BKCN Aspirantenan pa Manschap A

VMBO/MBO | Saba, Boneiru | 36 ora | Number di vakatura: P&O2024_010_010 | Fecha di klousura: 6 di yanüari 2025

Organishon

Kuerpo di Bombero Hulanda Karibense (BKCN) ta parti di Ministerio di Hustisia i Seguridat. Minister di  Hustisia i  Seguridat ta hefe di e kuerpo, i ta sòru pa disponibilidat básiko di e kuerpo di bombero, duna asistensia, kombatí insidente di supstansia peligroso, paga kandela di avion i kombatí desaster. Tin ún kuerpo di bombero ku establesimentu na Boneiru, Saba, i Sint Eustatius. E organisashon di kuerpo di bombero ta representá desishon firme, eksperensia, yudansa, i ta enfoká riba kolaborashon.

E estudio

E estudio ta konsistí di kuater parti; kombatí kandela, asistensia tékniko, kombatí insidente di supstansia peligroso, i paga kandela di avion. Paga kandela ta nifiká siña atendé  ku diferente kandela den edifisio i den naturalesa, ku énfasis riba seguridat i téknika pa paga kandela. Asistensia Tékniko ta nifiká desaroyo di abilidatnan pa reskate di víktima den kaso di aksidente, hasiendo uso di ekipo spesialisá. Kombatí Insidente di Supstansia Peligroso ta traha di manera seif den ambiente ku supstansia peligroso i manehá riesgo. Paga kandela di avion ta konsistí di siña téknikanan spesífiko pa kandela di avion i evakuashon seif di pasahero.

E estudio ta konsistí di ehersisionan realístiko, di manera ku bo ta bon prepará pa e situashonnan ku bo ta topa den práktika. Ademas, entrenamentu físiko ta parti di e estudio, ya bo ta kla prepará pa enfrentá e tareanan físiko pisá ku ta parti di e trabou.

Tareanan di funshon

Bo tareanan di mas importante despues di alkansá e diplomanan Manschap A i pa paga kandela di avion lo bira:

Na momentu ku e alarma zona, bo ta kla pa duna bo máksimo prestashon. Den kaso di insidente i kalamidat, kuerpo di bombero konosé un struktura di mando herárkiko klaramente definí. Bo ta funshoná komo tim den kuido básiko di kuerpo di bombero, na momentu di asistensia tékniko, na momentu di paga kandela di avion i na momentu di aksidente ku supstansia peligroso. Bo funshon  ta dirigí tambe riba mantené kapasidat profeshonal dor di rekapasitashon, pa haña konosementu nobo den e área profeshonal.

E funshon ta konsistí di dos parti; un parti represivo i un parti di maneho. Pa e parti represivo, bo ta aktua komo bombero femenino/maskulino bou di guia di e hefe na mando. Kapasidat profeshonal i kondishon físiko spòrtif ta kondishonnan pa ehersé e funshon di Manschap A. Bo mes ta responsabel pa esei den bo bida diario, pero tambe dor di por ehèmpel partisipá den programa di ehersisio rondó di kondishon i deporte. Pa e parti di maneho bo ta hasi e sobrá trabounan bou di hefenan na mando/hefenan di ekipo, inkluso tarea spesífiko di e funshon.  

Servisionan iregular

Nos kolaboradónan na Saba ta traha sigun servisionan iregular i nos kolaboradónan na Boneiru ta traha segun servisio di warda di 24 ora. Den dia tin un orario diario estrikto di entrenamentu, deporte, i trabounan manera por ehèmpel prevenshon, mantenshon di ekiponan di trabou i limpiesa di vehíkulo. Trabounan ku por keda interumpí kualke momentu dor di un alarma.

Eksigensianan di funshon

• Bo ta dispone di un nivel di traha i pensa mbo;
• Bo tin un reibeweis B;
• Bo ta dominá hulandes verbalmente i por eskrito;
• Bo por manehá strès, bo ta entusiasmá, fleksibel, i un ”teamplayer”;
• Bo salú i kondishon ta ekselente, bo ta gusta deporte;
• Pasa e eksámen médiko preventivo periódiko ku éksito ta nesesario pa ehekushon di e.o. e funshon di Manschap A den BKCN. 

Bo profil

Bo por identifiká problema rapido, i bo ta kapas pa aktua desidido. Bo ta karga responsabilidat, demonstrá inisiativa, i bo por manehá strès. Por último, bo tin un aktitut di trabou profeshonal i kolegial, i traha huntu ta natural pa bo. Bo ta konsiente di e karakter representativo di e funshon ku bo ta solisitá p’e.

Kiko nos ta ofresé?

• Un nombramentu a base di e Rechtspositiebesluit ambtenaren BES (Desishon di posishon hurídiko di ámtenar di BES);
• Un salario den eskala inisial 4, mínimo $ 1.770,- te máksimo $ 2.400,- i eskala funshonal 5, mínimo $ 1.860,- te máksimo $ 2.700,-;
• Sèn di fakansi (8,33% di e salario);
• Un di diestres luna (8,33% di e salario, un mínimo di $ 1.750,- bruto);
• Un areglo di penshun akomodá na Pensioenfonds Caribisch Nederland (PCN);
• 168 ora di fakansi den kaso di un siman di trabou di 36 ora pa siman (den kaso di trabou den sheft ta bin 24 ora di ferlòf aserka);

• Un nombramentu temporal pa durashon di e estudio. Despues di alkansá e estudio ku éksito, un nombramentu pa un aña ku perspektiva pa un nombramentu fiho den kaso di bon funshonamentu, aktitut di trabou korekto, i resultado di evaluashon positivo;
• Un areglo pa muda pa kandidato ku ta reakshoná for di eksterior.

Prosedura

Den bo karta mester ta evidente ku bo motivashon, konosementu i karakter ta pas ku e funshon deskribí. Despues di e selekshon di karta, bo ta risibí un invitashon pa e prosedura di selekshon òf un rechaso. E prosedura di selekshon ta konsistí di e siguiente partinan:

• Selekshon di karta;
• Tèst di kondishon físiko;
• Entrevista di trabou i/òf prueba di funshonamentu ku e tim;
• Entrevista tokante kondishon laboral;
• Inspekshon pa nombramentu den Kuerpo di Bombero.

Eksigensianan di nombramentu

• Deklarashon tokante kondukta (VOG);
• Entrega di un Deklarashon di no tin Opheshon (Verklaring Geen Bezwaar, VGB) relashoná ku e trabounan ku ta bai ehekutá na aeropuerto di Boneiru;

• E nashonalidat hulandes;

• Inspekshon pa nombramentu den Kuerpo di Bombero.

Bon pa sa pa interesado pafó di Hulanda Karibense

• E salario ta na dòler merikano, e moneda ofisial di Hulanda Karibense;
• Hulanda Karibense konosé su propio reglanan di impuesto. Ta kobra impuesto riba e entrada mas haltu ku e suma liber di impuesto ($ 20.242,- na 2024) di un porsentahe di 30,4 % na retenshon riba suèldu;
• Ta obligá pa partisipá na e fondo di penshun, inkluso un kontribushon propio na esaki;
• Bo ta, òf bo ta bira, residente di Hulanda Karibense.

Mas informashon?

• Boneiru:  Komandante Lokal Gravey Anthony, Gravey.Anthonij@brandweercn.com i Thammy.Albertsz@brandweercn.com.

• Saba: Komandante Lokal Julio Every, Julio.Every@brandweercn.com.

Solisitut digital

Bo por manda bo Curriculum Vitae ku bo motivashon na vacature@rijksdienstCN.com.