CBS ta start ku investigashon di forsa laboral
Entrante fin di sèptèmber te ku fin di novèmber próksimo Ofisina Sentral di Estadístika (CBS) lo ehekutá e investigashon di forsa laboral (AKO) na Boneiru, Sint Eustatius i Saba. Durante e investigashon aki un entrevistadó di CBS lo pasa pa hasi tur persona ku a kai den e selekshon, algun pregunta tokante di e enkuesta.
E investigashon di forsa laboral ta un investigashon a-selekto bou di kasnan di famia ku CBS ta hasi kada dos aña. Ku e investigashon CBS ta midi e desaroyonan riba merkado laboral riba Hulanda Karibense. Un di e resultadonan di AKO di mas importante ta e porsentahe di desempleo. E porsentahe aki ta indiká ki parti di e poblashon aktivo ta buskando trabou. Otro datonan importante ta e partisipashon laboral, i tambe por ehèmpel e nivel di estudio, trabou i durashon di trabou.
Pa un mihó bista di datonan di merkado laboral, CBS ta pidi koperashon di tur kas di famia ku a kai den e selekshon. Na Boneiru 890 kas di famia lo wòrdu aserká, na Sint Eustatius 558 i na Saba 557.
Konfidensial
Pa lei, CBS tin e obligashon di trata tur dato rekolektá na un manera estriktamente konfidensial. Esaki ta un obligashon di CBS ku ta stipulá den lei. Pa e motibu aki, CBS ta tuma diferente medida pa protehá bo datonan. E mes un lei ta konta pa e entrevistadónan tambe. Tur entrevistadó tin e deber di legitimá su mes na momento ku e presentá na e persona. Ya asina tur hende por ta sigur ku ta trata di un respresentante di CBS.
Bo aporte ta sumamente importante pa e investigashon aki. CBS ta gradisí tur personanan den e sondeo pa nan koperashon.
Pa mas informashon i pregunta por tuma kontakto ku CBS na number di telefòn +599 717 8676 òf via caribischnederland@cbs.nl.