Biba Bou di Guia

E proyekto biba bou di guia di Jeugdzorg, anualmente ta ofresé espasio na 9 pa 12 hóben di Boneiru, Sint Eustatius i Saba, entre e edatnan di 16 i 23 aña. E hóbennan aki ta den un trayekto di ayudo di Jeugdzorg durante un periodo largu i ta kla pa e siguiente paso pa haña mas independensia. E hóbennan aki no por bai kas bèk pasobra nan situashon na kas no a kambia, apesar di e apoyo di kuido riba término largu. Nan situashon na kas mayoria bes ta enserá un akumulashon di problema, pa kua e hóbennan aki no por konta ku sosten den e proseso di transishon di hóben pa adulto.

Guia intensivo

E ophetivo di e trayekto di biba bou di guia ta pa yuda hóbennan biba nan bidanan na un forma independiente den un periodo di dos aña. E guia aki ta dirigí riba  entre otro:

• oumentá outo-sufisiensia
• independensia
• kuido di nan mes
• siña abilidatnan sosial, di relashon i práktiko

E guia ta konektá na e asistensia eksistente di Jeugdzorg. A base di un plan di akshon personal, e hóbennan lo pasa den tres fase den e proseso di biba bou di guia. Kada fase tin ophetivonan di superashon personal i e guia ta adaptá na esakinan. E guia den e promé fase ta enfoká riba orientashon. Por ehèmpel, ta orientá e hóbennan pa bai skol i pa haña un trabou temporal. Den fase dos, e guia lo orientá riba ‘coaching’. E hóbennan lo haña un tayer tokante étika laboral i lo haña ‘coaching’ pa asina desaroyá un bon sentido di responsabilidat i bon étika laboral. Den e di tres fase, e guia lo enfoká riba asesoramentu/duna konseho. E hóbennan ta bai traha na un manera independiente i lo haña guia riba tópikonan ku nan lo por konfrontá na trabou.

Alohamentu i mudansa pa bibienda adekuá

Un proyekto piloto di dos aña pa biba bou di guia a start dia 15 di mart 2021. Den promé instansia, e fasilidat tabata situá den un kompleho di apartamento den Kaya Sabana na Boneiru. Huntu ku e asosiashon di konstrukshon di kas Fundashon Cas Bonairiano (FCB) a wak e posibilidat pa realisá un edifisio nobo pa kontinuá ku e proyekto den futuro. Entretantu a logra hasi esaki, i for di febrüari 2024, biba bou di guia ta situá den un edifisio nobo den Kaya Mendelssohn 20A.

Tin un palabrashon fiho ku FCB tokante mudansa pa un bibienda adekuá. Despues ku nan a pasa den e trayekto di biba bou di guia, lo asigná un bibienda na e hóbennan. Durante e trayekto, ya nan a traha riba nan independensia kaba, i awor nan ta kla pa biba riba nan mes. E hóbennan ta haña guia ambulante durante un periodo ku ta kuadra ku nan nesesidatnan, pa duna nan apoyo den e fase nobo aki.