Kolegio elektoral 2019

Riba djarason 20 di mart 2019 elekshon pa kolegio elektoral di Boneiru ta tuma lugá. Kolegionan elektoral pa Eerste Kamer na Hulanda Karibense ta órganonan di representante di pueblo ku, huntu ku miembronan di Parlamento Provinsial, por vota pa miembronan di Eerste Kamer. Eerste Kamer ta revisá i vota pa proposishonnan di lei ku ya Tweede Kamer a aseptá. Den Eerste i Tweede Kamer ta tuma desishon tokante di e tres entidatnan públiko. Ora ku influensiá e konstelashon di Eerste Kamer, (den forma indirekto) ta influensiá tambe e desishonnan ku ta tuma ei den.

Mi tin mag di vota?
Un persona tin derecho pa vota den e elekshon aki si e tin nashonalidat hulandes, si riba dia ku anunsiá e kandidatonan (4 di febrüari 2019) e ta registrá komo residente di entidat públiko i si riba dia di elekshon (20 di mart 2019) e tin 18 aña di edat òf mas. E no mag di ta ekskluí di e derecho di voto.

Na unda i ki ora mi por vota?
Bo por vota riba djárason 20 di mart 2019 di 7:30or di mainta te ku 9:00or di anochi na kualke urna di vota na Boneiru.

Lista di urna di vota na Boneiru

Jong Bonaire

Kaya Libertador Simon Bolivar

Sentro di Bario Tera Kòrá                

Kaya Monseigneur Niewindt

Klas na Kristu Bon Wardador 

Kaya Avelino J. Cecilia

Sentro di Bario Nikiboko      

Kaya Pos di Amor

Sentro di Bario Amboina      

Amboina

Sala di deporte Adventista

Kaya Ramona 8

Kompleho Deportivo Jorge Nicolaas

Kaya Amsterdam

Sentro di Bario Nort ‘i Saliña

Kaya Cacique 9

Sociedad San Antonio de Padua

Kaya Rincon 66

Tia Sani 

Kaya Encarnacion B. Sint Jago (banda di pastorí Rincon)

Kiko mi mester tin huntu ku mi pa mi por vota?
Pa por vota bo mester tin bo karchi di vota i un forma di identifikashon bálido huntu ku bo. Sea un sédula òf reibeweis di Boneiru òf bo pasport hulandes. Sin karchi di vota i prueba di identidat bálido bo no por vota!

Dokumento di identifikashon kaduká?
Pa por vota, bo dokumento di identifikashon no mag di a kaduká mas ku sinku aña promé ku dia di elekshon, esta, e mester tabata bálido te ku por lo ménos 21 di mart 2014. Si bo ripará promé ku elekshon ku bo dokumento di identifikashon a kaduká pa mas ku sinku aña, bo por apliká pa un nobo na Registro Sivil. Tene kuenta ku e tempu pa prosesá. Si bo ripará riba dia di elekshon ku bo dokumento di identifikashon a kaduká mas ku sinku aña, bo no por vota.

Kiko mi mester hasi si mi no tin un karchi di vota (mas)?
Kada persona ku derecho pa vota ta risibí su karchi di vota na kas. Bo no a risibí bo karchi di vota? Bo a pèrdè esaki? Òf el a kibra? Pidi un karchi di vota remplasante mas pronto posibel. Por hasi esaki por eskrito pa mas tardá djabièrnè 15 di mart, òf personalmente pa mas tardá djamars 19 di mart 12or di mèrdia. Pa hasi esaki, pasa na Registro Sivil ku un prueba di identidat bálido.

Kiko mi mester hasi si mi mes no por bai vota?
Si bo tin derecho pa vota i bo no ta alkansá pa bai vota personalmente riba e dia di elekshon, bo por laga un otro hende vota na bo nòmber ku un apoderashon. Bo por hasi esaki na dos manera:
•           un apoderashon por eskrito
•           un apoderashon privá
 
Apoderashon por eskrito

Bo por duna un apoderashon por eskrito ora:

  • bo tin derecho pa vota,
  • bo sa ku riba dia di elekshon bo no ta alkansá pa bai vota personalmente,
  • bo no a risibí karchi di vota ainda,
  • bo no tin un dokumento di identifikashon,
  • bo sédula a kaduká mas ku 5 aña pasá.

