Elekshon pa Tweede Kamer 2025

Kiko ta Tweede Kamer?

Kada 4 aña - òf mas ora tin un elekshon despues ku gabinete kai - hulandes ku derecho di vota por vota ken ta representá nan den Tweede Kamer. Tweede Kamer huntu ku Eerste Kamer ta forma e parlamento hulandes. Tweede Kamer ta konsistí di 150 miembro. Nan ta representá pueblo hulandes, pues abo tambe!

E tareanan prinsipal di Tweede Kamer ta: kontrolá gobièrnu i traha leinan nobo. Ku esei e miembronan ta tuma desishon tokante tópikonan manera enseñansa, kuido, medio ambiente, impuesto, seguridat, ekonomia i mas. Pa medio di vota, huntu ku otro votadó, abo ta disidí kua ta e partidonan ku lo drenta Tweede Kamer. Asina bo ta influensiá toma di desishon pa e próksimo kuater añanan.

Mi por vota?

Bo por vota den elekshon di Tweede Kamer ora bo kumpli ku e siguiente kondishonnan:

• Bo tin 18 aña òf mas;
• Bo tin nashonalidat hulandes.
• Bo no ta ekskluí for di e derecho di voto;

Entidat Públiko ta dedusí derecho di voto for di atministrashon básiko di dato personal. Bo ta inkluí ei den i bo ta kumpli ku e eksigensianan ku tin pará akiriba? E ora ei, outomátikamente lo manda bo karchi di vota pa e elekshon pa bo.

Bo ke kontrolá si bo ta registrá komo votadó? Por hasi esaki na Kolegio Ehekutivo. A resultá ku bo no ta registrá komo votadó pero bo ta kere ku bo ta kumpli ku tur kondishon, sí? E ora ei bo por entregá un petishon pa revishon di bo registrashon komo votadó. Bo mester entregá prueba ku ta demostrá ku bo ta kumpli ku tur kondishon.

Na unda i ki ora mi por vota?

Riba djárason 22 di novèmber di 7:30 or di mainta te 9 or di anochi bo por vota na kualke urna na bo Entidat públiko.

Urnanan Boneiru

• Jong Bonaire, Kaya Libertador Simon Bolivar 16
• Sentro di Bario Tera Kòrá, Kaya Monseigneur Niewindt 51
• Sentro di bario “Nikiboko”, Kaya Pos di Amor
• Sentro di bario “Amboina”, Amboina
• Kompleho Deportivo J. Nicolaas, Kaya Amsterdam
• Sentro di bario “Nort di Saliña”, Kaya Cacique 9
• Sociedad San Antonio de Padua, Kaya Rincon 66

Pa mas informashon tokante votashon na Boneiru, bishitá Boneiru ta vota

Urna Sint Eustatius

• Ernest van Putten Youth Center (The Lions Den), Concordiaweg 24  

Urnanan Saba

• Eugenius Johnson Center, The Fort Road no. 13, Windwardside
• Sunny Valley Youth Center

Kiko mi mester bini kuné?

Bo ta bini ku:

• Bo karchi di vota personal
• Un prueba di identifikashon bálido

Bo no a risibí un karchi di vota? Òf bo a pèrdè esaki? Pidi un karchi di vota nobo mas pronto posibel. Pa mas tardá djabièrnè 24 di òktober bo por entregá un petishon por eskrito pa un karchi di vota supstituto. Pa mas tardá 12.00 or di mèrdia riba djamars 28 di òktober bo por hasi un petishon verbal pa un karchi di vota supstituto. Por hasi esaki na departamento di Registro Sivil di e Entidat Públiko.

Prueba di identifikashon bálido

Un prueba di identifikashon bálido ta un pasport hulandes, sédula òf reibeweis di e Entidat Públiko. Riba dia di elekshon, balides di e dokumentonan aki no por a vense mas ku un máksimo di 5 aña (bálido te 30 di òktober 2020). Si bo deskubrí promé ku elekshon ku bo prueba di identifikashon tin mas ku 5 aña ku el a vense, bo por pidi un prueba di identifikashon nobo na Registro Sivil. Den esaki tene kuenta ku e periodo pa prosesá bo petishon. Pues sea na tempu.

