Kuido di kriansa

No ta sin mas ta hasi uso di kuido di yu di kriansa. Mayoria famia ta haña asistensia na promé instante ora e mucha ta biba serka e mayornan ainda. Si esei no ta funshoná sufisiente i si desaroyo di/òf siguridat di e yu ta kore peliger, e ora ei por disidí ku e mucha ta bai biba (temporalmente) un otro kaminda.

Por hasi uso di kuido di yu di kriansa pa diferente motibu. Por ehèmpel pasobra edukashon a bira un retu pa e mayornan òf pa motibu di malesa. Pa e mucha – i tambe hopi bia pa e mayornan – e ora ei ta mihó si e mucha bai biba temporalmente serka un otro famia, òf pa e bai hospedá di bes en kuando serka un otro famia.

Tin diferente forma di kuido di yu di kriansa: pa tempu kòrtiku òf mas largu, , den wikènt i fakansi òf durante situashonnan di krísis. Kua forma di kuido di yu di kriansa ta hasi uso di dje, ta dependé di e situashon di e mucha i e famia ku e ta aden. Jeugdzorg ta buska un forma ku ta pas mihó pa e mucha. Kontakto ku e mayornan ta keda eksistí si esei ta posibel.

Komo mayor di kriansa abo mes ta disidí pa kua akohida abo ta skohe: wikènt, fakansi, akohida di durashon kòrtiku òf largu. Asina ta posibel tambe pa kombiná kuido di yu di kriansa ku bo sirkunstansianan di bida privá i trabou.

Komo mayor di kriansa bo ta duna un kas na muchanan ku ta biba den sirkunstansianan difísil. Tin bia pa un tempu kòrtiku, tin bia tambe pa algun luna òf mas largu. En prinsipio tur hende for di 21 aña por bira mayor di kriansa. Pero loke ta konta ta ku bo por ofresé un mucha struktura, amor i siguridat, pero tambe rèspèt pa su mayornan. Huntu ku nan, i guiá pa Kuido pa hóben (Jeugdzorg), bo ta sigui traha riba futuro di e mucha.

Tin algun kondishon ku mayornan di kriansa mester kumpli kuné:

• Bo ta minimal 21 aña di edat;
• Bo por presentá un Deklarashon tokante Kondukta (VOG) tur aña;
• Bo ta risibí di Voogdijraad CN un Deklarashon di no opheshon (VGB). Jeugdzorg ta hasi e petishon pa e deklarashon akí;
• Bo ta kooperá ku un ‘screening’ di parti di Jeugdzorg, ku ta konsistí di kombersashonnan informativo, entrevista i un bishita na kas;

• Bo ta indiká serka ken por pidi rekomendashon, por ehèmpel na skol si bo tin un yu ku ta na e skol básiko ei kaba, òf serka famia, amigu, dunadó di trabou etc. Ta diskutí e informashon ku e personanan di referensia ei duna semper ku bo.

• Bo ta sigui e training preparatiorio, ‘Stap Training’, pa mayornan di kriansa aspirante. E training akí ta dura tres parti di dia. Den e trainingnan akí bo ta siña mas tokante diferente tema ku tin di aber ku kuido di yu di kriansa, manera pasado i desaroyo di yunan di kriansa, pega na un persona, problemanan di komportashon i kontakto ku mayornan biológiko;
• Bo ta habrí pa kooperashon ku Jeugdzorg i ta ofresé sosten ora di ehekutá e plan di ayudo pa bo yu di kriansa.

“Mi ta mama di kriansa, pasobra nos muchanan ta nos futuro. Kada simia ku nos por planta den nan bida, lo duna bon fruta. Tin momento ta mas difísil ku otro, debí na loke mi yu di kriansa a pasa aden. Pero ora mi mira e sonrisa riba su kara i mira ku e por ta su mes, mi ta kòrda pakiko mi ta hasi’é.”

Mayor di kriansa no ta pará na so, Jeugdzorg ta sostené mayornan di kriansa. E profeshonalnan di kuido di hóben ta traha huntu ku bo i e famia biológiko un plan di aserkamentu pa e mucha. E profeshonal di kuido di hóben ta e persona di kontakto tambe pa preguntanan tokante edukashon i ta sostené bo den asuntunan práktiko. Ora tin problemanan spesífiko un sikólogo di mucha òf sikiatra di mucha por duna guia spesialisá. Kada aña Jeugdzorg ta organisá entrenamentu- i enkuentronan pa mayornan di kriansa tambe, riba tópikonan aktual den kuido di yu di kriansa. Tres bia pa aña tin e asina yamá “Pleegzorgcafé” unda mayornan di kriansa por kompartí nan eksperensianan i haña konosementu nobo.