Si bo ke hasi uso di un apoderashon por eskrito, bo mester tuma un formulario na Registro Sivil. Yena esaki kompletamente. Paga tinu pa e formulario aki ta kontené bo mes firma i e firma di e persona apoderá. Entregá esaki pa mas tardá djabièrnè 15 di mart 2019 na Registro Sivil. Nan ta tuma kontakto ku e persona apoderá pa e bin tuma e karchi di vota.

Apoderashon privá
Bo por duna un apoderashon privá ora:

  • bo tin derecho pa vota,
  • bo sa ku riba dia di elekshon bo no ta alkansá pa bai vota personalmente,
  • bo a risibí bo karchi di vota kaba,
  • bo tin un dokumento di identifikashon bálido.

Un apoderashon privá bo por duna dor di yena i firma e formulario parti patras di bo karchi di vota. Di e forma aki bo a duna apoderashon. E persona ku ta bai vota pa bo ta e apoderado. Duna e persona ku bo ta apoderá bo karchi di vota i (un kopia di) bo dokumento di identifikashon. Esaki ta un eksigensia, si no e persona apoderá no por depositá bo voto.

Importante:

  • Evitá máluso di bo dokumento di identifikashon. Riba e kopia di bo dokumento di identifikashon, skibi ku e ta solamente pa e elekshon aki i despues pidié bèk.
  • E persona ku ta vota na bo nòmber tambe mester biba na Boneiru i por hasi esaki solamente na momentu ku e ta depositá su mes voto.
  • Un apoderado tin mag di depositá un máksimo di dos voto na nòmber di otro hende.

Atvertensia!

  • Duna un apoderashon solamente den kaso ku abo mes no por bai vota.
  • Lei elektoral ta prohibí kumpramentu òf bendementu di voto pa medio di regalo òf promesa pa duna un apoderashon.
  • E persona ku ta laga kumpra su voto tambe ta kastigabel pa lei.
  • Si un hende ta pone preshon riba bo pa duna un apoderashon, denunsiá esaki na outoridatnan mesora. Komo víktima e ora ei bo no ta kastigabel pa lei.

Kiko mi mester hasi den e kabina di vota?

  • Bo ta vota bo so. Bo no ta drenta e kabina di vota ku mas hende
  • Bo ta vota dor di yena e hòki dilanti nòmber di e kandidato ku bo ta vota p’é kompetamente ku koló kòrá
  • Bo a kometé un eror? Pidi un papel di vota nobo. Bo por hasi esaki un biaha so
  • Bo ta dobla sera e papel di vota di tal forma ku e lista no ta visibel
  • Bo ta depositá e papel di vota den e buzon ku koló korespondiente na e koló di e papel di vota.

Paga tinu: den kaso ku bo tin derecho pa vota tantu den elekshon pa Konseho Insular komo  elekshon pa kolegio elektoral, bo ta risibí (na entrega di ámbos karchi di vota) dos papel di vota, esta, unu pa kada elekshon. Bo ta yena ámbos papel di vota den e kabina di vota i depositá kada unu den nan buzonnan destiná. E buzonnan di elekshon di kolegio elektoral i Konseho Insular kada unu tin un otro koló ku ta korespondé ku e koló di kada un su papel di vota.

Mi por vota blanku?
Bo tin mag di vota blanku. Esaki bo ta hasi dor di no yena ningun hòki kòrá. Den e kaso ei e papel di vota ta keda kompletamente bashí. Si bo skibi òf pinta algu riba e papel tòg, bo voto no ta blanku pero imbálido!

Ki ora mi voto ta bálido?
Bo ta vota pa ún kandidato. Bo voto ta bálido ora bo kaba di yena e hòki di e kandidato di bo eskoho kompletamente ku koló kòrá, sin skibi ni pinta nada otro riba e papel di vota.

Mi voto ta sekreto?
Votashon ta sekreto. Bo no mester bisa niun hende pa ken ni pa kua partido bo a vota. Hende ku ta preshoná bo ta kastigabel pa lei. Si bo ta sinti bo mes preshoná òf menasá, denunsiá esaki na outoridatnan mesora.

Pakiko ta importante pa mi bai vota?
Den Tweede i Eerste Kamer ta tuma desishon tokante di e tres entidatnan públiko. Ora ku influensiá e konstelashon di Eerste Kamer, (den forma indirekto) ta influensiá tambe e desishonnan ku ta tuma ei den. Depositá bo voto 20 di Mart. Bai vota!

Mas informashon?
Bishitá e página di Facebook ‘Kiescolleges 2019’