Si mi no por vota kiko awor?

Bo mes no por vota por ehèmpel pasobra bo ta malu òf bo ta ku fakansi den eksterior? E ora ei bo por pidi un otro hende pa vota na bo nòmber. Esaki yama apoderashon.

Importante

• Un votadó solamente por apoderá un otro hende ora e mes ke. Bo no por aserká otro votadó ku e petishon pa vota na nan nòmber. Esei yama reklutá apoderashon i esei ta kastigabel. Lei elektoral ta prohibí hende pa paga votadó ku regalo òf promesa pa duna nan un apoderashon.
• Pues si bo laga hende soborná bo konsientemente, bo ta kastigabel.
• Si un hende pone preshon riba bo pa duna nan un apoderashon, denunsiá esaki. Si nan obligá bo, bo ta un víktima i bo no ta kastigabel.

Dos manera pa pidi un otro hende pa vota na bo nòmber (apoderashon)

Tin 2 manera pa pidi un hende pa vota na bo nòmber:

1. via bo karchi di vota (apoderashon privá)
2. via un formulario di apoderashon (apoderashon por eskrito)

Bo mes por skohe ken bo ta apoderá. E persona ku ta vota na bo nòmber (e apoderadó) mester:

• tin derecho pa vota;
• biba riba mesun isla ku abo.
• vota na bo nòmber na momentu ku e ta depositá su mes voto.

1. Apoderá un hende via bo karchi di vota

Apoderá un hende via bo karchi di vota ta posibel por ehèmpel ora bo ta malu riba e dia ku bo ke vota. 

Apoderá un hende via bo karchi di vota ta bai asina:

• Bo ta yena e parti patras di bo karchi di vota. Hasi esaki huntu ku esun ku bo ke apoderá, e ora ei bo sa sigur ku bo ta apoderá e persona korekto. 
• Duna e apoderadó bo karchi di vota i un kopia di bo prueba di identifikashon. Esaki tambe por ta un potrèt di bo prueba di identifikashon fásil pa lesa riba un telefòn selular òf un tablet. 
• E apoderadó ta mustra e kopia di bo prueba di identifikashon na urna. E apoderadó mester mustra su propio prueba di identifikashon tambe. 
• E apoderadó por vota na bo nòmber solamente ora e ta depositá su mes voto. Un apoderadó por vota na nòmber di un máksimo di 2 otro persona.

2. Apoderá un hende via un formulario di apoderashon (apoderashon por eskrito)

Bo por apoderá un otro votadó pa vota na bo nòmber tambe via un formulario di apoderashon. Esaki yama un apoderashon por eskrito. 

Pa hasi esaki bo por buska un formulario ‘petishon pa vota ku apoderashon’ na Registro Sivil. Òf download e for di wèpsait di Entidat Públiko. Mester a entregá e formulario na Registro Sivil pa mas tardá riba djabièrnè 24 di òktober.

Bo por usa un apoderashon por eskrito por ehèmpel ora:

• bo no ta riba e isla riba e dia ku bo por vota. Por ehèmpel pasobra bo ta ku fakansi òf pasobra bo ta den eksterior pa motibu di trabou;
• bo no por duna un kopia di bo prueba di identifikashon. Por ehèmpel pasobra bo prueba di identifikashon a kaduká mas ku 5 aña pasá òf e tempu no ta yega pa pidi un prueba di identifikashon nobo.

E persona ku ta vota na bo nòmber (e apoderadó) mester:

• tin derecho pa vota;
• vota na bo nòmber na mes momentu ku e ta depositá su mes voto.

