Kolegio Disiplinario Médiko di Hulanda Karibense

Tarea di MTCN ta pa vigilá i promové bon kuido.  MTCN ta risibí un keho?  E ora ei e kolegio ta evaluá si e profeshonal di kuido, kontra ken a presentá e keho, a aktua konforme e normanan ku por spera di un profeshonal ku ta ehersé su profeshon di manera rasonabel.  E profeshonal di kuido mester funshoná na mesun nivel ku na Hulanda. Den su evaluashon, kolegio disiplinario ta tene kuenta ku loke ta posibel òf no ta posibel riba e isla.

Kada keho ku MTCN risibí, un kolegio ta evaluá esaki.. E kolegio ta konsistí di un presidente i dos miembro ku ta ehersé e mesun profeshon ku e profeshonal kontra ken a presentá e keho. Den kaso di kehonan kontra un partera, e kolegio ta konsistí di un hurista, un partera i un dòkter. MTCN ta purba semper pa sòru ku por lo ménos un di e miembronan ta bini di un otro isla Karibense.  E kolegio ta risibí asistensia di un sekretario, kual ta un hurista. E minister di Salú Públiko, Bienestar i Deporte na Hulanda ta nombra e miembronan di kolegio.

Durante e tratamentu di un keho, tantu e persona ku a presentá e keho komo e profeshonal kontra ken a present'é, ta haña oportunidat pa ekspresá nan punto di bista. E kolegio ta evaluá si e dunadó di kuido a aktua di un manera ku por konsider’é kulpabel i ta emití un desishon despues di a skucha e partidonan enbolbí.

Un prosedura ta kuminsá asina ku MTCN risibí un keho (karta di keho).  E sekretario di MTCN ta evaluá e keho. Si tin algu ku no ta kla, e sekretario ta pidi mas splikashon. Si e keho ta kla,  e sekretario ta manda un kopia pa e profeshonal di kuido.  E profeshonal di kuido semper ta haña oportunidat pa reakshoná por eskrito. Ta yamá esaki un apologia. 

Tratamentu

A risibí tur dokumento?  E ora ei tin e siguiente opshonnan pa kontinuá ku e prosedura:

• MTCN por invitá ámbos parti pa un investigashon preliminar verbal.  Generalmente, e presidente ta dirigí e kombersashon aki. Meta di e investigashon preliminar verbal ta pa optené mas informashon tokante e keho i defensa. Durante e investigashon preliminar verbal, ámbos parti por splika nan punto di bista. Tambe por hasi preguntanan na ámbos parti. Un otro meta di e kombersashon aki ta pa investigá si ta posibel pa e partinan yega na un akuerdo. Si logra esaki, por retirá e keho.
• MTCN ta tuma un desishon tokante e kaso sin ku mester tin un seshon di tribunal.  Esaki por sosodé si MTCN konsiderá ku e persona ku a presentá e keho no tin outorisashon pa presentá un keho, òf si MTCN konsiderá ku ta evidente ku e keho no ta fundamentá.
• MTCN ta trata e kaso durante un seshon di tribunal.  Durante e seshon aki, tur parti ta haña oportunidat pa splika nan punto di bista. Despues di e seshon, ta sigui un desishon.

Desishon

MTCN por deklará un keho fundá òf no fundá.  Si deklará un keho fundá,  MTCN e ora ei por imponé un medida. Un medida ta un instrumento pa mehorá kalidat di kuido i su meta no ta pa kastigá. E medidanan posibel ta: un atvertensia, un reprenshon, un but, un suspenshon òf un prohibishon pa ehersé e profeshon. E kolegio no por otorgá kompensashon pa daño ni determiná responsabilidat hurídiko di un profeshonal di kuido.  Esaki ta sosodé mediante e proseduranan hudisial regular. 

Bo no ta di akuerdo ku un desishon?

Den sierto kaso, ta posibel pa apelá kontra di e desishon, bou di e título 'apelashon' bo por lesa kon e prosedura aki ta funshoná.

Bo ta konsiderá ku un profeshonal di kuido no a aktua di manera korekto?  Pensa, por ehèmpel, riba un diagnóstiko robes, violashon di sekreto profeshonal òf komportashon ku ta traspasá límitenan di loke ta aseptabel.  E ora ei bo por presentá un keho na MTCN. Un keho presentá por eskrito ta ser yamá un karta di keho. Bo por presentá un karta di keho solamente kontra un dòkter, dentista, botikario òf partera ku ta traha na Boneiru, Sint Eustatius òf Saba.

Kon bo ta presentá un keho?

Bo mester manda un karta di keho na MTCN tantu via meil komo pòst. Preferiblemente, skirbi e keho na Hulandes, pero bo por hasi esaki tambe na Ingles òf Papiamentu.
E datonan di kontakto ta medischtuchtcollegebes@minvws.nl i MTCN, Postbus 16437, 2500 BK Den Haag, Nederland.

