Referèndem konsultativo

Dia 21 di mart ta tene na Hulanda Karibense i Hulanda Oropeo un referèndem konsultativo tokante Lei ku ta regardá e Lei di servisionan di inteligensia i di siguridat (e asina yamá Wet op de inlichtingen- en veiligheidsdiensten 2017 Wiv 2017).

Ora bo vota bo ta duna di konosé si bo ta pro òf kontra Wiv 2017,  parlamento i senado hulandes a aprobá e lei akí kaba.  

Dia 1 di sèptèmber 2017 un parti di Wet op de inlichtingen – en veiligheidsdiensten 2017, Wiv 2017, a drenta na vigor kaba. Ta trata e artíkulonan 1, 32 insiso 1, 33, 34, 35, 97, e di promé i e di dos insiso, 98, 99, 100, 101, 103, 104, 105, 106 i 170. A hasi uso di e posibilidat ku artíkulo 12 di Lei di  referèndem konsultativo ta duna pa laga e lei drenta (parsialmente) na vigor ora no por warda mas ku esaki.

Un referèndem ta duna votadó chèns pa duna di konosé  si nan ta pro òf kontra e lei. E karchi di vota tin e siguiente pregunta riba dje: “ Bo ta pro òf kontra Lei ku ta regardá serviso di informashon i servisio di siguridat 2017?”

E resultado no ta obligatorio, despues di un referèndem ta gobièrnu i parlamento ta disidí kiko nan ta hasi ku e resultado.

Lei ku ta regardá servisio di informashon i seguridat 2017

Bo por haña informashon tokante kontenido di Wiv 2017 riba website di Komishon di referèndem tin e tarea pa informá votadó tokante e leinan ku ta tópiko di un referèndem.

Na Hulanda Karibense ponementu na disposishon di e teksto di e lei ta tuma lugá na e ofisinanan di gobièrnu di Boneiru, Sint Eustatius i Saba. Einan por tira un bista den e teksto di e lei. Pero si bo no por òf no kier hasi uso di esei, e ora ei bo por pasa buska un kopia grátis di e lei na ofisina di gobièrnu.

Resultado

E referèndem ta bálido si aloménos 30 porshento di e kantidat di hende ku derecho di voto  a vota di forma bálido (esta pro, kontra òf blanko).

Kontinuashon

Si e referèndem ta bálido i mayoria di votadó ta pro, gobièrnu por laga sobrá di e artíkulonan di lei tambe drenta na vigor. Si mayoria di votadó ta kontra, e ora ei ta konsiderá resultado di e referèndem komo un konseho pa  rechasá e lei. E ora ei gobièrnu mester disidí mas pronto posibel si e ta entregá un proposishon di lei ku ta eksklusivamente destiná pa hala e lei aden. Gobièrnu mester notifiká parlamento i senado mas pronto posibel di su desishon.

Ken tin mag di vota

Tur siudadano ku pasaporte hulandes ku tin 18 aña òf ta mas bieu i ku no a kita derecho di voto di dje, tin mag di vota. Si bo tin derecho di voto, Entidat Públiko ta manda bo outomátikamente bo tarheta pa vota, esei ta bo invitashon pa bai vota. Si dos siman promé ku dia di vota (21 di mart 2018) bo no a haña tarheta di vota ainda, tuma kontakto e ora ei ku departamento di Asuntu Sivil. 

Unda i ki ora bo por vota

Dia 21 di mart bo por vota di 07:30 or te 21:00 or na tur urna di Entidat Públiko.

Urnanan di Entidatnan Públiko Hulanda Karibense:

Boneiru

  1. Jong Bonaire
  2. Sentro di bario  Tera Cora
  3. Sentro di bario Nikiboko
  4. Plasa Francisco (Chico) Goeloe in Entrejol
  5. Sentro di bario Nort Saliña
  6. Tia Sani, Rincon

Sint Eustatius

Mike van Putten Youth Center (konosi komo Lions Den).

Saba

The Sunny Valley Youth Center

Kiko bo mester pa por vota

Pa bo por vota bo mester bai ku bo tarheta pa vota i un prueba di identifikashon  bálido. Sea un pasport hulandes, sédula òf reibeweis. Sin bo tarheta pa vota i un identifikashon bálido bo no tin mag di vota! Bo tin mag di tin un identifikashon ku a vense pa un periodo máksimo di sinku aña ke men e mester ta bálido te aloménos 22 di mart di 2013. Si bo prueba di identifikashon tin mas ku sinku aña ku el a vense, pidi e ora ei mas pronto ku ta posibel un nobo na Asuntu Sivil (Census Office). Ta asina ku ta dura algun tempu promé ku bo por pasa buska e dokumento ku bo a pidi.

