Apertura renobá vakatura pa Gezaghèber di entidat públiko Boneiru

Sekretario di estado pa Relashonnan den Reino i Digitalisashon ta invitá personanan interesá pa solisitá pa e funshon di:gezaghèber di entidat públiko Boneiru (alrededor di 25.172 habitante).

Proseso di nombramentu

Ta nombra e gezaghèber pa medio di Dekreto Real riba proposishon di e Sekretario di estado pa Relashonnan den Reino i Digitalisashon pa un periodo di seis aña. E Representante di Reino (suplente) pa entidatnan públiko Boneiru, Sint Eustatius i Saba ta responsabel pa e prosedura di reklutamentu i selekshon.

E Representante di Reino (suplente) a yega huntu ku konseho insular di entidat públiko Boneiru na un deskripshon di perfil ku lo usa ora di selektá kandidato.

Por pidi e deskripshon di perfil tambe via e-mail serka sekretariado di e Representante di Reino (suplente) via e adrès di e-mail: gezaghebberbonaire@rijksdienstcn.com.

Un ‘assessment’ por forma parti di e prosedura, i su intenshon ta pa suministrá e Representante di Reino (suplente) ku informashon komplementario ora di formulá su rekomendashon.

Promé ku hasi e proposishon, riba enkargo di ministerio di Asuntunan Interno i Relashon den Reino, lo ‘screen’ e kandidato proponé. E ‘screening’ lo konsistí di buskamentu di referensia serka AIVD i un investigashon fiskal.

Asuntunan relashoná ku posishon hurídiko

Salario di e gezaghèber ta suma USD 119.914 pa aña. Pa informashon adishonal al respekto i otro asuntunan relashoná ku posishon hurídiko di e gezaghèber, ta referí na e ‘Rechtspositiebesluit politieke gezagdragers BES’ (ku por konsultá ònlain).

Término di solisitut

Si bo kier bini na remarke pa e funshon, bo ta invitá pa hasi esaki konosí pa mas tardá, djadumingu 7 di aprel 2024. Bo mester dirigí bo solisitut na Su Mahestat Rei. Ta supliká bo pa manda un karta di solisitut firmá ku bo cv i un pasfoto resien. Preferiblemente manda bo solisitut di forma digital pa gezaghebberbonaire@rijksdienstcn.com. Si bo ta deseá hasié, bo por manda e solisitut tambe pa medio di pòst registrá pa e Representante di Reino (suplente). Por hasi esei, menshonando komo indikashon “na atenshon di Representante di Reino” i “Konfidensial” riba e ènvelòp. E adrès ta pòstbùs 338, Boneiru, Hulanda Karibense. Bo ta risibí denter di kuater dia di trabou un konfirmashon por eskrito di tantu un solisitut via e-mail komo via pòst.

Prosesamentu di dato personal

Pa e selekshon ta prosesá datonan personal, inkluyendo datonan hudisial i un chekeo di referensia. Pa prosesamentu di datonan hudisial i e chekeo di referensia ta pidi solisitante pa firma un deklarashon di konsentimentu ku e ta risibí despues ku risibí su cv i karta di solisitut. Pa bin na remarke pa nombramentu akseso na datonan hudisial ta rekerí.

E prosesamentu ta tuma lugá konforme e prosedura den e Lei entidatnan públiko Boneiru, Sint Eustatius i Saba i regulashon basá riba esei. Ta warda e datonan konforme e términonan legal.

Kontakto

Den kaso ku eventualmente tin pregunta tokante e prosedura òf funshon, bo por tuma kontakto telefónikamente ku sekretariado di Representante di Reino via gezaghebberbonaire@rijksdienstcn.com òf via +599 715 8304.

Teksto di perfil di gezaghebber di Boneiru

1. Boneiru

Boneiru ta un isla ku un naturalesa úniko den Laman Karibense. Un isla ku tin e parke nashonal di mas grandi di Hulanda Karibense: Washington Slagbaai. Un isla konosí pa e rikesa natural di e laman ku ta rondoná Boneiru.

Un isla ku un kultura riku i orguyoso. Un isla na unda ku pasado te ku awendia ainda ta tangibel, palpabel i visibel i unda na mes momentu ta wak futuro ku un bista skèrpi.

Un isla den desaroyo ku a krese fuertemente e último añanan, tantu na kantidat di abitante komo pa loke ta trata aktividat turístiko.

2. Retonan pa Boneiru

Dor di e kresementu di Boneiru, e isla ta hañ’é konfrontá ku algun reto riba tantu área sosial, kultural komo físiko. Guia e kresementu (ku a tuma lugá kaba) den bon direkshon e añanan benidero ta un reto importante.

Ounke ku e ambishon i retonan na Boneiru ta grandi, e forsa di ehekushon na e isla ta limitá. Retonan importante pa e isla ta, fortalesé e forsa di ehekushon i mantené e ambishonnan den balansa ku e forsa di ehekushon eksistente.

