Défisit komersial di Sint Eustatius a baha na 2018
Den 2018 e défisitnan komersial di Boneiru i Saba a subi i esun di Sint Eustatius a baha. Esaki CBS ta bisa a base di sifra nobo.
Boneiru, Saba i Sint Eustatius tin un défisit komersial struktural. Esaki ta nifiká ku e balor di merkansia importá ta mas tantu ku e balor di merkansia ku ta eksportá. E islanan mes ta produsí relativamente poko.
Na 2018 Sint Eustatius a importá 47 mion dòler mas na merkansia ku el a eksportá. E défisit komersial aki tabata 10 porshento mas abou ku na 2017, pero tabata mas haltu ainda si ku e défisit di 2014. E balor di importashon a baha ku 7 porshento te 51 mion dòler i e balor di eksportashon a subi ku 59 porshento te kasi 4 mion dòler.
Saba: défisit komersial di mas grandi for di 2015
Na 2018 e défisit komersial di Saba tabata 20 mion dòler, un kinta parti mas haltu ku na 2017. Esaki ta e défisit di mas grandi for di 2015. E défisit komersial a krese tambe pa motibu di trabou infrastruktural na e isla, manera renobashon di e aeropuerto. Importashon di merkansia tabata 21 mion dòler i eksportashon 0.5 mion dòler.
Boneiru: ménos eksportashon di salu
Na 2018 Boneiru a importá pa 223 mion dòler, 5 porshento mas ku un aña promé. E isla a eksportá 9 mion dòler na merkansia, 15 porshento ménos ku na 2017. Esaki pa un gran parti ta debí na un bahada di eksportashon di salu. For di 2014 e défisit komersial di e isla a subi kada aña, te 214 mion dòler na 2018.
Un parti mas chikí di kombustibel den e défisit komersial di Boneiru
Mashin i material di transportashon ta e pòst di mas grandi den e défisit komersial di Boneiru, ku un importashon ku ta 57 mion dòler mas haltu ku e eksportashon. Kuminda i bestia bibu ta kontribuí na e défisit komersial ku 41 mion dòler. E défisitnan a oumentá den kasi tur kategoria kompará ku 2017. Solamente e défisit di kombustibel mineral a baha, di 14 mion dòler na 2017 pa 3.5 mion dòler na 2018.