Kolegio elektoral 2023

Kiko ta Eerste Kamer?
Na Hulanda Eerste Kamer ta forma huntu ku Tweede Kamer Staten- Generaal (Parlamento) di Hulanda. Eerste Kamer ta deliberá i vota riba proyektonan di lei ku Tweede Kamer ya a aprobá.

Ken ta eligí Eerste Kamer?
Eerste Kamer tin 75 asiento. Otro ku ta e kaso serka Tweede Kamer, e miembronan di Eerste Kamer no ta keda eligí dirèkt pa e pueblo hulandes. Kada kuater aña e miembronan di Parlamento Provinsial (Provinciale Staten) i, for di 2019, miembronan di e Kolegionan Elektoral pa Eerste Kamer na Hulanda Karibense (Saba, Sint Eustatius i Boneiru) i  for di 2023 tambe dor di kolegio elektoral pa votadonan Hulandes den eksterior ta eligí e miembronan di Eerste Kamer.

Kon largu e periodo pa miembronan di Eerste Kamer sinta ta?
Ta eligí e miembronan pa un periodo di kuater aña.

Kon Eerste Kamer ta, kompará ku Tweede Kamer?
Hulanda ta un demokrasia parlamentario. Esaki ta nifiká ku parlamento, na nòmber di pueblo, ta kontrolá gobièrnu i huntu ku gobièrnu ta traha lei. Tweede Kamer por entregá proyekto di lei, hasi kambio di lei i aprobá lei. Tratamentu di un proposishon di lei den parlamento por ta un proseso ku ta dura largu. Ta deseabel pa na final di e proseso, revisá e proposishon di lei un biaha mas na un manera krítiko. Eerste Kamer ta kumpli ku e tarea aki. E sistema di dos Kamer ta pone ku no ta tur poder ta konsentrá den un solo Kamer, ku ta posibel pa evaluá un proposishon i ku siudadanonan tin tempu pa yama atenshon pa nan posibel opheshon.

Dikon ta di importansia pa e 3 entidatnan públiko tin influensia riba konstelashon di Eerste Kamer?
Den Tweede i Eerste Kamer ta tuma desishon tokante di e tres entidatnan públiko ku ta konserní nan tambe. Ora ku influensiá e konstelashon di Eerste Kamer, den forma indirekto ta influensiá tambe e desishonnan ku ta tumá ei den.

Kiko kolegionan elektoral ta?
E kolegionan elektoral pa Eerste Kamer na Hulanda Karibense ta órganonan di representantenan di pueblo ku a eligí, i ku, huntu ku e miembronan di parlamento provinsial, ta permití pa vota pa elekshon di Eerste Kamer. E kolegionan elektoral di ningun manera no ta enbolbí den ehekushon di tareanan gubernamental di e entidat públiko. Nan tin e tarea eksklusivo di eligí miembronan di Eerste Kamer. Diferente for di loke ta e kaso serka Konseho Insular òf Parlamento Provinsial, un kolegio elektoral no ta un órgano di representashon general.

Dikon Bonaire, Sint Eustatius i Saba kada unu tin un kolegio elektoral apart?
Lei ta basá riba un kolegio elektoral pa kada entidat públiko Karibense. Esaki tin e siguiente benefisionan kompará ku un kolegio elektoral konhunto:

•  Votamentu pa kada entidat públiko separá ta tereno konosí pa e pueblo, konsiderando ku e ta similar na e manera riba kua e elekshonnan di konseho insular ta organisá;

•  Un kolegio elektoral mester reuní físikamente pa por vota pa miembronan di Eerste Kamer. Un kolegio elektoral pa kada isla ta evitá e nesesidat di biaha.

Kuantu hende lo haña asiento den e kolegionan elektoral?
E kantidat di miembro den e kolegio elektoral ta igual na e kantidat di miembronan di konseho insular. Esaki ta nifiká ku e kolegio elektoral di Sint Eustatius i Saba ta konsistí di 5 miembro i e kolegio elektoral di Bonaire di 9 miembro.

Kon largu e periodo ta pa miembronan di kolegio elektoral sinta?
E periodo pa un kolegio elektoral sinta ta mes largu ku e periodo ku Eerste Kamer ta sinta, pues kuater aña.

