Un di e kousanan di kandela den kas ku ta okurí mas tantu ta kòrtsluiting. Kòrtsluiting por tin diferente kousa, por ehèmpel uso robes di aparato eléktriko òf e málfunshonamentu òf sobrekarga di un kashi di fius òf di grupo eléktriko. Tambe waya di koriente mal isolá òf kontakto defekto por ta e kousa di kandela. Riba e página aki bo ta haña informashon kon kòrtsluiting ta okurí i kon hopi bia na un manera fásil bo por prevení kandela den kas pa motibu di kòrtsluiting.
Prevení kòrtsluiting
19-10-202100:00:45mp428 MB
DownloadBo sa kiko bo por hasi pa prevení korto sirkito?
Korto sirkito hopi bia ta kousa di kandela den kas i ta sosodé pa motibu di por ehèmpel uso inkorekto di stòpkontakt i kabel di ekstenshon....
...òf pa motibu ku no ta hasi bon mantenshon di aparato eléktriko.
Pa limitá chèns di kandela den kas por tuma algun medida simpel.
Sòru por ehèmpel pa konektá aparato na e manera adekuá
.. i paga aparato eléktriko ora no ta usa esaki.
Wak pa mas informashon tokante prevenshon di korto sirkito riba www.rijksdienstcn.com
Waya di koriente (mayoria bia) tin protekshon di un kapa di isolashon di material sintétiko òf di rùber. E kapa di isolashon por sufri daño di por ehèmpel awa, stòf, kalor i/òf sekura di e kapa di protekshon. Si e kapa di isolashon kibra, koriente for di e waya por kore bai na lugá kaminda e no mester ta. Esaki ta posibel ku kontakto direkto ku un otro waya òf aparato, pero tambe ku waya húmedo òf frus. Asina e poder di e koriente ta bira muchu haltu i e wayanan ta bira muchu kayente, loke por kousa kandela. Algun tep pa prevení kòrtsluiting via waya di koriente:
- Nunka no mishi ku waya di koriente sin kapa!
- Kontrolá regularmente si e kapa di protekshon di waya eléktriko den kas no ta kibrá. Kontrolá esaki tambe ora kumpra artíkulo di segunda mano.
- Nunka no laga waya kore bou di por ehèmpel porta, tapeit òf linolio, pa prevení ku nan ta daña.
- Nunka no usa waya di koriente pa kologá algu na djé.
- Semper tene e stèker ora bo ke sak’é for di e kontakto, no ranka e stèker na e waya.
- Pèrkurá pa nunka bo no klaba òf nit un waya di koriente.
- No lora waya di koriente muchu steif, pa evitá pa nan kibra òf daña.
Kas mayoria parti tin vários grupo di koriente. Kada grupo den e kas òf edifisio ta responsabel pa un parti di e suministro di koriente. Si muchu aparato pareu ranka koriente di un grupo, e grupo di koriente por bira sobrekargá. Den e kashi di meter tin fius ku ta suich den kaso di sobrekarga òf kòrtsluiting, pa evitá kandela. Tòg ta mihó si bo prevení ku un kòrtsluiting ta tuma lugá i ku e fiusnan ta bula. P’esei paga tinu riba lo siguiente:
- No konektá dimas aparato riba e mésun grupo di koriente. Si por ehèmpel bo usa e fòrnu, e microwave, e panchi di hasa eléktriko i e stof eléktriko pareu via un solo grupo di koriente, un kòrtsluiting por okurí.
- No pega vários waya di koriente tras di otro, pa evitá ku ta usa un solo grupo di koriente di mas.
- Konektá aparato ku ta usa hopi koriente direktamente na e stòpkòntakt en bes di usa un waya di ekstenshon òf un blòki di vários stèker.
Uso imprudente di aparato ta un kousa frekuente pa kòrtsluiting. P’esei promé ku bo usa un aparato eléktriko semper lesa e manual di uso promé. Bo por limitá e riesgo di kòrtsluiting òf kandela tambe si bo tene e aparato limpi. Pa sierto aparato tin konseho èkstra:
- Telefòn selular por bira kayente ora nan ta den e kargadó. P’esei nunka no pone un telefòn selular riba kama ora e ta karga. Saka e kargadó for di stòpkòntakt tambe ora e telefòn kaba di karga.
- Pèrkurá pa sufisiente ventilashon tras di bo frishidèr; no pone e aparato pegá kant’i muraya. Regularmente limpia e stòf na e parti patras, pa evitá kandela.
- Tin aparato ta generá kalor ora nan ta riba standby. P’esei semper ta mihó pa paga e aparatonan aki en bes di laga nan na standby. Esaki ta konta entre otro pa mashin di traha kòfi, televishon i computer.
- Usa un microwave solamente pa keinta kuminda òf kos di bebe. Hopi bia ta bini kandela ora usa un microwave robes.
Paga tinu: si tòg bo haña bo ku kòrtsluiting òf kandela den aparato eléktriko? E ora ei usa un deken spesial di paga kandela òf un aparato spesial pa paga kandela di dióksido di karbon. Klek aki pa mas informashon tokante medio pa paga kandela.
