Elekshon di Konseho Insular 2019

Riba 20 di mart lo tin elekshon di Konseho Insular. Aki bo ta haña tur informashon ku mester pa bo por vota.

Ki dia tin elekshon?
Elekshon di Konseho Insular ta tuma lugá djarason 20 di mart 2019. Di mitar di 8 di mainta te 9’or di anochi bo por vota na kualke urna riba Boneiru.

Ken por vota?
Nashonalidat hulandes

Residente ku nashonalidat hulandes, tin mag di vota ora ku:

  • Riba dia di postulashon di e kandidatonan (4 di febrüari 2019) ta registrá komo residente di e entidat públiko.
  • i si riba dia di elekshon (20 di mart 2019) tin 18 aña di edat òf mas.

No tin nashonalidat hulandes
Residentenan ku no ta hulandes, por vota ora ku:

  • Ta biba legalmente den e entidat públiko
  • Riba 3 di febrüari 2019 (e dia promé ku postulashon di kandidato) mester ta registrá komo residente di e entidat públiko pa un periodo kontinuo di por lo ménos 5 aña.
  • Riba dia di postulashon (4 di februari 2019) ta registrá komo residente di entidat públiko.
  • Riba dia di elekshon (20 di mart 2019) e tin 18 aña di edat òf mas.

Tantu pa personanan ku nashonalidat hulandes, komo pa esnan no hulandes no mag di ta ekskluí for di e derecho di voto.

Entidat públiko ta konkluí ken tin derecho pa vota a base di datonan di Registro Sivil. Si bo ta registrá den e registro aki i ta kumpli ku e eksigenshanan menshoná aki riba, outomátikamente bo ta risibí un notifikashon (karchi di vota) pa e elekshon aki. Bo por tuma kontakto ku Kolegio Ehekutivo pa verifiká si bo ta registrá komo votadó. Si resultá ku esaki no ta e kaso apesar ku segun abo sí bo ta kumpli ku e eksigenshanan, bo por entregá un petishon pa revishon di bo registrashon komo persona ku derecho pa vota. Si bo ke hasi esaki, bo mester duna prueba for di kua por dedusí ku di bèrdat bo ta kumpli ku e kriterionan.

Klek aki pa mas informashon

Kiko bo mester bini kuné?
Pa vota bo mester bini ku un karchi di vota personal i un prueba di identifikashon bálido. Esaki por ta un pasport hulandes, un sédula òf un reibeweis di Entidat Públiko. Sin un prueba di identidat i karchi di vota bo no por vota.

Prueba di identifikashon kaduká?
Riba dia di elekshon bo prueba di identifikashon por ta vensí maksimal sinku aña i pues mester ta bálido te porloménos 21 di mart 2014. Bo prueba di identifikashon tin mas ku sinku aña ku el a vense dia di elekshon? Pidi un prueba di identifikashon nobo e ora ei na Registro Sivil.

Bo no tin un karchi di vota?

Tur hende ku por vota 20 di mart ta risibí un karchi di vota na kas. Bo no a risibí un karchi di vota? Bo a pèrdè e karchi di vota? Òf e karchi di vota ta kibrá? Pidi un karchi di vota nobo mas lihé posibel. Esaki por por eskrito te djabièrnè 15 di mart 2019. Òf pasa na Registro Sivil ku un prueba di identifikashon bálido. Esaki por te djamars 19 di mart 2019 pa mas tardá 12’or di mèrdia.

Unda tin urna?
Bo por vota na un di e urnanan menshoná aki bou.

Jong Bonaire

Kaya Libertador Simon Bolivar

Sentro di Bario Tera Kòrá

Kaya Monseigneur Niewindt

Klas na Kristu Bon

Wardador

Kaya Avelino J. Cecilia

Sentro di Bario Nikiboko

Kaya Pos di Amor

Sala di deporte Adventista

Kaya Ramona 8

Kompleho Deportivo

Jorge Nicolaas

Kaya Amsterdam

Sentro di Bario Nord Saliña

Kaya Cacique 9

Sociedad San Antonio

de Padua

Kaya Rincon 66

Tia Sani

Kaya Encarnacion B. Sint Jago

(Banda di pastorí Rincon)

Bo mes no por vota?
Bo mes no ta den posishon pa vota djarason 20 di mart? E ora ei bo por pidi un otro hende pa hasi esaki pa bo. Esaki por na dos manera simpel.