Kiko bo tin di hasi si bo no tin un tarheta bálido mas pa vota?

Tur hende ku derecho di voto ta haña un tarheta di vota na kas. Bo no a risibí e tarheta di vota? Bo a pèrdè esei? Of el a kibra? Pidi mas pronto ku ta posibel un tarheta di vota pa remplasá esun ku bo tabatin. Bo por hasi esei por eskrito te pa mas tardá djabièrnè 16 di mart 2018, òf bo por hasi esei personalmente na ofisina di Asuntu Sivil pa mas tardá djamars 20 di mart 2018 12:00 or, mustrando bo identifikashon bálido.

Apoderashon

  • Si bo mes no por vota: apoderá un hende
  • Bo por pidi un apoderashon por eskrito te pa mas tardá 16 di mart 2018 na Asuntu Sivil. Nan tin un formulario pa esaki.  
  • Bo por apoderá un hende tambe usando e parti patras di bo tarheta di vota. Fuera di e tarheta di vota bo mester duna e hende ku bo ta apoderá pa vota pa bo kopia di bo tarheta di identifikashon
  • Bo ta 21 di mart 2018 na Hulanda Oropeo i bo ke vota? Pidi e ora ei na Asuntu Sivil pa bo tarheta di vota. Por hasi esei por eskrito te pa mas tardá 16 di mart 2018 i personalmente te pa mas tardá 20 di mart 2018, 12:00 or. Ku un tarheta di vota bo por vota na tur urna.
  • Bo ta 21 di mart 2018 pa un tempu den eksterior por ehèmpel pa vakansi òf pa estudio i bo mes ke vota? Por hasi esei via karta. Bo mester a registrá bo mes pa mas tardá 21 di febrüari 2018 sí komo  “votadó via karta” serka alkalde na Den Haag. Bo por registrá via Kiezers buiten Nederland

Kon bo ta vota

Bo ta vota ku un lista di vota di papel i un pòtlot kòrá. Riba e lista di vota ta hasi bo e siguiente pregunta : Bo ta pro òf kontra  lei ku ta regardá serviso di informashon i servisio di seguridat 2017? Bo ta vota hasiendo e punta blanku serka e hòki “Pro” (parsialmente) kòrá  òf serka e hòki “Kontra”. Bo por keda sin yena nada tambe, e ora ei bo ta vota blanko. No skibi nada mas riba e lista di vota , bo por hasi bo voto inválido si bo skibi algu riba dje. Si pa deskuido bo a hasi bo lista di vota inválido, òf si bo a kibuká bo mes, e ora ei bo por pidi un biaha so un lista di vota nobo na e miembronan di urna di e lugá kaminda bo ta vota. 

Votamentu ta sekreto. E hòki pa vota mester ta posishoná i drechá di tal forma ku niun hende no por mira kiko bo ta vota. Ta solamente hende ku limitashon físiko ta haña ayudo den urna. Sobrá tur hende ta vota nan so. Despues ku bo a hasi bo eskoho, bo ta dobla e lista di vota di tal manera ku no por wak bo eskoho. Despues di esei bo ta deposit’é den e buzon.

Despues di votamentu

E urnanan ta sera 21:00 or. E lugánan kaminda por vota ta keda habrí pasobra votadó tin mag di ta presente ora miembro di urna ta konta e votonan. Públiko presente no tin mag di yuda konta.

Despues di konta voto presidente di urna ta partisipá na tur esnan presente e kantidat di voto kontá pa “pro,” “kontra,” “blanko,” i “inválido.” Kaba ta traha prosèsfèrbal i ta klousurá e seshon na urna.

Despues gezaghèber ta suma tur konteo di tur urna di Entidat Públiko i ta manda esei pa ofisina elektoral sentral na Boneiru. Ofisina elektoral sentral ta fiha djabièrnè 23 di mart 10:00 or durante un seshon públiko e total di voto na Boneiru, Sint Eustatius i Saba pa “pro”, “kontra”, “blanko”, i “inválido”. Ta duna e kantidatnan akí na Konseho elektoral.  Konseho elektoral ta  fiha mas pronto ku ta posibel den un seshon públiko resultado di referèndem pa Hulanda henter.