Ta posibel pa disolvé e kolegio elektoral promé ku e periodo kaba?
No ta posibel pa disolvé e kolegio elektoral promé ku e periodo kaba.

Ken ta presidente di e kolegio elektoral?
Na Boneiru i Saba Gezaghèber di e entidat públiko konserní ta presidente di e kolegio elektoral. Na Sint Eustatius esaki ta e Komisario di Gobièrnu Sentral. Nan  nó ta miembro di e kolegio elektoral ni nan no ta vota pa atmití miembro nobo pa forma parti di e kolegio elektoral. Tampoko e gezaghèbernan ni e Komisario di Gobiernu Sentral tin derecho di voto pa elekshon di miembronan di Eerste Kamer. Banda di nan ról komo presidente di kolegio elektoral, nan ta presidente tambe di di e urna elektoral sentral pa elekshon di e kolegio elektoral pa miembronan di Eerste Kamer.

Kuantu influensia e kolegionan elektoral tin riba Eerste Kamer?
E miembronan di Eerste Kamer ta keda eligí pa miembronan di parlamento provinsial i e kolegionan elektoral di Saba, Sint Eustatius i Boneiru i kolegio elektoral pa votadónan Hulandes biba den eksterior. Mas tantu habitante un miembro di parlamento provinsial ta representá, mas tantu su voto ta pisa. E balor di voto di e miembronan di e kolegio elektoral ta keda determiná pa e kantidat di habitante di e entidat públiko, dividí den un kantidat ku ta shen biaha e kantidat di miembro. Esaki ta nifiká ku e balor di voto, i konsekuentemente e influensia, na Bonaire ta un poko mas grandi ku esun na Sint Eustatius i Saba. Respektivamente 0,09 asiento, 0,01 asiento i 0,01 asiento. E influensia di Hulanda Karibense den su totalidat riba konstelashon di Eerste Kamer ta resultá den 0,11 asiento di Eerste Kamer.

Ku kua eksigensia mi mester kumpli pa mi por pone mi mes eligibel?
Pa miembresia di un kolegio elektoral siudadania hulandes ta nesesario. E persona mester ta residente di e entidat públiko, e mester a yega e edat di 18 aña i e no mester ta ekskluí di e derecho di voto. Un persona ta keda ekskluí di su derecho di voto den e siguiente kaso. Pa motibu di a kometé un delitu indiká den lei, el a
keda kondená pa un kastigu di prizòn di por lo ménos un aña i komo kastigu adishonal a keda ekskluí di su derecho di voto.

Pa evitá konflikto di interes, algun funshon ta inkompatibel ku miembresia di e kolegio elektoral. Na nivel di e entidat públiko ta trata di e funshonnan di: gezaghèber, miembro di e kontrolaria konhunto i e defensor di pueblo konhunto, òf miembro di e komishon di defensor di pueblo konhunto. E funshonnan di empleado públiko, diputado insular i miembro di konseho insular no ta ekskluí, pues ta permití pa kombiná nan ku miembresia di e kolegio elektoral.

Te ki dia mi por pone mi mes eligibel? 
Kandidatonan mester postulá nan mes dia 30 diyanüari 2023. Prome ku 19 di desèmber 2022 e partidonan polítiko mester ta registrá. Den kaso ku e indikashon di un grupo polítiko ya ta registrá pa elekshon di konseho insular, registrashon di indikashon pa elekshon di kolegio elektoral no ta nesesario.

Un individuo tambe por pone su mes eligibel? Òf e mester ta mará na un grupo polítiko?
Un kandidato individual tambe por partisipá na e elekshon di kolegio elektoral. Postulashon komo kandidato ta tuma lugá pa medio di un lista di kandidato. Riba e lista di kandidato por tin un “indikashon” (nòmber di un partido polítiko) poné (basta e indikashon ei ta registrá), pero esaki no tin mester. Esun ku partisipá sin un indikashon, ta partisipá ku un lista blanko, esta un lista bashí. Den e kaso ei riba e papel di vota tin pará solamente un number na e parti ariba di e lista, i no un indikashon /nòmber.