1) Apoderashon por eskrito
2) Apoderashon privá

Kon un apoderashon por eskrito ta funshoná?
Bo por duna un apoderashon por eskrito ora:

  • bo tin derecho pa vota;
  • bo sa ku riba dia di elekshon bo no ta alkansá pa bai vota personalmente;
  • bo no a risibí karchi di vota ainda;
  • bo no tin un dokumento di identifikashon;
  • bo sédula a kaduká mas ku 5 aña pasá.

Si bo ke hasi uso di un apoderashon por eskrito bo mester buska un formulario di petishon na Registro Sivil. Yena e formulario aki kompletu. Paga tinu pa riba e formulario aki tin bo firma i di e persona ku ta apoderá bo pa vota pe. Entregá e formulario kompletá aki pa mas tardá te djabièrnè 15 di mart 2019 na Registro Sivil. Nan lo sòru pa e apoderado por tuma e karchi di vota.

Kon e apoderashon privá ta funshoná?
Bo por duna un apoderashon privá ora:

  • bo tin derecho pa vota
  • bo sa ku riba dia di elekshon bo no ta alkansá pa bai vota personalmente
  • bo a risibí bo karchi di vota kaba
  • bo tin un dokumento di identifikashon bálido

Si bo ke usa un apoderashon privá yena patras di e karchi di vota. Den e kaso aki bo ta esun ku ta duna e poderashon i e persona ku ta bai vota pa bo ta e apoderado. Duna e apoderado bo karchi di vota i (un kopia di) bo prueba di identifikashon.

Importante:

  • Evitá máluso di bo dokumento di identifikashon. Riba e kopia di bo dokumento di identifikashon, skibi ku e ta solamente pa e elekshon aki i despues pidié bèk.
  • E persona ku ta vota na bo nòmber tambe mester biba na Boneiru i por hasi esaki solamente na momentu ku e ta depositá su mes voto.
  • Un apoderado tin mag di depositá un máksimo di dos voto na nòmber di otro hende.

 Atvertensia!

  • Duna un apoderashon solamente den kaso ku abo mes no por bai vota.
  • Lei elektoral ta prohibí kumpramentu òf bendementu di voto pa medio di regalo òf promesa pa duna un apoderashon.
  • E persona ku ta laga kumpra su voto tambe ta kastigabel pa lei.
  • Si un hende ta pone preshon riba bo pa duna un apoderashon, denunsiá esaki na outoridatnan mesora. Komo víktima e ora ei bo no ta kastigabel pa lei.

Kiko mi mester hasi den e kabina di vota?

  • Bo ta vota bo so. Bo no ta drenta e kabina di vota ku mas hende
  • Bo ta vota dor di yena e hòki dilanti nòmber di e kandidato ku bo ta vota p’é kompetamente ku koló kòrá
  • Bo a kometé un eror? Pidi un papel di vota nobo. Bo por hasi esaki un biaha so
  • Bo ta dobla sera e papel di vota di tal forma ku e lista no ta visibel
  • Bo ta depositá e papel di vota den e buzon

Paga tinu: den kaso ku bo tin derecho pa vota tantu den elekshon pa Konseho Insular komo  elekshon pa kolegio elektoral, bo ta risibí (na entrega di ámbos karchi di vota) dos papel di vota, esta, unu pa kada elekshon. Bo ta yena ámbos papel di vota den e kabina di vota i depositá kada unu den nan buzonnan destiná.

Mi por vota blanku?
Bo tin mag di vota blanku. Esaki bo ta hasi dor di no yena ningun hòki kòrá. Den e kaso ei e papel di vota ta keda kompletamente bashí. Si bo skibi òf pinta algu riba e papel tòg, bo voto no ta blanku pero imbálido!

Ki ora mi voto ta bálido?
Bo ta vota pa ún kandidato. Bo voto ta bálido ora bo kaba di yena e hòki di e kandidato di bo eskoho kompletamente ku koló kòrá, sin skibi ni pinta nada otro riba e papel di vota.

Mi voto ta sekreto?
Votashon ta sekreto. Bo no mester bisa niun hende pa ken ni pa kua partido bo a vota. Hende ku ta preshoná bo ta kastigabel pa lei. Si bo ta sinti bo mes preshoná òf menasá, denunsiá esaki na outoridatnan mesora.

Dikon bo mester vota?
Dor di vota abo ta disidí kon e konstelashon di Konseho Insular lo ta próksimo kuater aña. Bo voto tin influensia riba tumamentu di desishon di Konseho Insular i e futuro di bo isla. Riba djarason 20 di mart bo ta skohe e persona ku lo papia pa bo.

Mas informashon?
Bo ke mas informashon tokante e elekshon di Konseho Insular? Bishitá nos página di Facebook Island Council Elections 2019 òf www.bonairestemt.nl