Elekshon di Parlamento Oropeo 2019

Riba djaweps 23 di mei tin elekshon di Parlamento Oropeo. Bo por vota di mitar di 8 di mainta te 9’or di anochi na kualke urna na Boneiru.

1. Kiko ta Parlamento Oropeo?

Den Parlamento Oropeo ta tuma desishon importante tokante tópikonan manera turismo, kambio di klima i seguridat. Un biá den kada 5 aña ta skohe e miembronan Hulandes di Parlamento Oropeo. Dor di vota abo por determiná ken ta bai traha na bienestar di Reino.

2. Pa kiko mi ta vota den elekshon di Parlamento Oropeo?

Nos ta vota riba e representantenan Hulandes den Parlamento Oropeo. Durante elekshon di Parlamento Oropeo bo ta vota pa un miembro di un partido polítiko nashonal. Den Parlamento Oropeo e partidonan di e diferente ‘estadonan miembro’ ta forma un frakshon Oropeo. E frakshonnan aki no ta formá a base di nashonalidat pero a base di koló polítiko. E frakshon Oropeo ta mas ‘amplio’ ku e partidonan polítiko nashonal, pues diferente partido polítiko nashonal por kai bou di un frakshon Oropeo.

3. Mi mag vota?

Na Hulanda Karibense e siguiente personanan tin derecho di voto pa elekshon di Parlamento Oropeo: personanan ku nashonalidat Hulandes, ku tin 18 aña òf mas di edat i ku no ta ekskluí for di derecho di voto.

4. Kiko mi mester bai kuné pa vota?

Pa bo vota bo mester tin un prueba di identidat bálido. Esaki por ta un pasport Hulandes òf un sédula òf reibeweis di Entidat Públiko. Bo prueba di identidat no por a vense mas ku sinku aña pasá i mester ta bálido Por lo ménos te ku 24 di mei 2014. Bo prueba di identidat tin mas ku sinku aña ku el a vense? Buska unu nobo na Registro Sivil.

5. Unda tin urna?

Bo por vota na un di e urnanan menshoná aki bou.

Jong Bonaire

Kaya Libertador Simon Bolivar 16

Sento di Bario  Tera Cora                            

Kaya Monseigneur Niewindt

Sentro di Bario Nikiboko                              

Kaya Pos di Amor 44

Sporthal Adventista                                     

Kaya Ramona 8

Sentro di Bario Nort Saliña                          

Kaya Cacique 9

Lokaal Tia Sani

Kaya Encarnacion B. Sint Jago 10

Passangahran                                 

Plasa Reina Wilhelmina

Pa elekshon di Parlamento Oropeo, e votadó por pidi pa vota na kualke urna den e region kaminda e elekshon ta aplikabel (pues tantu na islanan di Hulanda Karibense komo na Hulanda Oropeo). Pa esaki mester pidi un karchi di vota dó. Registro Sivil tin un formulario pa esaki. Entregá e formulario ei mas tardá riba djaluna 20 di mei 2019, òf pidi un karchi di votadó na e lokèt mas tardá riba djárason 22 di mei 2019, te ku 12or di mèrdia.

6. Kon mi ta risibí mi karchi di vota?

Tur hende ku tin derecho di vota ta risibí un karchi di vota na kas. Bo no a risibí bo karchi di vota ainda? Òf bo karchi di vota ta kibrá òf bo a pèrdè esaki? E ora ei bo por pidi un karchi di vota nobo na Registro Sivil. Esaki por, por eskrito te ku djaluna 20 di mei i personalmente te ku djárason 22 di mei, pa mas tardá 12’or di mèrdia. Den ámbos kaso, riba presentashon di bo prueba di identidat bálido, bo ta tuma bo karchi di vota personalmente na Registro Sivil.

7. Kiko mi por hasi si mi mes no por bai vota?

Si bo mes no por bai vota riba 23 di mei bo por pidi un otro persona pa vota na bo nòmber pa medio di un apoderashon. Esaki por na dos manera.

Apoderashon por eskrito
Si bo ke hasi uso di un apoderashon por eskrito bo mester buska un formulario di petishon na Registro Sivil. Yena e formulario aki kompletu. Sòru pa tantu abo komo e persona ku bo ke apoderá firma e formulario i entregá esaki pa mas tardá djaluna 20 di mei personalmente na Registro Sivil. Nan ta informá e apoderado ki dia e por pasa buska e karchi di vota.

Apoderashon sekreto
Dor di yena e formulario ku tin patras di e karchi di vota bo ta esun ku ta duna un apoderashon i esun ku ta bai vota pa bo ta e apoderado. Bo ta duna e apoderado bo karchi di vota i un kopia di bo prueba di identidat.

Importante:

  • Evitá máluso di bo dokumento di identifikashon. Riba e kopia di bo dokumento di identifikashon, skibi ku e ta solamente pa e elekshon aki i despues pidié bèk.
  • E persona ku ta vota na bo nòmber tambe mester biba na Boneiru i por hasi esaki solamente na momentu ku e ta depositá su mes voto.
  • Un apoderado tin mag di depositá un máksimo di dos voto na nòmber di otro hende.

 Atvertensia!

  • Duna un apoderashon solamente den kaso ku abo mes no por bai vota.
  • Lei elektoral ta prohibí kumpramentu òf bendementu di voto pa medio di regalo òf promesa pa duna un apoderashon.
  • E persona ku ta laga kumpra su voto tambe ta kastigabel pa lei.
  • Si un hende ta pone preshon riba bo pa duna un apoderashon, denunsiá esaki na outoridatnan mesora. Komo víktima e ora ei bo no ta kastigabel pa lei.

8. Kiko mi mester hasi den e kabina di vota?

  • Bo ta vota bo so. Bo no ta drenta e kabina di vota ku mas hende
  • Bo ta vota dor di yena e hòki dilanti nòmber di e kandidato ku bo ta vota p’é kompetamente ku koló kòrá
  • Bo a kometé un eror? Pidi un papel di vota nobo. Bo por hasi esaki un biaha so
  • Bo ta dobla sera e papel di vota di tal forma ku e lista no ta visible
  • Bo ta depositá e papel di vota den e buzon

9. Mi por vota blanku?

Bo tin mag di vota blanku. Esaki bo ta hasi dor di no yena ningun hòki kòrá. Den e kaso ei e papel di vota ta keda kompletamente bashí. Si bo skibi òf pinta algu riba e papel tòg, bo voto no ta blanku pero imbálido!

10. Ki ora mi voto ta bálido?

Bo ta vota pa ún kandidato. Bo voto ta bálido ora bo kaba di yena e hòki di e kandidato di bo eskoho kompletamente ku koló kòrá, sin skibi ni pinta nada otro riba e papel di vota.

11. Mi voto ta sekreto?

Votashon ta sekreto. Bo no mester bisa niun hende pa ken ni pa kua partido bo a vota. Hende ku ta preshoná bo ta kastigabel pa lei. Si bo ta sinti bo mes preshoná òf menasá, denunsiá esaki na outoridatnan mesora.