Miembro di e kolegio elektoral ta risibí un kompensashon?
Mirando e tarea limitá di e kolegio elektoral i e sirkunstansia ku ta solamente algun bes den kuater aña e kolegio ta reuní, lei no ta duna un base pa otorgá e miembronan di e kolegio elektoral un kompensashon fiho. Nan ta haña sí sèn di presensia i, si ta aplikabel, kompensashon pa gastunan di biahe. Mester determiná e kompensashonnan pa medio di un dekreto insular.

Miembro di un kolegio elektoral mester publiká nan funshonnan sekundario?
Pa promové integridat personal di e miembronan di e kolegio elektoral, nan ta obligá na publiká nan funshonnan sekundario. E publikamentu ta tuma lugá direktamente despues di nombramentu komo miembro di e kolegio elektoral òf despues di aseptashon di e funshon sekundario.

Miembro di un kolegio elektoral mester huramentá òf hasi un promesa?
Si, miembronan di un kolegio elektoral ta huramentá òf ta hasi un deklarashon i promesa.

Dikon ta residentenan di entidatnan públiko ku pasaporte hulandes so por bai den e kolegio elektoral?
Esaki ta derivá for di e punto di salida ku ta solamente residentenan hulandes di e entidat públiko konserní  por influensiá (indirektamente) e konstelashon di e Eerste Kamer.

Ta stipulá pa kada kolegio elektoral un kódigo di kondukta pa e miembronan?
Si, pa kada kolegio elektoral un kódigo di kondukta ta keda ta stipulá pa e kolegio elektoral mes. E kolegio elektoral mes ta determiná  kua tópiko ta inkluí den e kódigo di kondukta. E kolegio elektoral mes ta responsabel pa kumplimentu ku e kódigo di kondukta. Si miembronan individual falta ku kumplimentu, esaki no tin konsekuensia direkto pa e miembresia, pero posiblemente por tin konsekuensia polítiko si.

Pa e elekshon di Eerste Kamer, ken ta kontrolá e listanan di kandidato ku a keda entregá i e dokumentonan korespondiente?
A base di e Lei Elektoral, e funshon aki ta pertenesé na e urna elektoral sentral. E proposishon di lei aki no ta kambia esaki. Pa elekshon di miembronan di Eerste Kamer e Konseho Elektoral ta fungi komo urna elektoral sentral.

Ken ta permití pa vota pa e kolegio elektoral?
Residentenan hulandes di e entidat públiko konserní ku a yega e edat di diesocho aña i ku no ta ekskluí di derecho di voto.

Pa ki dia e e elekshon ta planeá?
E elekshon di e kolegionan elektoral na Boneiru Sint Eustatius i Saba ta tuma lugá riba mésun dia ku elekshon di konseho insular, esta djárason 15 di mart 2023 di 07.30 or te 21.00 or.

Dikon ta organisá elekshon di kolegio elektoral riba e mésun dia ku elekshon di konseho insular?
Elekshon di konseho insular ta tuma lugá pareu ku elekshon di parlamento provinsial. E hecho ku e elekshon di kolegio elektoral ta pareu ku esun di parlamento provinsial, ta evitá e posibilidat ku e resultado di esun elekshon ta influensiá e resultado di e otro. Ademas votadónan tin nodi di bai urna un bes so, na lugá di dos bes, loke por tin un efekto positivo riba e asistensia. Finalmente e tin benefisionan organisatorio i finansiero, ya ku ta hasi uso di e mésun lokalidatnan di vota i miembronan di urna.

Personanan ku derecho di vota ta risibí dos karchi pa vota na kas i nan mester vota dos bes riba e dia di elekshon? 
Si, un persona ku derecho di vota ku ta permití di vota pa tur dos elekshon, ta risibí dos karchi pa vota na nan kas. Na e urna e ta risibí na mas momento e papel di vota pa kada elekshon. E ta yena e papel di vota den e hòki di vota i ta deponé esaki despues den e buzon destiná pa esaki. E buzonnan di e elekshon di kolegio elektoral i di konseho insular ta haña kada unu un diferente koló, ku ta kuadra ku e koló di e papel di vota.