Apoderá un hende via un formulario di apoderashon ta bai asina:

• Abo i e persona ku ta bai vota na bo nòmber (e apoderadó) ta yena e formulario. Laga esun ku bo ke apoderá yena e formulario promé ku bo mes hasi esei. Asina bo sa sigur ku bo ta apoderá e persona korekto. Boso tur dos ta firma e formulario.
• Bo ta entregá e formulario pa mas tardá riba 24 di òktober na Registro Sivil.
• E apoderadó ta risibí un prueba di apoderashon ku e por usa pa vota na bo nòmber. Si Registro Sivil a aprobá e prueba di apoderashon, no por hala e prueba di apoderashon aden mas.
• E apoderadó ta bai urna ku e prueba di apoderashon por eskrito. Bo no mester dun’e un kopia di bo prueba di identifikashon. E apoderadó por vota na bo nòmber solamente ora e ta depositá su mes voto.

Paga tinu

• Prevení mal uso di bo prueba di identifikashon. Skibi riba e kopia ku esaki ta destiná únikamente pa uso ora di depositá bo voto ku apoderashon i pidi e kopia bek despues di e votamentu.
• Un apoderadó por vota pa un máksimo di 2 otro persona.
• Bo ke apoderá un hende, pero bo tin un limitashon ku ta pone ku bo no por buta bo firma? I den bo dokumento di identidat tin pará “no ta kapas pa firma”? E ora ei bo por apoderá un hende pa vota na bo nòmber sin firma. E ora ei bo no tin nodi di firma e apoderashon por eskrito òf e apoderashon via bo karchi di vota. E Entidat Públiko òf e urna ta kontrolá si e remarke ”no ta kapas pa firma” ta pará den bo dokumento di identidat tambe. Si esei ta e kaso, un otro hende por vota na bo nòmber.

Vota na urna

Na urna bo ta mustra bo karchi di vota i bo prueba di identifikashon. Si tur kos ta na òrdu, bo ta haña un papel di vota i un pòtlot kòrá. Bo ta drenta e kabina di vota ku nan. Bo ta hasi e rònchi dilanti di nòmber di e persona ku bo ke vota p’e kòrá. 

Dobla e papel di vota di tal forma ku niun hende no por mira bo eskoho. Despues bo ta hinka e papel di vota den e buzon.

Votashon ta sekreto. E kabinanan den e urna ta posishoná di tal forma ku niun hende no por mira pa ken bo ta vota. Ta prohibí pa drenta e kabina di vota ku mas persona. Solamente hende ku un limitashon físiko por haña ayudo den e kabina di vota.

Mi por vota blanku?

Bo no ke skohe un kandidato, pero sí hasi uso di bo derecho di vota? E ora ei bo por vota blanku. E ora ei bo ta bai urna sí, pero bo no ta skohe un kandidato.

Bo ta vota blanku dor di no hasi niun hòki kòrá ni tampoko pinta ni skibi nada riba e papel di vota. Pues e papel di vota ta keda kompletamente bashí.

Bo voto blanku solamente tin un nifikashon simbóliko i no tin niun influensia riba e repartishon di asiento. Pues un voto blanku òf un voto ku no a saka no ta bai pa e partido di mas grandi. Un voto blanku ta konta sí pa e asistensia na e elekshon.

Ki ora mi voto ta bálido?

Bo por skohe 1 kandidato riba e papel di vota dor di hasi e hòki en kestion kòrá. Si bo yena vários hòki òf pinta òf skibi algu riba e papel di vota debí na lokual hende por sa pa ken bo ta, bo papel di vota ta inbálido. Bo voto e ora ei solamente ta konta pa kalkulashon di e asistensia.

Bo a hasi bo papel di vota inbálido sin ke òf bo a kibuká? E ora ei bo por pidi e miembronan di e urna 1 bia pa un papel di vota nobo.

Mi voto ta sekreto?

E votashon ta sekreto. Bo no mester duna di konosé na niun hende pa ken òf pa kua partido bo a vota. Hende ku ta obligá bo pa hasi esaki ta kastigabel. Si bo ta sinti bo poné bou di preshon, bo por denunsiá esaki.

Bo mester di yudansa na momentu di vota?

Bo no por vota di forma independiente pa motibu di un limitashon físiko? E ora ei bo por haña asistensia den e kabina di vota. Por ehèmpel ora bo bista no ta bon òf bo ta siegu òf bo tin e malesa di Parkinson. Bo mes por bini ku un hende pa yuda bo òf pidi un miembro di urna pa duna asistensia.