Pregunta frekuentemente hasi tokante e sistema di tarifa nobo pa Elektrisidat i Awa di bebe Boneiru

Aki bou bo ta haña e pregunta i kontestanan mas frekuentemente hasi tokante e sistema di tarifa nobo pa Elektrisidat i Awa di bebe Boneiru

Kiko ta bai kambia entrante promé di aprel 2018 na e tarifa di elektrisidat i awa di bebe?

Desde promé di aprel 2018 ta bin un tarifa fiho pa konsumo di elektrisidat i awa di bebe. Tambe ta bin un tarifa di konsumo variabel pa elektrisidat i awa di bebe. E tarifa di konsumo fiho ta kubri e gastunan di red. Ke men tuberia, mastnan di altu tenshon, transformatòrnan etc.

E tarifa di konsumo variabel ta e suma ku bo ta paga pa e konsumo, ke men pa e kantidat di kilowatt i e kantidat di meter kúbiko di awa di bebe ku e kliente a konsumí.

Mi ta bai paga mas òf ménos entrante promé di aprel?

Esei ta dependé di e kantidat di elektrisidat i awa di bebe ku bo a uzá i e tipo di di konekshon ku bo tin.

Pa loke ta trata e konekshon di awa di bebe kasi tur hende tin e mesun tipo di konekshon. Pa loke ta trata elektrisidat si tin diferente kapasidat di konekshon. Mayoria di kas ta kai bou di e kategoria di 3,1 òf 4,4 KVA. KVA ta e midí di e kapasidat: e kantidat di elektrisidat (Kilo-Volt-Ampere) ku e konsumidó òf empresa por usa pareu (na mesun momentu). Ku e kas òf empresa realmente ta usa e kapasidat aki, no ta importante: e kapasidat aki a wòrdu determiná na momentu ku a kuminsá ku instalashon di e konekshon. Mas grandi e kapasidat di e konekshon ta, mas haltu e tarifa di konsumo fiho ta, ku e konsumidó òf empresa tin ku paga mensualmente. E tarifa variabel si ta ta igual pa tur hende. E tarifa variabel pa awa di bebe pa meter kúbiko tambe ta igual: e eskala aktual pa awa di bebe (ku un preis mas haltu pa meter kúbiko den kaso ku usa mas awa) ta disparsé pa promé di aprel próksimo. Lei no ta permití e eskala aki mas.

Kon mi por sa e kapasidat di mi konekshon?

Den luna di mart WEB lo pone tur konsumidó i empresa na altura di nan kapasidat di konekshon.

Ki mi tin ku hasi si mi kapasidat di konekshon no ta korekto?

WEB lo duna informashon tokante di e prosedimentu ku tin ku sigui den kaso ku ke kambia e kapasidat di konekshon.

Kiko ta bai pasa ku e tarifa di pagabon?

Un konsumidó ku tin pagabon no tin ku paga e tarifa di konsumo fiho. Pa motibu ku un usuario di pagabon tin ku kontribuí ku parti di e gastunan di red, e gastunan di red i depósito ya ta inkluí den e tarifa di pagabon. E usuario di pagabon ta paga un tarifa di konsumo variabel un tiki mas haltu ku e konsumidó ku tin un konekshon fiho. Pero, den kaso ku ta trata di un uso por medio di pagabon, e saldo di e tarifa ta igual

Ken ta determiná e tarifanan?

E entidat Autoriteit Consument & Markt (ACM, Outoridat Konsumidó i Merkado), ku ta un supervisor independiente, tin e tarea legal pa determiná tarifanan ku ta kubri e gastunan. ACM a hasi un kalkulashon di kuantu ta kosta pa produsí elektrisidat i awa di bebe. Tambe ACM a hasi un kalkulo di kuantu ta kosta pa entregá (distribuí) elektrisidat i awa di bebe na e konsumidó. E gastunan aki a wòrdu kombertí den diferente tarifa: e tarifa di konsumo fiho (pa por kubri e gastunan di distribushon i red) i e tarifa di konsumo variabel (pa kubri e gastunan di produkshon).

