Prolongashon di un Pèrmit di Estadia pa tempu definí
Si bo tin un Pèrmit di Estadia, e ora ei esaki ta bálido pa un tempu definí. Ora e durashon a ekspirá, bo mester bandoná Boneiru, Sint Eustatius òf Saba, en prinsipio dentro di kuater siman. Si bo ke prolongá bo estadia na e Entidatnan Públiko, nos ta avisá bo pa kuminsá e proseso di entregá un petishon pa prolongashon di e durashon, kuater luna promé ku ekspirashon di bo Pèrmit di Estadia.
Pa ken e formulario aki ta?
Personanan ku un Pèrmit di Estadia pa tempu definí pa kua e durashon ta terminá den poko tempu, pero ku ke prolongá nan estadia na e Entidatnan Públiko. Bo por usá e formulario aki solamente ora bo:
- tin un Pèrmit di Estadia pa tempu definí bálido na e momento aki riba e Entidatnan Públiko; i
- ke prolongá bo pèrmit pa e mesun meta di estadia; i
- no tin kambio den bo situashon ku tin konsekuensia pa bo derecho di estadia.
Di kon e formulario aki?
Ku e formulario aki bo por entrega un petishon pa prolongashon di e periodo di balides di bo Pèrmit di Estadia pa tempu definí.
Kua anekso mi mester agregá?
Banda di e formulario di petishon, bo mester entregá otro dokumento tambe i paga léges. Kua eseinan ta, ta dependé di bo situashon. E dokumentashon rekerí ta pará den e lista di dokumento riba e formulario di petishon. Sòru pa agregá tur kos. Solamente petishonnan kompleto ta wòrdu tuma den tratamentu.
Un deklarashon di kondukta (VOG), ta un di e dokumentonan ku ta rekerí pa e petishon pa un prolongashon di un Pèrmit di Residensia. IND ta hasi petishon pa e dokumento aki na Ministerio Públiko.
Ki ora mi mester entregá mi petishon?
Un petishon pa prolongashon di un Pèrmit di Estadia por wòrdu pidí kuater luna promé ku fecha di vensementu di e pèrmit koriente serka eIND Hulanda Karibense. No entregá un petishon si bo Pèrmit di Estadia ta mas ku kuater luna bálido ainda. Esaki por ta un motibu pa rechasá bo petishon. Tampoko no warda te e último momentu pa entregá bo Petishon pa Prolongashon.
Unda mi ta entregá mi formulario?
Bo por entregá bo petishon en persona na un di lokètnan di e IND-Unidat Hulanda Karibense. Pa esaki mester traha un sita (na tempu). Wak riba e página di kontakto, pa datonan di kontakto i oranan di apertura di tur ofisina di IND.
Kiko si mi petishon a wòrdu aprobá?
Si bo petishon a wòrdu aprobá, bo mester pasa na Burgerzaken pa renobá bo Sédula. Klik aki pa mas informashon tokante Burgerzaken Boneiru, Saba i Sint Eustatius. Paga tinu: bo ta sali for di e wèpsait di e Rijksdienst Caribisch Nederland.
Paga tinu!
Si bo tabatin un estadia sin interupshon di sinku aña òf mas dentro di Hulanda Karibense, bo por pidi un Pèrmit di Estadia pa tempu indefiní.