Bahada ekonómiko den 2017
Den 2017 e volúmen di e produkto interno bruto (bbp) a baha na Boneiru i Saba ku respektivamente 1,3 i 1,4 porshento. Na Sint Eustatius e bbp a subi ku 6,6 porshento. Esaki CBS ta informá a base di sifranan nobo.
E kambio den volúmen di e bbp* ta e desaroyo di e balor di e bbp** koregí pa kambionan di preis. Pa e korekshon di preis a hasi uso di e índise di preis di konsumidó.
E balor di e bbp di Boneiru a baha ku 1,4 porshento na 428 mion dòler merikano den 2017. E bbp di Sint Eustatius a subi ku 8,6 porshento na 108 mion dòler merikano. Na Saba e bbp a baha ku 1,8 porshento na 47 mion dòler merikano.
Kresementu grandi di bbp na Sint Eustatius
E bbp na Sint Eustatius den 2017 ta determiná pa un gran parti pa un kantidat limitá di kompania ku a eksperiensiá un kresementu fuerte den e aña ei. E kresementu a ser frená un poko pa motibu di konsekuensianan di orkannan Irma i Maria ku na sèptèmber di e aña ei a pasa banda di Islariba. E kantidat di turista ku a bishitá e isla ku avion a baha pa e motibu aki ku kasi 5 porshento kompará ku 2016.
Desaroyo di bbp di Boneiru segun ramo di empresa
E bahada di e volúmen di e bbp di Boneiru na 2017 ta bin pa gran parti pa kuenta di e grupo di ramo di empresa komersio, transporte, almasenamentu, informashon i komunikashon, ku un bahada di 15,5 porshento. E grupo aki a eksperensiá konsekuensianan di e sirkunstansianan ekonómiko malu na pais bisiña Venezuela.
E balor agregá di e grupo agrikultura i industria ta esun ku a mehorá mas. Bou di industria ta kai kompanianan den ekskavashon di mineral, industria, energia, awa i maneho di desperdisio i konstrukshon. E volúmen di e grupo akí a krese ku 6,2 porshento. Henter e grupo aki a apoyá na e kresementu.
E grupo di hóreka i kultura, rekreashon, deporte i demas servisio a krese ku 3,8 porshento den volúmen. T’asina bèrdat ku e kantidat di turista ku a bin Boneiru ku avion a baha ku mas di 5 porshento den 2017, pero turismo krusero a subi ku no ménos ku 88 porshento te 407 mil pasahero. Turistanan krusero ta aportá partikularmente ku konsumo den e ramo di empresa kultura, deporte i rekreashon.
E volúmen di e grupo atministrashon públiko, enseñansa i kuido a subi ku 2,7 porshento. E subida tabata partikularmente serka atministrashon públiko i kuido, enseñansa a konosé un bahada leve. Den atministrashon públiko e gastunan di tantu Rijksdienst komo Entidat Públiko a subi.
E grupo di komersio, transporte, almasenamentu, informashon i komunikashon ku -3,0 punto di porsentahe, a duna e kontribushon negativo di mas grandi na desaroyo di e bbp di Boneiru. E grupo di agrikultura i industria ku 0,9 punto di porshento a duna e kontribushon positivo di mas grandi na desaroyo di e bbp.
Splikashon
* Kambio di volúmen di e bbp: Komo indikadó di e desaroyo ekonómiko ta huza e kambio di volúmen di bbp. E volúmen ta wordu kalkulá dor di korehí e desaroyo di volúmen pa ku e kambio di preis. E kambio di volúmen, huntu ku e kambio di preis ta stipulá e kambio di balor di bbp.
**bbp: E bbp, e produkto interno bruto ta e midí ku nos ta huza pa ekspresá e grandura di ekonomía. E bbp ta suma di tur balor agregá di tur produkto i servisio produsí dor di entre otro kompanianan i gobièrnu. Esaki ta e balor agregá den ‘ preisnan base’.