3. Kompetensianan prinsipal di e perfil

Entidat Públiko Boneiru i e retonan ku Boneiru ta enfrentá, ta rekerí un gezaghèber ku un perfil kla:

Ta hasi konekshon:

E gezaghèber ta trese konekshon den komunidat di Boneiru i ta resolvé diferensia entre gruponan pa yega na lasonan di kolaborashon. Di e gezaghèber ta deseá enfátikamente ku e ta resolvé kontradikshon i ta trese partidonan huntu ku rèspèt pa e ròl di kada ken.

Independiente:

E gezaghèber ta aktua neutral, tin outoridat i ta un punto di kontakto pa tur partido i hende na Boneiru. E gezaghèber ta aksesibel, e tin un predominio natural i un aktitut ku ta tene sufisiente distansia di interesadonan. Na mes momentu e gezaghèber ta brinda tambe espasio na e kampo polítiko, unda esei ta nesesario.

Rekonosibel:

E gezaghèber ta konsiente di e situashon (polítiko gubernamental) i ta aktua di akuerdo. E gezaghèber ta rekonosibel, sin importá e diferente ròlnan ku e gezaghèber tin, inkluyendo tambe esun di tata/mama di siudadano òf mènedjer di krísis. Den e ròl di presidente di konseho insular i kolegio ehekutivo, ta rekonosé e gezaghèber komo un vigilante di proseso independiente. E gezaghèber ta respetá den esaki e ròl polítiko i gubernamental di e frakshonnan den konseho insular i di e diputadonan.

Íntegro:

E gezaghèber ta aktua kla i transparente konforme norma- i balornan generalmente aseptá. E gezaghèber ta tene e kuadro- i proseduranan legal skèrpi na bista. E gezaghèber tin un kompas moral bon desaroyá, tin un funshon ehemplar i ta propagá konsiensia di integridat. E gezaghèber no tin miedu pa hala atenshon di otronan riba esaki a base di e diferente ròlnan, den kolegio ehekutivo, konseho insular, e organisashon- òf otro partidonan ku ta bin na remarke pa esaki.

Por resistí strès:

E gezaghèber ta aktua efektivamente bou di preshon i durante situashon di krísis, ta lusi trankilidat i konfiansa.

4. Espektativanan tokante ehersisio di e ròl

E gezaghèber komo tata/mama di siudadanonan

  • Ta embolbí ku loke ta biba na Boneiru.
  • Ta presente na susesonan ku ta importante na e isla.
  • Ta aktua neutral ku tur partido, ta independiente i e gezaghèber ta di i t’ei pa tur hende.

E gezaghèber komo presidente di konseho insular

  • Ta guia e debate den konseho insular i ta fasilitá bon tomo di desishon ku rèspèt pa e ròl polítiko di e miembronan den konseho insular i di e diputadonan.
  • Ta un profeshonal kompetente. E gezaghèber por ehèmpel ta bon na altura di lei-, prosedura- i reglanan, kon pa guia reunion di konseho insular òf ta dispuesto pa profundisá su mes den esei i pa aseptá sosten.
  • Tin un bon antèna pa diferente interes i opinion den konseho insular i pa e relashonnan mutuo (humano i polítiko).
  • Tin ròl importante komo vigilante di integridat.

E gezaghèber komo presidente di kolegio ehekutivo

  • Ta guia e kolegio komo tim i ta fasilitá bon tomo di desishon.  
  • Ta profeshonal i kompetente. E gezaghèber por ehèmpel ta bon na altura di lei-, prosedura- i reglanan ku tin mester pa tomo di desishon den e Entidat Públiko.
  • Den esei e ta respetá responsabilidat di kada ken i ta duna espasio na diputado pa ehekutá su ròl gubernamental i sosial.
  • Ta pèrkurá pa unidat di maneho i ta hunga un papel di konekshon.

E gezaghèber komo esun enkargá ku e kartera di órden públiko

  • Por kontra krísis i ta desisivo.
  • Ta mustra kombibensia ku víktima-, bisiña-, dunadónan di ayudo i eventual boluntarionan embolbí ora di kalamidat.

5. Demas puntonan di atenshon

E  gezaghèber mester tin un konekshon sosial kaba ku Boneiru.

E gezaghèber mester dominá tantu hulandes komo papiamentu perfektamente, tantu verbal komo por eskrito. Konosementu di spañó i ingles ta ademas un bentaha.

Boneiru ta parti di Hulanda Karibense. Konosementu di e region karibense ta un kondishon esensial importante i e gezaghèber ta sigui desaroyonan relevante di e region ku ta importante pa Boneiru.

Eksigensia ta ku e gezaghèber nobo tin su ofisina na Boneiru i, si esei ta aplikabel, pues mester establesé su mes mas pronto posibel despues di su nombramentu na Boneiru.

E kompetensia- i abilidatnan ariba menshoná ta forma e base pa e kombersashonnan di resonansia anual entre konseho insular i e gezaghèber.

Ademas tin algun eksigensia legal a base di e lei entidatnan públiko BES, entre nan: Nashonalidat hulandes (art. 75); Funshonnan adishonal (art. 79); Inkompatibilidatnan (art. 80 i 82) i domisilio real na Boneiru (art. 85).