Kiko ta e diferensia pa ku e tarifanan ku WEB ta apliká aktualmente?

Elektrisidat

Te ku awor elektrisidat ta apliká solamente e tarifa variabel. Den e tarifa ei tur gastu di elektrisidat ta prosesá, inkluso e gastunan di red. Ora bo usa hopi koriente, bo ta paga na proporshon mas pa e red ku ora bo usa ménos. Esaki no ta hustu. E red ta pa tur hende i WEB ta hasi gastu pa por mantené esaki. E konsumidó ku no ta na Boneiru durante un par di luna por ehèmpel, pero tin un kas akinan, no ta paga nada ora e no ta na Boneiru. Tanten ku e red si tei ketu bai pa e konsumidó aki i ta wòrdu mantené dor di WEB. Ta p’esei a skohe pa den lei,  laga tur hende paga un sumo fiho pa luna pa e red.

Awa di bebe

Pa awa di bebe si ta eksistí e ‘vastrecht’ (derecho fiho) aktualmente. Aparte di esaki, aktualmente ta apliká un tarifa variabel, ku ta subi segun bo usa mas awa.

Pa promé di aprel 2018 lo apliká e mesun tarifa di konsumo variabel pa meter kúbiko, mensualmente pa tur konsumidó. E preis pa kub ya no ta dependé mas di e konsumo.

Banda di esaki tin (manera e ta awor) un tarifa di konsumo fiho pa e gastunan di red. Los di e dos tarifanan aki ta bin un tarifa pa awa di bebe pa trùk. Esei ta un tarifa pa kada un meter kúbiko di awa. E tarifa aki ta inkluí gastunan pa transporte di e trùk.

Dikon ta te ku promé di aprel e tarifanan ta bira vigente?

Meta di e Lei pa elektrisidat i awa di bebe BES, ta pa e provishon di elektrisidat i awa di bebe na Boneiru ta pagabel, konfiabel i duradero. Dor di e lei aki tantu e utilidatnan i WEB komo e konsumidó ta wòrdu protehé. Debí na e eskala chikí e instalashonnan ta sali relativamente karu. P’esei a pone supsidio disponibel pa tene e tarifanan pagabel. ACM ta konsiderá importante pa keda vigilá e efektonan di e tarifanan nobo. Ta p’esei ta importante pa duna e ministerionan envolví tempu pa por tuma e medidanan nesesario pa limitá e efektonan.

Ta pa e motibu aki e tarifanan nobo, stipulá pa ACM ta bira vigente te promé di aprel na Boneiru.

Ki dia ta anunsiá e tarifanan nobo?

ACM lo publiká e tarifanan maksimal ku a keda stipulá den e siman di 26 di febrüari. Seguidamente e ministerionan di I&W (Infrastruktura y Maneho di Awa) y EZK (Asuntonan Ekonómiko i Klima) en konsulta ku WEB lo anunsiá e medidanan supsidiario i kiko esaki ta nifiká pa e tarifanan ku WEB lo kobra e konsumidó i empresarionan.

Ta bin, meskos ku na Hulanda Oropeo, un suma fiho pa luna i despues e faktura di korekshon anual?

No. Konsumidónan ta keda risibí un kuenta di nan konsumo mensual i di e ‘vastrecht’ (derecho fiho). Un faktura final despues no ta obligatorio pa lei. WEB ta liber pa eventualmente introdusí esei. Pero den e kaso ei tambe e tarifanan stipulá pa ACM ta keda vigente: un tarifa di konsumo fiho mensual i un tarifa di konsumo variabel di e kantidat uzá na koriente òf awa di bebe.

Pakiko WEB a subi e tarifanan di elektrisidat pa promé di yanüari?

Tanten ku e tarifanan ku ACM a stipulá no drenta na vigor, WEB por adaptá e tarifanan. WEB por disidí esaki independientemente, despues di konsultá ku Entidat Públiko komo akshonista.

