Kontròl na botika riba resèpt di remedi segun lista “G-standaard”
Entrante yanüari 2019, ZVK huntu ku botikarionan di Boneiru, Sint Eustatius i Saba ta bai traha huntu pa promové kalidat di remedi ku ta uza na e tres islanan. Entrante e fecha aki lo kontrolá tur resèpt a base di e asina yamá ‘G-standaard’. Esaki ta nifiká ku e remedinan ta kontrolá dor di Kolegio di Evaluashon di Remedi (College ter Beoordeling van Geneesmiddelen, CBG) i ta paresé riba e registro di remedi (Geneesmiddelenregister).
Na Hulanda i tambe na Hulanda Karibense ta permití remedi subi merkado solamente si nan ta karga aprobashon di CBG. E instansia independiente aki ta supervisá kalidat, funshonamentu i seguridat di remedi i ta stimulá uso di e remedi korekto dor di e pashènt korekto.
E remedinan ku CBG ta permití riba merkado ta aparesé den e registro di remedi. Pues, un remedi ku ta paresé riba e registro aki ta unu segun e asina yamá ‘G-standaard’.
Registro di remedi
Danki na e lista ’G-standaard’ tantu pashènt komo nan dòkter i botikario por sa ku e remedinan ku ta preskribí ta kumpli ku kriterionan estrikto. Remedinan ku no ta paresé den e registro di remedi no ta kontribuí na un kuido di salú responsabel i seif pa pashènt. Esaki ta konta tambe pa remedi produsí den region i hopi usá.
Na Hulanda i tambe na Hulanda Karibense ta prohibí pa entregá remedi ku no ta paresé den e registro di remedi. Entrante 2019 no mag entregá e remedinan aki mas.
Kalidat i seguridat di pashènt
Un ke otro por nifiká ku lo no preskribí remedi mas ku un pashènt a kustumbrá kuné. Den kasonan asina, e botikario den deliberashon ku e dòkter ku a skirbi e resèpt, lo skohe un otro remedi.
E registro di remedi ta kontené sufisiente remedi pa garantisá kalidat di kuido di salú i seguridat di pashènt.
Ku kontròl di remedi segun e lista ’G-standaard’, ZVK huntu ku dòkter i botikario ta traha huntu pa garantisá un kuido di salú responsabel i sigur.