Adaptashon di klima

E lucha kontra awa (i kalor) ta kambiando. Na Hulanda Oropeo, pa hopi tempu e énfasis tabata partikularmente riba protekshon kontra laman. Dor di kambio klimátiko, awor mas i mas e awa tambe ta bini for di otro direkshonnan: via e riunan, dor di presipitashon fuerte, i for di abou dor di suela ku ta birando mas i mas brak den áreanan na kosta. Tambe, mas i mas nos ta enfrentando kalor ekstremo. Mas i mas, Hulanda Karibense ta enfrentando temperaturanan mas haltu, velosidatnan di bientu mas haltu, subida di nivel di laman, i orkannan di e kategoria di mas haltu. E retonan ta oumentando bastante, i e enkargo ta kambiando. P’esei, lo renobá e Strategia Nashonal pa Adaptashon Klimátiko (NAS) di 2016. E strategia nobo ku ta den konsepto awor, ta stipulá kiko ta nesesario pa un Hulanda resistente na klima; awor í den futuro.

E NAS nobo ta kontené, tantu pa Hulanda Oropeo komo pa Hulanda Karibense, un análisis mas profundo i un aserkamentu mas amplio pa tene Hulanda elástiko i resistente. Den e NAS nobo aki, tambe nos ta wak mas padilanti (pa 2100), nos ta demostrá ku karchinan di ruta ki opshonnan tin riba término korto, (mediano) i largu, i nos ta stipulá metanan mas konkreto pa bira resistente na klima. Finalmente, mester hasi eskohonan drástiko. Esei no ta konta solamente pa Gobièrnu Sentral, sino tambe pa gobièrnunan desentral, i otro organisashonnan. Den e NAS’26, a elaborá e base pa hasi e eskohonan drástiko ei, i a desaroyá metanan mas konkreto posibel. Dor di ta kla tokante nos ambishonnan i nos metanan di mehorashon pa resistensia na klima, nos ta invitá otro gobièrnunan, empresanan, organisashonnan sosial i siudadanonan pa nan tambe duna un aporte na esaki.

E Konsepto-NAS ta resultado di un kolaborashon estrecho entre e ministerionan di BZK, EZK, IenW, JenV, LVVN, OCW i VWS. Tambe tabatin hopi otro partidonan envolví ku kreashon di e Konsepto-NAS. Bo por lesa tokante esaki den e dokumento di fondo, un anekso di e konsepto di programa.

Tambe a traha un informe tokante efekto riba medio ambiente (planMER) pa e NAS. E informe aki ta splika e efektonan riba e medio ambiente, i tambe ta hasi otro efektonan riba e ambiente visibel. Tambe a stipulá un evaluashon adekuá. Akiden a tèst e posibel konsekuensianan di e eskohonan di maneho pa e áreanan Natura 2000.

Bo por relashoná awor riba e konsepto di programa Strategia Nashonal pa Adaptashon Klimátiko (NAS) i e informe korespondiente tokante efekto riba medio ambiente (planMER). Pa skibimentu di un punto di bista no tin reglanan fiho na vigor. Bo por hasi esaki di bo propio manera. Ademas, bo por reakshoná riba un di e siguiente preguntanan:

1. E Konsepto-NAS ta ofresé sufisiente klaridat tokante kiko ta nesesario pa un Hulanda resistente na klima, awor í den futuro?

2. E Konsepto-NAS ta ofresé sufisiente klaridat tokante loke Gobièrnu Sentral ta bai hasi?

3. E Konsepto-NAS ta ofresé sufisiente klaridat tokante loke otronan (manera gobièrnunan desentral, empresanan, organisashonnan sosial i siudadanonan) por hasi?

Por haña tur e dokumentonan for di djamars 9 di yüni te ku djaluna 20 di yüli 2026 di forma digital riba Platform Participatie. Ta trata di e konsepto di programa i e aneksonan, manera e informe tokante efekto riba medio ambiente i e dokumento di fondo kaminda a splika kon a krea e Konsepto-NAS.

A tradusí e Konsepto-NAS i e resúmen di e planMER na ingles. Ademas a tradusí e kapítulonan for di e Konsepto-NAS tokante Hulanda Karibense (Kapítulo 1, 2 i 5) i e resúmen di e planMER na papiamentu. Por haña e dokumentonan aki riba Platform Participatie i abou di e página aki.

Riba papel bo por wak e dokumentonan durante oranan di ofisina i solamente ku un sita serka Ministerio di Infrastruktura i Maneho di Awa (Ministerie van Infrastructuur en Waterstaat):

• Rijnstraat 8, Den Haag, telefòn: +3170 – 456 96 07

Por wak e dokumentonan tambe ku un sita (telefòn: +599 715 83 33) na ofisinanan di Rijksdienst Caribisch Nederland:

• Lokalidat Boneiru: Kaya Internashonal z/n, Kralendijk, Bonaire

• Lokalidat Saba: Matthew Levenstone road, The Bottom, Saba

• Lokalidat Sint Eustatius: Fort Oranjestraat z/n (Green & White Cove), Oranjestad

Tur hende por entregá un punto di bista tokante e Konsepto-NAS i e planMER di djamars 9 di yüni te ku djaluna 20 di yüli. Entrega di un punto di bista ta posibel di tres manera:

• Digital Si bo ta entregá un punto di bista for di Hulanda Oropeo, esaki ta posibel via e formulario riba e wèpsait di Platform Participatie. Bo ta prosedente di Hulanda Karibense òf di eksterior? E ora ei bo por manda bo punto di bista via e-mail pa info@platformparticipatie.nl.

• Verbal Pa laga nota bo punto di bista verbal, bo por traha un sita durante oranan di ofisina via e number di telefòn +3170 – 456 96 07 òf manda un e-mail pa info@platformparticipatie.nl.

• Via Pòst Ministerio di Infrastruktura i Maneho di Awa (Ministerie van Infrastructuur en Waterstaat), direktiva Partisipashon, bou di menshon di Strategia Nashonal pa Adaptashon Klimátiko, P.O. Box 20901, 2500 EX Den Haag òf pa un di e lokalidatnan menshoná ariba di Rijksdienst Caribisch Nederland.

Tambe lo presentá e Konsepto-NAS na e órganonan di gobernashon relevante, manera e Entidatnan Públiko, i na diferente konsehero legal. Ademas lo pidi konseho di e Komishon pa informe tokante efekto riba medio ambiente (Commissie mer) tokante e planMER.

Despues di e konsulta lo lesa tur e puntonan di bista ku a drenta bon. Nos lo usa e puntonan di bista, e reakshonnan di e órganonan di gobernashon i di konseheronan legal, i e konseho di e Komishon mer (Commissie mer) pa traha e NAS definitivo. Nos ta spera di publiká esaki na fin di 2026.

Den un Nota di Kontesta nos lo reakshoná riba e puntonan di bista, e reakshonnan, i e konsehonan, i nos lo indiká kon nan a influensiá e NAS aki. Nos lo publiká e Nota di Kontesta huntu ku e NAS definitivo. Si bo a entregá un punto di bista, lo bo haña un aviso ora e nota di reakshon ta disponibel, i ku a stipulá e programa. No ta posibel pa oponé kontra e programa.