Kompensashon pa kuido di yu di kriansa
Komo mayor di kriansa bo tin gastunan èkstra. Pa e motibu ei bo ta risibí un kontribushon den gastunan pa kuido di un yu di kriansa. Ku e kompensashon akí bo mester paga tur gastu pa e yu di kriansa. Por ehèmpel pa artíkulonan di skol, kuminda i bibida, deporte, plaka pa gastunan chikitu (zakgeld) i fakansi. E altura di e kompensashon ta dependé di edat di e yu di kriansa.

“Mi ta un mayor di kriansa paso semper tin mas motibu pa sí hasi’é, ku pa no hasi’é. Tur mucha meresé oportunidat igual den bida i komo mayor di kriansa bo por hasi esei posibel.”

Bo ta ofresé un mucha un ambiente stabil i sigur
Ora saka un mucha for di su kas e ta algu drástiko pa tur mucha. Banda di esei yunan di kriansa hopi bia a pasa den tenshon òf situashonnan difísil i tabatin falta di atenshon pa loke ta trata edukashon. P’esei ta importante ku bo por ofresé un ambiente stabil i sigur, di manera ku e mucha ta sinti su mes sigur i protehá. Bo ta eduká sin ta spera algu en kambio.

Bo ta eduká un mucha sin hasié doló
Ta krusial ku bo no ta usa violensia físiko ni mental. Bo ta duna e mucha atenshon i amor i asina ta yuda e mucha kambia su komportashon. Yunan di kriansa hopi bia a sufri daño pa motibu di akontesimentunan difísil den nan bida. Ta sumamente importante pa kibra e sírkulo akí i sòru asina pa yunan di kriansa haña konfiansa (bèk) den adultonan i siña solushoná konfliktonan sin violensia verbal òf físiko.

Bo ta yuda un mucha desaroyá un perspektiva positive di su mes
Muchanan ku no por biba mas na kas mas, ta kuminsá hasi nan mes preguntanan. Ken mi ta eigenlijk? Serka ken mi ta pertenesé? Nan ta eksperensiá sentimentunan di pèrdida i luto. Tambe muchanan hopi bia ta kulpa nan mes pa e problemanan den nan famia òf pa e kolokashon pafó di kas. Bo mester por anda bon ku esaki i mester por yuda e mucha pa e sintié bon ku su mes. Jeugdzorg ta yuda bo ku esaki dor di ofresé entrenamentu i guia.

Bo ta habrí, positivo i kla den bo kontakto ku otronan
Komo mayor di kriansa bo ta mantené kontakto ku mayor-, famia-, maestro- i otro personanan den besindario di yu di kriansa. Tin bia ta personanan ku dor di nan eksperensia di bida, kultura òf balor- i normanan tin i ta mira asuntunan otro for di bo. Ta importante pa bo por anda bon ku esaki.

Bo ta kooperá bon i por kompartí paternidat
Komo mayor di kriansa bo ta kompartí edukashon ku e mayornan i famia. Tambe bo ta kompartí e kuido i planifikashon rondó di muchanan ku un profeshonal di Jeugdzorg i tin bia ku otro asistentenan sosial. Pa e mucha ta importante ku bo sa di kooperá bon ku tur partido.

Bo por kalkulá bon kua efekto paternidat di kriansa riba tin bo propio situashon
Duna kuido na un yu di kriansa tin influensia riba kada miembro di bo famia. Si bo mes tin yu, bo mester komparti por ehèmpel bo tempu riba bo propio yunan i e yu di kriansa.

"Mi ta mayor di kriansa pasó mi tabatin e sintimentu fuerte ku mi ke a kuida un mucha. E reto mas grandi ta komprondé e trouma ku e yu di kriansa a pasa aden. Esei ta rekerí pasenshi. Pero ora mi mira su konfiansa propio krese, i mi yu di kriansa ta sinti’é mihó, esei ta un gran rekompensa p’ami.”