kandela ku ta kuminsá den bo kas hopi bia bo mes por paga. Esaki por solamente ora bo ta bon prepará i tin e medionan korekto pa paga kandela den kas. Ademas ta importante pa sa kua medio sí bo por usa den sierto situashon, i kua netamente nò. Riba e página aki bo ta haña mas informashon tokante diferente medio pa paga kandela den kas i den kua situashon bo por usa nan.
Kandela den kas? Siguridat promé!
Ora bo mes ta paga kandela chikí den kas, ta importante pa semper tene kuenta ku bo mes siguridat i ku siguridat di otro habitante. P’esei paga un kandela bo mes solamente ora bo ta sigur ku bo por skapa sigur. Bo ta duda tokante esaki? No tuma niun riesgo e ora ei. Hui bai pafó i yama brantwer.
Aparato di paga kandela portátil
Tin diferente tipo di aparato di paga kandela na benta, di kua e kontenido ta varia. Tin aparato di paga kandela ku ta traha ku skuma, ku puiru di paga kandela, òf ku dióksido di karbon. Ta dependiendo di e tipo di kandela, tin diferente tipo di aparato di paga ku por rekomendá.
Aparato di fomait (ku ta spùit) ta mashá bon i apropiá pa paga kandela chikitu kousá pa supstansia sólido i líkido. Nan ta kousa tiki daño adishonal ora di paga, ta fásil pa operá i e kandela ta keda pagá (blusduur) mas largu ku aparato ku ta traha ku puiru.
Aparato di paga kandela ku puiru ta apropiá pa mayoria kandela den kas, outo, i boto. Ora di paga kandela ku aparato ku puiru, tuma un tiki distansia pa por paga efektivamente. Aparato di paga kandela ku puiru ta relativamente barata, pero tin algun desbentaha:
- E puiru den e aparato por forma klòmpi. Prevení esaki dor di bira e aparato tin bia.
- E puiru por hasi daño na aparato eléktriko i asina kousa kortosirkuito.
- E puiru ta difísil pa tira afó. Pa esaki, usa un stòfzùiger industrial, i nunka awa.
Por rekonosé un aparato di paga kandela ku dióksido di karbon na un silinder pretu na punta di e slan. E bentaha di e tipo di aparato di paga kandela aki ta ku e no ta laga ningun supstansia (skuma òf puiru) atras. Pa e motibu ei, e aparato ta mas apropiá pa paga aparato eléktriko i kandela den wea. Tene e aparato di paga kandela semper na e hèndel. Pasobra e parti ekstremo di e punta ta bira hopi friu (80 grado Celsius bou di sero), loke por kousa herida (di kemadura) ‘friu’. Tene kuidou si pa e peliger di sofoká, espesialmente den un espasio chikitu, pasobra e CO2 ta kore ku e oksígeno.
Un aparato di paga kandela bo ta usa den emergensia. Na e momentu ei no tin tempu di pèrdè; p’esei ta importante pa ta bon prepará. E siguiente puntonan ta parti di un bon preparashon:
- Warda un aparato di paga kandela na un lugá kaminda esaki ta fásil pa yega na dje den kaso di emergensia. Esaki por skapa tempu balioso!
- Ta huisioso pa buska pa sa adelantá kon e aparato di paga kandela ta traha. Lesa e instrukshon pa uso minusiosamente i laga bo hendenan di kas tambe hasi esaki. Tambe por haña hopi video di instrukshon riba internèt.
- Ora a usa un aparato di paga kandela, laga yen’é òf remplas’é. Asina bo ta sigur ku e aparato ta yen ora mester us’é atrobe.
- Den kaso di kandela, paga esaki ku stot. Esaki ta prevení ku ta supla òf spat líkido na kandela.
Si bo mester di un aparato di paga kandela pa uso spesífiko òf bo tin duda tokante kua tipo di aparato bo tin mester, laga brantwer informá bo. Pa esaki, yama +599 717 5600.
Deken pa paga kandela
Un deken pa paga kandela ta un deken trahá di faiberglas, lana impregná òf un otro material ku no ta pega kandela. Por kumpra esakinan na hardware (bouwmarkt).
Ora tapa un kandela chikitu ku un deken pa paga kandela, oksígeno no ta yega mas na e kandela, dor di kua e vlamnan ta paga. Lora e deken rònt di bo mannan i pon’e riba e fuente di e kandela òf riba e paña ku ta na kandela, òf lor’e rondó di e víktima. Un deken pa paga kandela ta apropiá pa usa un solo bia. Por usa un deken pa paga kandela ora di kandela chikitu manera un persona ku a pega kandela, kandela den un aparato di televishon òf un otro aparato eléktriko chikitu, òf kandela ora di un BBQ. Nunka usa un deken pa paga kandela pa un kandela ora di hasa kos òf zeta òf fèt ku ta na kandela!
Awa
Un slan pa muha mata por fungi bon komo aparato chikitu pa paga kandela. Pa kas di famia tambe por haña ròl spesial chikitu, ku fásilmente bo por konektá ku e pipa di awa. Aki ta importante pa e ròl òf e slan di muha mata ta largu sufisiente pa por yega na tur skina di e kas. Awa ta e mihó supstansia pa paga kandela di supstansia sólido manera palu, papel, tela i karton. Nunka usa awa pa paga zeta òf fèt ku ta na kandela ni kandela di aparato eléktriko ku ta den koriente!
Abo lo ke gana un deken pa paga kandela pa pone den bo kas? Esei ta posibel! Klek akinan pa partisipá na e quiz. Kisas e ora ei abo por gana un di e 10 dekennan pa paga kandela.