Den e karta di keho bo mester inkluí e siguiente informashon:

• Bo nòmber i adrès;
• E funshon di e persona kontra ken bo ta presentá e keho;
• E nòmber i adrès di trabou di e persona kontra ken bo ta presentá e keho; relevante;
• Bo keho i e echo- i motibunan riba kua e keho ta basá. Splika esakinan mas tantu posibel, indikando fecha, echo i otro sirkunstansianan relevante;
• Bo firma.

Durante e prosedura, bo por pidi yudansa i konseho, por ehèmpel, di un miembro di famia òf un abogado. Nan por presentá un keho na bo nòmber. Si bo ta outorisá un persona ku no ta abogado pa representá bo, bo mester entregá un outorisashon por eskrito, firmá ku pèn. E dokumento aki mester indiká ku bo ta outorisá e persona ei pa presentá e keho na bo nòmber i pa representá bo durante e prosedura na MTCN.

Bo no tin outorisashon di e pashènt?

Bo ta presentá un keho tokante e tratamentu di un pashènt, pero bo no tin outorisashon di e pashènt?  E ora ei bo mester inkluí e siguiente informashon den e karta di keho:

• Nòmber, adrès i fecha di nasementu di e pashènt;
• Motibu pakiko e pashènt mes no ta presentá e keho;
• Ki relashon bo tin ku e pashènt;
• Ki interes bo tin den presentashon di e keho;
• Si ta posibel, e firma di e pashènt komo prueba ku e ta di akuerdo ku presentashon di e keho.

Kuantu ta kosta pa presentá un keho?

Presentashon di un keho na MTCN ta grátis.  E gastunan di asistensia hurídiko ta pa bo mes kuenta.  No ta obligatorio pa buska yudansa òf konseho hurídiko.  Bo por presentá bo keho bo mes i splik'é verbalmente durante e seshon di tribunal.

Un persona a presentá un keho kontra bo na MTCN?  E ora ei e sekretario di MTCN ta informá bo di esaki via pòst.  Den mayoria kaso, bo ta risibí un meil promé. Semper bo ta haña oportunidat pa reakshoná por eskrito riba e keho. Bo ta hasi esaki mediante un dokumento ku ta un apologia. E sekretario ta informá bo kon bo por presentá bo defensa. Bo por hasi esaki bo mes, pero bo por tambe pidi un otro persona pa hasi esaki na bo nòmber. Por ehèmpel, bo kompania di seguro di asistensia hurídiko òf un abogado. Si e persona ku bo ta outorisá pa representá bo no ta un abogado, ta nesesario pa bo entregá un outorisashon por eskrito.

Gastunan

E gastunan di asistensia hurídiko ta pa bo mes kuenta.  No ta obligatorio pa buska yudansa òf konseho hurídiko.

Bo no ta di akuerdo ku e desishon di MTCN? E ora ei bo por apelá kontra e desishon na Korte Komun di Hustisia di Aruba, Kòrsou, Sint Maarten i di Boneiru, Sint Eustatius i Saba. Den e kaso ei, bo ta pidi Korte pa evaluá e desishon di MTCN i emití un veredikto al respekto.  Pa apelá kontra e desishon, bo mester presentá un karta di apelashon.

Ken por apelá kontra un desishon?

• E persona kontra ken a presentá e keho por apelá si a deklará e keho (parsialmente) fundá i a imponé un medida.

• E persona ku a presentá e keho por apelá si:
  -   a deklará e keho inatmisibel;
  -   a rechasá e keho sin hasi mas investigashon;
  -  despues di investigashon, no a imponé ningun medida. 

Kon bo ta apelá kontra un desishon?

Bo ta hasi esaki dor di manda un karta di apelashon pa e sekretario di Korte Komun di Hustisia na Kòrsou. Bo mester hasi esaki denter di 30 dia despues ku MTCN a pronunsiá òf manda su desishon. Preferiblemente, bo ta skirbi e apelashon na hulandes, pero ingles òf papiamentu ta ser aseptá tambe.

Den e karta di apelashon bo mester inkluí e siguiente informashon:

• Bo nòmber i adrès;
• Kontra kua desishon bo ta apelá;
• E motibu di bo apelashon.  Esaki ta nifiká ku bo mester splika dikon bo ta apelá i kontra kua konklushon den e desishon bo apelashon ta dirigí;
• Bo firma

Kuantu ta kosta pa apelá kontra un desishon?

Presentashon di un apelashon na Korte Komun di Hustisia ta grátis.

Presentashon di un karta di defensa den apelashon

Si e otro parti a apelá kontra e desishon, Korte Komun di Hustisia ta manda bo e karta di apelashon.  Korte ta informá bo tambe kon bo por presentá bo defensa den e prosedura di apelashon. Bo por presentá bo defensa bo mes òf pidi un otro persona pa hasi esaki pa bo, por ehèmpel, un miembro di famia, bo kompania di seguro di asistensia hurídiko òf un abogado. Si e persona ku bo ta outorisá pa representá bo no ta un abogado, ta nesesario pa bo entregá un outorisashon por eskrito.

E gastunan di asistensia hurídiko ta pa bo mes kuenta. Tambebo por presentá un karta di apelashon òf bo defensa bo mes i splika bo punto di bista verbalmente durante e seshon di tribunal.