CBS: Produkto interno bruto di Hulanda Karibense a subi den 2015
E produkto interno bruto (bbp) a subi riba tur isla di Hulanda Karibense den 2015. Na Boneiru e subida di e bbp ku 3,0 porshento, tabata esun di mas haltu. E balor di bbp a subi na 415 mion dòler merikano. E bbp di St. Eustatius a subi ku 2,1 porshento na 102 mion dòler merikano i e bbp di Saba a oumentá ku 1,6 porshento te 47 mion dòler merikano. Ku esei e bbp di henter Hulanda Karibense a sali 564 mion dòler merikano den 2015.
Aparte di e balor di bbp, e volúmen di bbp tambe a oumentá. E mutashon di volúmen di bbp ta e desaroyo di e balor di bbp koregí pa kambionan di preis. E volúmen di bbp di Boneiru a subi ku 3,4 porshento, esun di St. Eustatius ku 3,2 porshento i esun di Saba ku 1,2 porshento. Pa e korekshon di preis a hasi uso di e sifra di índise di preis di konsumo di kasnan di famia.
Na St. Eustatius e bbp pa kabes di poblashon ta esun di mas haltu
E bbp pa kabes di poblashon tabata esun di mas haltu na St. Eustatius den 2015, 26 600 dòler merikano. Na Saba e bbp a suma pa kabes 24 900 dòler merikano i na Bonaire 21 700 dòler merikano.
Desde e promé bia ku CBS a midi e bbp di Hulanda Karibense na 2012, e bbp pa kabes di poblashon a subi mas rápido na Saba. E balor di bbp pa kabes a subi ku 16,4 porshento di 21 400 dòler merikano den 2012 pa 24 900 dòler merikano den 2015. Na St. Eustatius e balor di bbp pa kabes a oumentá ku solamente 1,1 porshento den 2015 kompará ku 2012. Na Boneiru e balor di bbp pa kabes a baha leve ku 0,9 porshento di 21 900 dòler merikano den 2012 na 21 700 dòler merikano den 2015.
E aña akí ta publiká e seri di tempu (2012-2015) di bbp di e islanan riba StatLine tambe.