Investigashon komparativo di e poblashon aktivo na e islanan Karibe Hulandes

Awe e Ofisinanan  Estadístiko Nashonal di Aruba, Kòrsou, Hulanda i Sint Maarten, uní den e Sistema Estadístiko Karibense (DCSS), pa promé biaha lo publiká resultado di un skema komparativo di e poblashon aktivo na e islanan Karibe Hulandes.

Den e rapòrt ta presentá e situashon di merkado laboral pa habitante di Aruba, Boneiru, Kòrsou, Saba, Sint Eustatius i Sint Maarten den e kategoria di edat di 15 pa 74 aña. E ta mustra e partisipashon laboral a base di sekso, edat i nivel di estudio riba e seis islanan.

Un mayoria di e poblashon di 15 pa 74 aña riba e islanan di Karibe Hulandes tin trabou pagá. Na Boneiru e partisipashon laboral ta esun mas haltu (70 porshento) i na Kòrsou esun mas abou (53 porshento). E grupo di 25 pa 54 aña tin e kantidat mas grandi di hende ku ta traha. E partisipashon laboral ta mas abou serka hóbennan i hendenan di 55 aña òf mas: e hóbennan ainda ta studiando miéntras esnan di edat ya ta ku penshun. Mas ku 80 porshento di e hendenan ku ta traha, ta traha 35 ora òf mas pa siman. Mayoria di nan ta trahadó ku un kontrato fiho, pero e parti di trahadó temporal tambe ta relativamente haltu, ku eksepshon di Aruba. Aktividatnan ekonómiko relatá na turismo manera akomodashon i provishon di kuminda i komèrsio, i konstrukshon na menor medida , ta un hunga un ròl importante riba e islanan. Un otro fuente importante di empleo riba tur e islanan di Karibe Hulandes ta Gobièrnu Públiko. 

Pa ofresé konteksto pa e sifranan publiká, den hopi kaso ta kompará nan ku e promedio di tur pais OESO (Organisashon di Kolaborashon i Desaroyo Ekonómiko) òf si esaki no ta disponibel, ku e sifranan relevante pa Hulanda (Oropeo), Estádos Unídos i Union Oropeo.