SSO CN Atministradó di lugá di trabou senior

HBO | Boneiru | 36 ora | Number di vakatura:  P&O2025_05_009 | Fecha di klousura: 3 di yüni 2024

Deskripshon di funshon

Komo Atministradó di lugá di trabou, bo ta kontribuí na maneho di e lugánan di trabou di e kolaboradónan di Rijksdienst Caribisch Nederland (RCN). Tin mas o ménos 900 lugá di trabou na mas ku kuarenta lokalidat, repartí rònt e islanan BES.
Bo ta ehekutá tur e tareanan den un tim di spesialista di lugá di trabou, i ta sòru pa solushon di insidente di e di dos linia na lugá di trabou, i pa apoyo di e koleganan di e tim Maneho di lugá di trabou. Ademas, bo ta sòru pa redakshon i aktualisashon di dokumentashon i pa mehorashon di e manera di traha unda esaki ta posibel.

E persona ku nos ta buska ta un hende ku sa kon pa kombiná su konosementu tékniko i profeshonal ku e enfoke riba kliente fuerte di e organisashon.

Tareanan di funshon

• Bo ta duna apoyo di e di dos liña na usuario (na telefòn i na e sitio);
• Bo ta solushoná insidente, investigá problema ku a identifiká, i ta solushoná esakinan di un manera struktural;
• Bo ta apoyá e kolaboradónan di e promé liña ku trabounan ku mester hasi;
• Bo ta instalá lugánan di trabou, hasi esakinan kla pa usa, i ta manehá nan;
• Bo ta traha, tèst, i distribuí aplikashon;
• Bo ta redaktá dokumentashon (tékniko) i ta mantené esaki aktualisá;
• Bo ta buska konekshon i ta mantené kontakto ku e otro disiplinanan manera maneho di ret, maneho di sistema, i maneho di aplikashon tékniko;
• Bo ta plania kambionan konforme e plannan pa prosesá kambio, i ta ehekutá esakinan den e aparatonan eksistente;
• Bo ta mantené e arkitektura di e infrastruktura di Rijksdienst Caribisch Nederland konforme e deseonan di e kliente dor di hasi uso di konosementu di desaroyo di aparato riba merkado;
• Bo ta partisipá den proyektonan.

E organisashon

E Rijksdienst Caribisch Nederland (RCN) ta e vínkulo entre servisionan ehekutivo di ministerionan ku ta presente riba e islanan Boneiru, Sint Eustatius i Saba. Kada ministerio mes ta responsabel pa loke ta trata kontenido di introdukshon i ehekushon di e maneho di e ministerio konserní. SSO CN ta un organisashon di shared service i ta enkargá ku maneho operashonal i apoyo riba tereno di Maneho di Rekurso Humano (HRM), kompra, asuntu fasilitario, ICT, finansa i komunikashon pa tur departamentu aktivo na Hulanda Karibense.

Departamentu

E departamentu di ICT ta enkargá ku ún infrastruktura di ICT konhunto pa suministro di informashon di tur e diferente departamentunan di Reino aki. E departamentu ta konsistí di diferente tim, i ta suministrá e.o. maneho di ret, maneho di sistema, maneho di aplikashon tékniko, maneho di lugá di trabou, i un servicedesk. E departamentu tin e kontaktonan nesesario ku tantu partidonan paden di e organisashon komo partidonan eksterno.

Kompetensianan

• Abilidatnan komunikativo;
• Traha huntu;
• Tuma inisiativa;
• Orientashon riba resultado;
• Plania i organisá;
• Orientashon riba kliente;
• Por ku stress;
• Íntegro.

Eksigensianan di funshon

• Bo tin un nivel di traha i pensa hbo;
• Bo ta dispuesto pa sigui kurso di kapasitashon riba tereno profeshonal i optené sertifikado.
• Bo tin eksperensia ku apoyo di lugá di trabou.
• Un konosementu amplio di proseso di ICT i e sistemanan òf aplikashonnan dirigí riba esei.
• Bo tin konosementu demostrabel di System Center Configuration Manager (SCCM), Group Policies, Active Directory i téknikanan di packaging.
• Bo ta disponé di ITIL foundation, COMPTIA+, òf estudio(nan) komparabel.
• Bo ta dominá hulandes i ingles i ingles tékniko verbal i por eskrito, papiamentu ta un bentaha.
• Bo a proba ku bo por traha independientemente, i ku bo por traha huntu bon ku diferente disiplina tambe.
• Konosementu di prosedura, instrukshon, legislashon i regulashon, método i téknika relevante pa e kampo di trabou;
• Eksperensia ku traha den un ambiente multikultural ta un bentaha;
• Bo ta gusta tuma inisiativa i ta riska hasi eskoho.

Loke nos ta ofresé

• Un nombramentu a base di e Rechtspositiebesluit ambtenaren BES (Desishon di posishon hurídiko di ámtenar di BES);
• Un salario konforme merkado, den skal inisial 9 i skal de e funshon 10, salario mensual minimalmente $3.121,- i maksimalmente $ 4.644,- ku un siman di trabou di 36 ora pa siman. Klasifikashon a base di konosementu i eksperensia;
• Sèn di fakansi (8,33% di e entrada anual);
• Un di diestres luna (8,33% di e entrada anual);
• Kompensashon di vitalidat;
• Un areglo di penshun akomodá na Pensioenfonds Caribisch Nederland (PCN);
• 182 ora di fakansi den kaso di un siman di trabou di 36 ora pa siman;
• Un nombramentu temporal pa un aña, ku bista riba un nombramentu fiho den kaso di bon funshonamentu i un evaluashon positivo
• Un areglo di mudansa pa personanan ku ta reakshoná for di eksterior;

Prosedura

Un assessment, casus i/ òf chekeo di referensia por forma parti di e prosedura.
Den e selekshon lo tene kuenta ku e siguiente órden:

• Personal ofisial di RCN na e islanan BES (interno);
• Habitante di e parti karibense di Hulanda (eksterno);
• Otro kandidatonan (eksterno).

Eksigensianan di nombramentu

• Un deklarashon tokante kondukta (VOG);
• Un saminashon médiko na fabor di atmishon den e fondo di penshun, (inkluso e suma di kontribushon personal pa esaki;
• Nashonalidat hulandes.

Bon pa sa pa interesado pafó di Hulanda Karibense

• E salario ta na dòler merikano, e moneda ofisial di Hulanda Karibense;
• Hulanda Karibense konosé su propio reglanan di impuesto. Ta kobra impuesto di 30,4% riba un suèldu riba e montante liber di impuesto ku ta $21.373,- den 2025, te un suèldu di $51.250,-. Den e di dos grupo di impuesto un tarifa di impuesto di 35,4% ta na vigor;
• Bo ta, òf bo ta bira, residente di Hulanda Karibense.

Mas informashon?

Pa mas informashon tokante e vakatura bo por tuma kontakto ku Arjen Dekker, Hefe di ICT, telefòn +599 795 5255.

Solisitut digital

Bo por manda bo Curriculum Vitae ku bo motivashon na vacature@rijksdienstCN.com.