Subida di preis di konsumidó na Boneiru a mengua

Den e promé kuartal di 2019 e preisnan di konsumidó na Boneiru tabata 0,7 porshento mas haltu ku un aña anterior. E kuartal anterior e preisnan di konsumidó a subi ainda 3,4 porshento.

Na Sint Eustatius e preisnan riba base anual a subi tambe ku 0,7 porshento i na Saba ku 0,6 porshento. Esaki CBS ta partisipá a base di e índise di preis di konsumidó (CPI).

Na Boneiru e desaroyo di preis di elektrisidat a tene e subida di preis abou. Den e promé kuartal di 2019 elektrisidat ta promedio 10,5 porshento mas barata ku un aña anterior. Mas aleu preis di gasolin a baha i paña i sapatu tabata promedio mas barata ku un aña pasá. Preis di awa potabel al kontrario a bira den un aña di tempu kasi 44 porshento mas karu. Entrante 1 di aprel 2018 ACM a introdusí tarifanan máksimo i entrante 1 di yanüari 2019 a oumentá esakinan.

Preisnan di konsumidó na Sint Eustatius 0,7 porshento mas haltu

E preisnan di konsumidó na Sint Eustatius tabata 0,7 porshento mas haltu ku un aña anterior; e kuartal pasá esaki tabata ainda 1,1 porshento. E preisnan a subi ménos fuerte pa motibu di e desaroyo di preis di paña i awa potabel. Awa potabel awor ta kasi 4 porshento mas barata ku un aña pasá. E desaroyo di preis di elektrisidat a sòru pa un efekto asendente riba e preisnan di konsumidó. A baha preis di elektrisidat entrante 1 di yanüari 2019, pero no opstante esei elektrisidat ta ainda mas di 4 porshento mas karu ku den e promé kuartal di 2018. 

Preisnan na Saba a subi atrobe 

E preisnan di merkansia i servisio na Saba tabata den e promé kuartal di 2019 promedio 0,6 porshento mas haltu ku un aña anterior. Den e di kuater kuartal di 2018 e preisnan tabata ainda riba e mes nivel ku un aña anterior. Preis di fruta i bèrdura fresku a subi. Gasolin i pasashi di avion tambe tabatin un efekto asendente riba e preisnan di konsumidó. Por ehèmpel gasolin ta mas di 14 porshento mas karu ku un aña anterior i pasashinan di avion ta kosta mas di 5 porshento mas tantu.

Desaroyo di preis di konsumidó pa elektrisidat

Entrante 1 di yüli 2017 Autoriteit Consument en Markt a stipulá tarifanan máksimo pa elektrisidat pa Saba i Sint Eustatius. Pa konsumidónan riba ámbos isla esei tabatin resultadonan distinto. Na Sint Eustatius preis a baha den e último sinku añanan ku 9,0 porshento, na Saba elektrisidat a bira hustamente 8,9 porshento mas karu.

Na Boneiru ACM a introdusí tarifanan máksimo entrante 1 di aprel 2018. Desde 2018 preis di elektrisidat a fluktua enorme. Den e último sinku añanan elektrisidat riba e isla a bira 10,3 porshento mas barata pa e konsumidó.

Sifranan tentativo

E sifranan tokante e promé kuartal di 2019 ta tentativo i lo stipulá nan definitivamente ora ku hasi publikashon tokante e di dos kuartal di 2019.