Dikon ta bai kambia e sistema di tarifa?

Riba promé di yüli 2016 e Lei elektrisidat i awa di bebe BES a bira vigente. Meta di e lei aki ta un suministro konfiabel, pagabel i duradero di awa di bebe i elektrisidat pa entre otro Boneiru.

E legislador ke logra e metanan aki dor di tarifanan basá riba gastunan. Esei ta nifiká ku e tarifanan ku e konsumidónan ta paga, ta basa riba e gastunan real di produkshon i distribushon.

E legislador a apuntá ACM, komo un entidat di supervishon independiente, pa kalkulá kiko ta e tarifanan máksimo ku WEB por kobra un konsumidó. E motibu ku a introdusí e sistema nobo di tarifa aki ta, pa ACM di un manera independiente, hasi un kalkulashon di e gastunan ku ta nesesario pa un empresa ta finansieramente stabil. Esaki ta na bienestar di Boneiru, paso di e manera aki WEB lo tin sufisiente entrada pa por mantené, invertí den e red i pa kumpra elektrisidat i awa di bebe pa e mes por produsí. Di otro un banda e stipulashon di e tarifanan máksimo hasí pa ACM ta sòru tambe ku WEB no por kobra e konsumidó mas ku e tarifanan máksimo (ku ta kubri e gastunan). Konsekuentemente e tarifanan di ACM ta protehé tantu WEB komo e konsumidó.

Tin manera pa suavisá e konsekuensianan finansiero negativo pa sierto grupo di hende?

Den e Lei elektrisidat i awa di bebe BES ta hasi menshon di algun posibilidat ku por limitá e konsekuensianan finansiero pa sierto grupo di kliente:

  • E ministerionan di Infrastruktura i Maneho di Awa (pa awa di bebe) i Asuntonan Ekonómiko i Klima (pa elektrisidat), por stipulá un tarifa di konsumo fiho mas abou pa sierto kategoria di kliente den un disposishon ministerial.
  • E ministerionan di Infrastruktura i Maneho di Awa (pa awa di bebe) i Asuntonan Ekonómiko i Klima (pa elektrisidat), por duna supsidio na sierto kategoria di kliente kual lo hiba na un tarifa konsumo fiho mas abou.   

Banda di esakinan tin otro posibilidatnan ku ta kai fuera di e Lei elektrisidat i awa di bebe BES. Ke men nan ta kai tambe fuera for di e stipulashon di tarifanan di ACM. Ta posibel ku WEB por disidí pa kobra sierto kategoria di kliente ménos ku e tarifanan máksimo ku ACM ta stipulá. Tambe tin e posibilidat ku e Entidat Públiko (Gerensia Komunidat i Kuido) hiba un maneho di apoyo sea riba su mes òf huntu ku Ministerio di Asuntunan Sosial.

Kiko ta un ‘kleinverbruiker’ (konsumidó chikí) i esaki ta relevante ainda?

E término ‘kleinverbruiker’ (konsumidó chikí) no ta relevante mas den e struktura nobo di tarifa. Kada un konsumidó òf empresa ta paga e mesun suma pa meter kúbiko di awa di bebe i pa kWh di elektrisidat konsumí (e tarifa di konsumo variabel). Sea e hende usa hopi òf tiki koriente òf awa di bebe, esaki no ta influensiá e suma pa kWh di elektrisidat òf meter kúbiko di awa di bebe. Klaru ku e suma total, di e konsumidó ku a usa mas elektrisidat òf awa di bebe, ta bai ta mas altu ku esun ku a usa ménos koriente òf awa di bebe.

Fuera di esaki tur hende ta paga un suma fiho (e tarifa di konsumo fiho) pa luna. E suma ta dependé di kapasidat di e konekshon: pa awa di bebe esaki ta meskos pa kasi tur konsumidó. Pa elektrisidat esaki por varia. Pronto lo inkluí algun ehèmpel di kalkulashon na e Pregunta & Kontestanan.

Wak tambe: Tarifnan Awa di bebe i Elektrisidat 2018