38 proyekto ta haña supsidio pa ‘Oportunidat pa tur mucha di Hulanda Karibense'
Tur mucha mester por tuma parti na deporte, kultura, den nan tempu liber i na skol. Te asta si na kas no tin sufisiente plaka pa kosnan èkstra. Pa pèrkurá p’esei organisashonnan manera akohida di mucha, skolnan, klupnan di deporte i scouting a traha plannan den e lunanan ku a transkurí. 38 di nan a keda aprobá awor. Ku esei ta usa e montante kompleto di 1 mion euro pa supsidio di ‘Oportunidat pa tur mucha di Hulanda Karibense’ e aña akí.
Na Saba a aprobá 10 proyekto, entre otro pa laga muchanan partisipá mihó na skol i duna nan mihó akohida despues di skol i guia pa hùiswèrk. Di e forma akí 26 mucha di e grupo di enfoke por bira ’Junior Sea Scout‘ pa motibu ku ta kompensá nan miembresia mensual. Tambe ta organisá diferente aktividat den naturalesa. Muchanan na Saba ku tin nesesidat spesial por bai hasi uso di teknologia moderno i material spesialisá, di manera ku nan por partisipá meskos ku muchanan ku nesesidatnan spesial di kua e mayornan si ta gana sufisiente.
Na Statia a aprobá en total 8 proyekto dirigí riba logra ku muchanan di e grupo di enfoke por reklamá entre otro artíkulonan deportivo, desayuno na skol i kompensashon pa kontribushon propio obligatorio pa por partisipá na un torneo di deporte pafó di e isla. Den un otro proyekto ta pone tablet na disposishon di e muchanan akí di manera ku nan por usa teknologia moderno pa hùiswèrk. Tambe a duna supsidio pa sòru pa diferente aktividat despues di skol pa muchanan den kuadro di naturalesa, kultura, ambiente, protekshon di naturalesa i e parke supmarino.
Muchanan den e grupo di enfoke na Boneiru ta haña oportunidat den e 20 proyektonan ku a ser asigná, pa tuma parti na diferente aktividat entre kua: baile, moveshon, obra di man, muzik, drama i presentashonnan. Tambe ta duna kurso- i tayernan riba tereno di fotografia, dokumental, animashon video i video musikal. Ta duna tambe un impulso èkstra na desaroyo di idioma pa mucha, coaching di mucha i suministro di kuminda salú ta forma parti di e proyektonan aprobá.
Diferente organisashon a entregá en total 79 proyekto. Di eseinan a aprobá 38 proyekto. A rechasá 14 proyekto pa motibu ku a yega e plafòn di supsidio. 27 otro proyekto a keda rechasá basá riba nan kontenido. E presupuesto kompleto di 1 mion euro pa Hulanda Karibense a keda repartí. Sekretario di estado Jetta Klijnsma tin hopi atmirashon pa e organisashonnan ku den korto tempu a traha i entregá plannan hopi bon i importante. “Mi tin tur konfiansa ku e plaka èkstra lo yuda hopi mucha pa nan partisipá. Pasobra kada muchu meresé di bai skol kontentu i ku bon artíkulo òf pa yena su tempu liber na su mes manera.”