Asistensia ku edukashon personalisá
Tur mucha tin derechi di por krese na un manera seif. Pero, eduká un mucha por ta algu hopi difísil. Tin bes esaki no ta posibel i e ta krea problemanan ku ta stroba un mucha di desaroyá. Jeugdzorg por yuda solushoná e problemanan aki. Huntu nos ta buska e mihó manera pa apoyá un famia.
Nos ta asumí e forsa ku un famia tin i tambe e personanan rondó di e famia. Por ehèmpel, miembronan di famia òf amigunan. Personanan ku ta konfia mayor i mucha i ku tin deseo di yuda e famia. Jeugdzorg ta traha un plan huntu ku e famia i ta tuma medida ora esaki ta nesesario.
Ki ora Jeugdzorg por yuda?
- Si tin problemanan serio den edukashon di yu.
- Ora un mayor o mucha tin problemanan di komportashon.
- Ora un mayor tin problema dor di strès, muchu preshon òf pobresa.
- Ora mayornan tin problema di relashon òf ora nan bai for di otro.
- Si tin problema ku alkohòl òf droga den e famia. Serka mayor(nan) òf yu.
Profeshonalnan di Jeugdzorg
Un yu tin problema? E ora ei Jeugdzorg lo pone bo den kontakto ku un Profeshonal di Jeugdzorg. Esaki ta un persona ku tin hopi eksperensia ku guia pa famia. E Profeshonal di Jeugdzorg ta yuda famia ku tin problema kompleho. Pa asina un mucha por krese na un manera seif. E Profeshonal di Jeugdzorg ta sigurá ku tur hende por mantené nan mes na lokual a akordá. Ora nos ta traha ku un famia, semper nos ta hasi esaki ku un plan i un Profeshonal di Jeugdzorg. Na e momento ei, nos ta ofresé asistensia personalisá.
Pidi yudansa
Tin bes ta difísil pa sa si yudansa ta nesesario. I mester tin kurashi pa pidi un otro persona pa yudansa. Bo tin duda? No warda muchu largu, tuma kontakto ku Jeugdzorg. Den konsulta ku bo i bo famia, Jeugdzorg ta krea un plan. Huntu nos ta determiná kiko ta e mihó solushon.
Buska yudansa inmediato si tin lo siguiente den bo seno familiar:
- Violensia doméstiko
- Abusu
- Negligensia
- Abusu seksual
“Mi ta mira ku no ta bayendo bon ku mi yu muhé di 15 aña. Nos tin hopi problema den nos seno familiar. Dor di esaki e ta masha deskonektá. Mi ke yuda pero mi no sa kon. Mi mester di yudansa ku esaki."