Minister Schouten ta bishitá Hulanda Karibense

Di 2 di sèptèmber te ku 6 di sèptèmber 2019 minister Carola Schouten di Agrikultura, Naturalesa i Kalidat di Kuminda ta bishitá Hulanda Karibense.

Minister Carola Schouten

Meta di e bishita ta pa fortifiká e kooperashon mutuo i e progreso di diferente proyekto riba tereno di desaroyo di agrikultura i hortikultura, mantenshon di naturalesa i peska na Saba, Sint Eustatius i Boneiru. Banda di esei tin atenshon pa e pregunta kon pa amplia suministro independiente di kuminda riba e islanan.

E enfoke di e programa durante e bishita di trabou ta riba temanan di mantenshon di naturalesa i siguridat di kuminda lokal. Esaki, den relashon ku desaroyo di agrikultura, hortikultura i peska. Pa loke ta trata suministro di alimento, Hulanda Karibense ta dependé pa gran parti di importashon. Produkshon lokal di alimento ta vulnerabel pa kambio di klima, eskases di awa, polushon di awa i eroshon. Pa e motibu aki hasimentu di kompra ta karu, i no ta tur ora tin kuminda fresku optenibel. Pa un sistema di kuminda mas outosufisiente, un produkshon sirkular di kuminda i uso efisiente di rekursonan ta esensial. Minister Schouten ta bishitá diferente proyekto ku ta bai traha ku formanan nobo di agrikultura inteligente ku ta kontribuí na oumento di propio suministro lokal di kuminda. Al respekto tin atenshon pa interkambio di konosementu i ideanan riba tereno di agrikultura di resiklahe.

Saba, Sint Eustatius i Boneiru

Minister Schouten ta kuminsá su bishita di trabou na Saba, unda lo inform’é entre otro di esfuersonan riba tereno di protekshon di koral i plantamentu lokal di bèrdura. Despues e ta biaha pa Sint Eustatius, unda e lo hiba kombersashon ku entre otro piskadónan lokal, bendedónan di marshe i Servisio di Agrikultura, Krio di bestia i Peska (LVV). E minister ta klousurá su biahe na Boneiru, unda e ta bishitá diferente empresario agrario, un inisiativa di kuminda salú pa mucha i diferente organisashon ku ta dediká nan mes na maneho di naturalesa.

Ènvelòp di Region

Pa mehorá e kalidat di bida i amplia prosperidat, gabinete ta invertí den desaroyo sosial ekonómiko di Hulanda Karibense a traves di e asina yamá ‘Regio Deals’. Gabinete a pone € 30 mion for di e Ènvelòp di Region disponibel pa Boneiru, Saba i Sint Eustatius. Lo usa esaki entre otro pa kombatimentu di pobresa i mehorashon di siguridat di kuminda na Hulanda Karibense. Minister Schouten ta bishitá diferente proyekto finansiá for di e Ènvelòp di Region.