Pregunta frekuentemente hasi tokante fam kombiná

Kiko ta e kantidat máksimo di nòmber ku por pasa?

Tin un máksimo di dos parti di nòmber na e areglo aki. Si persona ku tin un fam kombiná mes haña yu, pa e yunan aki tambe nan por skohe un total di maksimalmente dos parti di nòmber. E ora ei tin parti di nòmber ku lo vense pa yega na e fam kombiná.

Mi tin un famia kompuesto i pa tur yu mi ke skohe e mésun fam kombiná. Esaki ta posibel?

Nò esaki no ta posibel. Lei ta permití ku yu di e mesun mayornan ta haña e mesun fam. Pues pa yu di diferente mayor bo ta skohe diferente kombinashon di fam. Tin un eksepshon sí na vigor si ta trata di tutela. Bo por informá esaki serka un Entidat Públiko.

Mi ke duna mi yu 1 fam so, esaki ta posibel?

Bo no tin nodi di skohe un fam kombiná. 1 fam tambe ta posibel. E ora ei esaki ta e fam di esun mayor òf di e otro mayor. Tin biaha esei ta bai outomátikamente, tin biaha bo mester bai munisipio pa esaki. Puntra serka bo Entidat Públiko kiko e reglanan ta pa esaki. Lesa riba Rijksoverheid.nl òf riba e site di e munisipio kaminda bo ta biba kiko ta e reglanan pa esaki.

Ta posibel pa kambia e fam kombiná di mi yu despues?

Na Hulanda Karibense esaki no ta posibel ainda. Sí ta trahando pa hasi esaki posibel den futuro.

E areglo ta na vigor tambe ku forsa retroaktivo pa yu adoptá ku a nase despues di promé di yanüari 2016 i ku a adoptá promé ku di promé di yanüari 2024?

Sí. Bo por regla esaki serka e ámtenar di registro sivil. Ta posibel ku tin gastu konektá na esaki.

Kon ta pará ku yu ku a nase kaba promé ku promé di yanüari 2024 pero pa kua e mayornan ainda ke pidi un fam kombiná?

E areglo aki ta na vigor solamente pa yu ku a nase despues di promé di yanüari 2024 òf pa yu ku a nase despues di promé di yanüari 2016. Yu ku ta mas bieu lástimamente no por hasi uso di e areglo aki. Paga tinu: di e areglo pa yu ku a nase promé ku 2024 por hasi uso solamente si e yu mayó di e mayornan a nase riba òf despues di promé di yanüari 2016. E eskoho ta konta pa tur yu huntu.

E eskoho pa un fam kombiná tin influensia riba otro asuntu hurídiko, manera outoridat, nashonalidat òf petishon pa pasaporte pa e yu?

E eskoho pa un fam kombiná no ta nifiká ku un hende outomátikamente ta haña outoridat riba un yu. Si e yu tin un pasaporte, karchi di identidat òf Sedula kaba, e ora ei e dokumento aki no ta bálido mas. Pa biaha bo mester pidi un dokumento di identidat nobo, ku e fam nobo (kombiná). E gastunan pa esaki ta pa bo mes.

Ta pasa e eskoho pa un fam kombiná outomátikamente ora di nasementu di e yu, òf e mayornan mester pidi esaki aktivamente?

E mayornan huntu mester hasi e eskoho pa un fam kombiná serka e departamento di Asuntunan Sivil di e Entidat Públiko. Si e mayornan no skohe, serka un pareha kasá e yu outomátikamente ta haña e fam di e tata òf e mama duo. Si e mayornan no ta kasá e yu outomátikamente ta haña e fam di e mama. Si bo tin yu kaba e ora ei bo no tin nodi di skohe atrobe. E siguiente yunan ku boso tin huntu ta haña e mésun fam ku e promé yu di boso dos huntu.

Tambe mayor di yu ku a nase riba òf despues di promé di yanüari 2016 ku ke un fam kombiná pa nan yu(nan) ta hasi esaki huntu ku e departamento di Asuntunan Sivil di e Entidat Públiko.

E eskoho di un fam ta influensiá ken tin e outoridat?

Nò, e eskoho di un fam no tin nada di hasi ku tin òf haña outoridat.

Un di e mayornan tin un fam kombiná, manera un fam spañó òf portugues. Esaki ta konta pa un solo nòmber òf mi por pasa un parti di esaki?

E regla prinsipal ta ku hulandes tin un fam. Esaki por ta un fam dòbel. Hulandes ku por prueba ku nan fam ta un kombinashon di e nòmbernan di nan mayornan, serka e entidat públiko por pidi pa pasa un parti di esaki pa nan yunan.