Tutela

Tur yu menor di edat mester ta bou di outoridat di un mayor(nan). Si no ta posibel pa ehersé e outoridat, mester apuntá un tutor (temporal). Bo por entregá un petishon pa tutela temporal na Voogdijraad CN.

Un tutor temporal ta nesesario si hóbennan bai biba (temporalmente) den eksterior pa nan estudio òf si e mayor(nan) bandoná e isla mas largu ku 3 luna i kier laga e mucha atras pa un otro persona kuid’é. Tambe si un mucha ta bin for di eksterior i un persona na Boneiru, Saba òf Sint Eustatius ta bai pèrkurá pa e mucha, ta nesesario pa regla tutela (temporal).

Un tutor (temporal) ta un persona ku ta tuma e responsabilidat, kuido i kriansa di e mucha over di e mayor(nan). Un tutor temporal por hasi aktonan ofishal tambe na nòmber di e menor di edat, manera firmamentu di dokumentonan importante i maneho di finansa.

Si e sirkunstansianan kambia i e mayor(nan) mes ta sòru atrobe pa e menor di edat, e ora ei e tutor temporal ta pidi pa restablesimentu di outoridat di mayor.