Regulashon di medioambiente

Kiko esaki ta nifiká den práktika?

E kambio di lei aki ta konserní un kantidat di kompania grandi ku ta almasená òf trasbordá (produktonan di) (petroli) zeta. Pa e aktividatnan empresarial aki no ta e Kolegio Ehekutivo lo duna pèrmit di medioambiente mas, si no e minister di Infrastruktura i Medioambiente. Supervishon i mantenshon di regla pa ku e kompanianan aki tambe lo kai bou di e minister. Pa pregunta tokante pèrmit di medioambiente, supervishon i mantenshon riba e kompanianan aki di awor pa dilanti bo por aserká e ministerio di Infrastruktura i Medioambiente òf e representante di e ministerio na RCN. Den kaso di kalamidat (manera kandela) i e kombatimentu di esaki, e isla ta keda e punto di kontakto.

E Lei di bibienda públiko, planifikashon urbano i maneho di medioambiente BES

For di 10 di òktober 2010 e islanan BES ta asina yamá munisipionan spesial hulandes. Pa por realisá un maneho di medioambiente duradero na Bonaire, Sint Eustatius i Saba a stipulá e Wet vrom BES dia 22 di desèmber 2011. E lei aki ta duna un kuadro legal integrá riba tereno di medioambiente, planifikashon urbano, konstrukshon i bibienda, kual ta diseñá pa e islanan BES. E lei aki lo drenta na vigor den diferente fase. E partinan di e lei ku ta drenta na vigor for di 1 di aprel 2015 ta pèrkurá pa e maneho di aktividat di medioambiente pa sierto tipo di kompania ku e meta pa prevení òf limitá mas tantu posibel konsekuensia negativo pa e medioambiente.

E Dekreto di maneho di medio ambiente di organisashonnan grandi BES

Pa ku ehekushon di e Wet vrom BES a krea e Bgim BES. E Bgim BES ta regla entre otro:

• E instrukshon di sierto kategoria di organisashon (kompanianan) pa kua un obligashon di pèrmit ta aplikabel
• Ken ta e outoridat kompetente pa duna pèrmit, supervisá i hasi mantenshon
• E rekerimentunan na kua e petishon pa un pèrmit mester kumpli
• E reglanan ku kua e outoridat kompetente mester tene kuenta, ora di determiná e mihó téknikanan disponibel
• E instrukshon di aktividat pa kua mester krea un rapòrt di efektonan di medioambiente

Riba kua tipo di kompania e Bgim ta aplikabel?

Den e Bgim BES ta indiká sierto tipo di kompania pa kua e dekreto aki ta aplikabel. Ta trata di kompanianan ku ta almasená òf trasbordá petroli, produktonan di petroli òf karbon hidrógeno den forma líkido i ku tin un kapasidat di almasená 2.500 m³ òf mas. Kuater kompania na Bonaire i Sint Eustatius ta kai bou di e instrukshon aki, esta NuStar (Sint Eustatius), BOPEC (Bonaire) i dos filial di Curoil (Bonaire).

Kiko e kambio aki ta nifiká pa e tipo di kompanianan aki?

Den e Bgim BES ta stipulá ku e kompanianan aki mester tin un pèrmit di medioambiente pa por ehekutá nan aktividatnan di negoshi. Ku un pèrmit e outoridat kompetente ta duna outorisashon na kompanianan pa por ehekutá, bou di kondishon, sierto aktividat di negoshi ku por kousa konsekuensia negativo na e medioambiente. Anteriormente e kompanianan aki mester tabatin un pèrmit basá riba e Ordenansa di Molèster (Hinderverordening) lokal. Dor di e kambio den e lei aki e Ordenansa di Molèster ta kaduká pa e kompanianan aki i for di 1 di aprel 2015 nan mester kumpli ku e reglanan di medioambiente ku ta aplikabel, basá riba e Wet vrom BES i e Bgim BES.

Ademas e Bgim BES ta regla ku e minister di Infrastruktura i Medioambiente ta outorisá pa duna un pèrmit di medioambiente pa e tipo di kompanianan aki. Esaki ta nifiká ku, diferente na e Ordenansa di Molèster, e Kolegio Ehekutivo no ta outorisá mas. Tambe supervishon i mantenshon riba e kompanianan aki ta bai pa e minister. Den práktika ta ‘Rijkswaterstaat Zee en Delta’ ta responsabel pa dunamentu di pèrmit i e Inspekshon Habitabel i Transporte (Inspectie Leefbaarheid en Transport - ILT) pa supervishon i mantenshon. Di awor en adelante mester entregá petishon nobo òf un petishon pa kambio di un pèrmit eksistente serka e  minister di Infrastruktura i medioambiente (den práktika ‘Rijkswaterstaat Zee en Delta’). Pa asuntunan di mantenshon bo por aserká ILT. 

Mihó téknika disponibel

Den e Wet vrom BES a determiná ku denter di e kompanianan ta apliká e mihó téknikanan posibel. E Bgim BES ta stipulá ta kua ta e reglanan i kriterionan ku e outoridat kompetente mester tene kuenta kuné den determinashon di e mihó téknikanan disponibel pa e organisashon ku ta den proseso pa kalifiká. Den esaki entre otro ta tene kuenta ku e tipo di organisashon, e instalashonnan presente, e sirkunstansianan di medioambiente lokal i un tèrmino di introdukshon rasonabel. E obligashon (eksplísitamente legal) pa basa e pèrmit di medio ambiente riba e mihó téknikanan disponibel (beste beschikbare technieken - BBT) lo drenta na vigor na mes momentu ku e Bgim BES drenta na vigor. Esaki ta nifiká ku tur kompania ku ta kai bou di e Bgim BES mester kumpli ku e BBT.

Kiko ta sosodé ku e pèrmit di molèster eksistente?

Tur kuater kompania eksistente ku ta kai bou di e Bgim, tin un pèrmit aktual basá riba e Ordenansa di Molèster lokal. Mirando e derecho di transishon den e Bgim, ta klasifiká e pèrmitnan aki komo un pèrmit basá riba e Wet vrom BES. E ILT lo pèrkurá pa e kompanianan aki ehekutá nan aktividatnan di negoshi konforme e pèrmit.

Bo kier sa mas tokante e pèrmit di medioambiente aki?

Tuma kontakto ku e representante di e ministerio di Infrastruktura i Medioambiente na Rijksdienst Caribisch Nederland (RCN).
Telefòn: +599 715 8333
E-mail: info@rijksdienstcn.com